აფხაზეთის ავტონომიური რესპუბლიკის განათლებისა და კულტურის სამინისტრო სახელოვნებო მიმართულებით ორ ახალ პროგრამას იწყებს 

ახალი ინიციატივა სტუდენტებისათვის კულტურისა და ხელოვნების დამსახურებულ მოღვაწეთა სახელობით სტიპენდიებსა და სახელოვნებო სტაჟირებას მოიცავს.

პროგრამების შესახებ ინფორმაციის გავრცელების მიზნით, სახელოვნებო უმაღლეს საგანმანათლებლო დაწესებულებებში აფხაზეთიდან დევნილ სტუდენტებთან საინფორმაციო შეხვედრები გაიმართა. სამინისტროს კულტურისა და კულტურული მემკვიდრეობის დაცვის დეპარტამენტის წარმომადგენლებმა მონაწილეებს ახალი ინიციატივები გააცნეს, დეტალურად განუმარტეს მონაწილეობის პირობები, შერჩევის კრიტერიუმები და განაცხადის წარდგენის პროცედურები.

ალექსანდრე შერვაშიძის, დიმიტრი ჯაიანისა და გურამ ყურაშვილის სახელობის სტიპენდიები ახალგაზრდა ხელოვანთა პროფესიული განვითარების მხარდაჭერასა და შემოქმედებითი საქმიანობის წახალისებას ისახავს მიზნად. პროგრამა აფხაზეთიდან დევნილი, უმაღლესი სახელოვნებო საგანმანათლებლო პროგრამების ბაკალავრიატისა და მაგისტრატურის სტუდენტებისთვის არის განკუთვნილი. კანდიდატთა შერჩევის მნიშვნელოვანი კრიტერიუმია განსაკუთრებული შემოქმედებითი მიღწევები და მაღალი აკადემიური მოსწრება.

ამასთან, სამინისტროში პირველად ცხადდება ოთხთვიანი სტაჟირების პროგრამა სახელოვნებო უმაღლესი სასწავლებლების, აფხაზეთიდან დევნილი სტუდენტებისა და კურსდამთავრებულებისთვის. შერჩეული კანდიდატები სტაჟირებას აფხაზეთის შემოქმედებით კოლექტივებში გაივლიან. კერძოდ, პროფესიულ თეატრებში, კაპელასა და ანსამბლებში. პროგრამა ახალგაზრდებს მისცემს შესაძლებლობას, შეიძინონ პრაქტიკული გამოცდილება, გაიღრმავონ პროფესიული უნარები და სრულად წარმოაჩინონ საკუთარი შემოქმედებითი პოტენციალი.

აღნიშნული ინიციატივა სახელოვნებო განათლების მხარდაჭერას, ახალგაზრდა ნიჭიერი ხელოვანების პროფესიულ გაძლიერებასა და აფხაზეთის კულტურული სივრცისთვის ახალი შემოქმედებითი რესურსის განვითარებას შეუწყობს ხელს.

პროგრამებში მონაწილეობის მსურველთა განაცხადების მიღება მიმდინარე წლის 30 ივლისიდან 15 სექტემბრამდე გაგრძელდება.

კანდიდატთა წარდგენის წესი, პირობები და სავალდებულო დოკუმენტაციის ნუსხა გამოქვეყნებულია სამინისტროს ვებგვერდზე https://abkhazia.gov.ge

ელექტრონული ფორმით განაცხადის შევსება შესაძლებელია აფხაზეთის ავტონომიური რესპუბლიკის მთავრობის ერთიან ელექტრონულ პორტალზე  

მიმდინარეობს განაცხადების მიღება ალექსანდრე შერვაშიძის, დიმიტრი ჯაიანისა და გურამ ყურაშვილის სახელობის სტიპენდიების მოსაპოვებლად 

კულტურისა და ხელოვნების დამსახურებულ მოღვაწეთა სახელობითი სტიპენდიები აფხაზეთის ავტონომიური რესპუბლიკის განათლებისა და კულტურის სამინისტროში წელს პირველად გამოცხადდა.

აღნიშნული ინიციატივის მიზანია, ხელი შეუწყოს და წაახალისოს აფხაზეთიდან დევნილი, ხელოვნების სფეროში გამორჩეული ნიჭისა და მიღწევების მქონე სტუდენტები.

სახელობითი სტიპენდია უმაღლესი საგანმანათლებლო დაწესებულებების აკრედიტებული საბაკალავრო და სამაგისტრო სახელოვნებო პროგრამების სტუდენტებს ენიჭებათ და ერთი სასწავლო წლის (10 თვის) განმავლობაში, ყოველთვიურად 300 ლარს ითვალისწინებს.

კანდიდატთა წარდგენის წესი და პირობები, აგრეთვე სავალდებულო დოკუმენტაციის ნუსხა იხილეთ ბმულზე 

განაცხადები მიიღება 2026 წლის 30 ივლისიდან 15 სექტემბრის ჩათვლით.

სამუშაო საათები: 10:00 საათიდან 18:00 საათამდე, შაბათ-კვირის გარდა.

აფხაზეთის შემოქმედებით კოლექტივებში სტაჟირების პროგრამაზე განაცხადების მიღება დაიწყო 

აფხაზეთის ავტონომიური რესპუბლიკის განათლებისა და კულტურის სამინისტრო სახელოვნებო პროგრამების სტუდენტებისა და კურსდამთავრებულებისთვის 4-თვიანი სტაჟირების პროგრამას წელს პირველად აცხადებს.

პროგრამის მიზანია ხელი შეუწყოს ახალგაზრდა, განსაკუთრებული ნიჭით გამორჩეულ ხელოვანებს განივითარონ პროფესიული უნარები, მიიღონ პრაქტიკული გამოცდილება და გამოავლინონ მათი შემოქმედებითი პოტენციალი.

შერჩეული კანდიდატები სტაჟირებას გაივლიან აფხაზეთის ავტონომიური რესპუბლიკის განათლებისა და კულტურის სამინისტროს შემოქმედებით კოლექტივებში:

• გურამ ყურაშვილის სახელობის აფხაზეთის სახელმწიფო საგუნდო კაპელა;
• სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრი;
• სოხუმის გიორგი რატიანის სახელობის მოზარდ მაყურებელთა პროფესიული სახელმწიფო დრამატული თეატრი;
• აფხაზეთის სიმღერისა და ცეკვის სახელმწიფო აკადემიური ანსამბლი ,,აფხაზეთი“;
• აფხაზეთის სიმღერის სახელმწიფო ანსამბლი ,,შავნაბადა“.

დეტალური ინფორმაცია, მონაწილეობის პირობები და წარსადგენი დოკუმენტაციის ნუსხა იხილეთ მითითებულ ბმულზე  
განაცხადები მიიღება 2026 წლის 30 ივლისიდან 15 სექტემბრის ჩათვლით.

სამუშაო საათები: 10:00 საათიდან 18:00 საათამდე, შაბათ-კვირის გარდა.

მისამართი: ქ. თბილისი, დ. უზნაძის ქ. №68

ელექტრონული ფორმით განაცხადის შევსება შესაძლებელია აფხაზეთის ავტონომიური რესპუბლიკის მთავრობის ერთიან ელექტრონულ პორტალზე  

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია ძიუდოში ,,აფხაზეთის ღია პირველობას" დაესწრო.

შეჯიბრი აფხაზეთის ძიუდოს აკადემიის ორგანიზებით ბაკურიანში გაიმართა. მასში საქართველოს სხვადასხვა რეგიონიდან 60-ზე მეტი სპორტსმენი მონაწილეობდა, მათ შორის იყვნენ აფხაზეთიდან იძულებით გადაადგილებული ახალგაზრდები. გამარჯვებულები გოგონებსა და ვაჟებს შორის 11 წონით კატეგორიაში გამოვლინდნენ.

ღონისძიების ფარგლებში, გიორგი ძაძამიამ მონაწილეებსა და ორგანიზატორებს სიტყვით მიმართა და პრიზიორების სიგელებითა და მედლებით დაჯილდოებაში მიიღო მონაწილეობა.

,,აღნიშნული ტურნირი კიდევ ერთხელ ადასტურებს, რომ სპორტი ახალგაზრდებისთვის არა მხოლოდ საკუთარი შესაძლებლობების გამოვლენის, არამედ ისეთი ღირებულებების განმტკიცების მნიშვნელოვანი საშუალებაა, რომლებიც წარმატებული და პასუხისმგებლობიანი საზოგადოების საფუძველს ქმნის. მადლობას ვუხდი ღონისძიების ორგანიზატორებს, მხარდამჭერ უწყებებს, მწვრთნელებსა და მონაწილეებს ჩემპიონატის წარმატებით განხორციელებისთვის. ვულოცავ გამარჯვებულებს დამსახურებულ ტიტულს და ყველა მონაწილეს დიდ წარმატებას ვუსურვებ", - აღნიშნა გიორგი ძაძამიამ.

ღონისძიებას აფხაზეთის ა/რ იძულებით გადაადგილებულ პირთა მინისტრის მოადგილე იგორ კოპალიანი, აფხაზეთის ავტონომიური რესპუბლიკის მომსახურების სააგენტოს დირექტორი ავთანდილ ქარაია, ვეტერანების საქმეთა სახელმწიფო სამსახურის დირექტორი კობა კობალაძე, დირექტორის მოადგილე ჯანდრი უბირია, ვეტერანები და სხვა მოწვეული სტუმრები ესწრებოდნენ.

მესტიაში გურამ ყურაშვილის სახელობის აფხაზეთის სახელმწიფო საგუნდო კაპელის შემოქმედებითი საღამო ჩატარდა. ღონისძიებას აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე გური ბაქრაძე დაესწრო.

საგუნდო მუსიკის კონცერტი მესტიის კულტურისა და ხელოვნების ცენტრში, ფესტივალის „საქართველო ქრისტიანული სახელმწიფო - 1700“ ფარგლებში გაიმართა.

კაპელის მომღერალთა დასმა ზვიად ბოლქვაძის ხელმძღვანელობით მეოცე და ოცდამეერთე საუკუნის ქართველი კომპოზიტორების საგუნდო ნაწარმოებები, ასევე, გუნდისთვის არანჟირებული ცნობილი სიმღერები შეასრულა.

ღონისძიებას აფხაზეთის ავტონომიური რესპუბლიკის მთავრობის თავმჯდომარის წარმომადგენელი სამეგრელო-ზემო სვანეთის მხარეში ირაკლი ბაღათურია, მესტიის კულტურისა და ხელოვნების ცენტრის დირექტორი გეგი ფალიანი, ასევე, სახელოვნებო სფეროს წარმომადგენლები და სხვა მოწვეული სტუმრები ესწრებოდნენ.

საქართველოში ქრისტიანობის სახელმწიფო რელიგიად გამოცხადების 1700 წლის იუბილე მთელი ქვეყნის მასშტაბით მრავალფეროვანი კულტურული და შემოქმედებითი ღონისძიებებით აღინიშნება. პროექტი „საქართველო ქრისტიანული სახელმწიფო - 1700“ საქართველოს კულტურის სამინისტროსა და სსიპ „შემოქმედებითი საქართველოს“ მხარდაჭერით ხორციელდება და ქვეყნის ქრისტიანული მემკვიდრეობის, კულტურული ფასეულობებისა და ეროვნული იდენტობის წარმოჩენასა და პოპულარიზაციას ისახავს მიზნად.

აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე გური ბაქრაძე საქართველოში ქრისტიანობის სახელმწიფო რელიგიად გამოცხადების 1700 წლის იუბილესადმი მიძღვნილ საღამოს დაესწრო.

პროექტის „საქართველო ქრისტიანული სახელმწიფო - 1700“ ფარგლებში, ოპერისა და ბალეტის თეატრში, აფხაზეთის სახელმწიფო საგუნდო კაპელის სამხატვრო ხელმძღვანელის, ზვიად ბოლქვაძის დირიჟორობით, ჯუზეპე ვერდის ,,რეკვიემი“ შესრულდა. კონცერტში სოლისტები იანო ალიბეგაშვილი, ქეთევან ქემოკლიძე, ოთარ ჯორჯიკია და რამაზ ჩიკვილაძე, ასევე თბილისის ოპერისა და ბალეტის თეატრის გუნდი და ორკესტრი მონაწილეობდნენ.

ღონისძიებას საქართველოს კულტურის მინისტრი თინათინ რუხაძე, მინისტრის მოადგილეები, საქართველოს საპატრიარქოს, საკანონმდებლო ხელისუფლების, აფხაზეთის ავტონომიური რესპუბლიკის მთავრობის, დიპლომატიური კორპუსის, კულტურისა და სახელოვნებო სფეროს წარმომადგენლები დაესწრნენ.

საიუბილეო საღამო საქართველოს კულტურის სამინისტროსა და „შემოქმედებითი საქართველოს“ მხარდაჭერით გაიმართა. პროექტის ,,საქართველო ქრისტიანული სახელმწიფო -1700“ ფარგლებში, მთელი წლის განმავლობაში არაერთი კულტურული ღონისძიებაა დაგეგმილი.

აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე გური ბაქრაძე, სამინისტროს სპორტისა და ახალგაზრდობის საქმეთა დეპარტამენტის უფროს ავთანდილ ძაგანიასთან ერთად, ხელვაჩაურში გამართულ იუნიფაიდ წოლჭიმსა და შტანგის ამოწევაში „შავი ზღვის თასის ღია გათამაშებას“ დაესწრო.

ჩემპიონატი ძალისმიერი სპორტის საერთაშორისო გაერთიანების ორგანიზებით, საქართველოს სპეციალური ოლიმპიადის ეგიდითა და ადგილობრივი ხელისუფლების მხარდაჭერით გაიმართა. იუნიფაიდ ძალისმიერი სპორტის პოპულარიზაციის მიზნით, შეჯიბრში მონაწილეობდნენ როგორც ტიპური განვითარების, ისე გონებრივი განვითარების შეფერხების მქონე სპორტსმენები, მათ შორის აფხაზეთიდან დევნილი ახალგაზრდები.

შეჯიბრი ინკლუზიური სპორტის განვითარების, თანასწორი შესაძლებლობების ხელშეწყობისა და სპორტის საშუალებით სოციალური ინტეგრაციის გაძლიერებას ემსახურება. საერთაშორისო ჩემპიონატში სპორტსმენები საქართველოს გარდა, სომხეთიდან, აზერბაიჯანიდან და უკრაინიდან იყვნენ ჩართულნი. 

ღონისძიებას ქალაქ თბილისის მერიის, ადგილობრივი თვითმმართველობის, საქართველოს სპეციალური ოლიმპიადის, სპორტისა და საგანმანათლებლო სფეროს წარმომადგენლები ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრმა, გიორგი ძაძამიამ, ა(ა)იპ საქველმოქმედო ჰუმანიტარულ ცენტრ „აფხაზეთის" აღმასრულებელ დირექტორ ნაპოლეონ მილორავასთან ერთად, ურთიერთთანამშრომლობის მემორანდუმს მოაწერა ხელი.

მემორანდუმის მიზანია მხარეებს შორის თანამშრომლობის გაღრმავება და ერთობლივი ძალისხმევის კონსოლიდაცია საგანმანათლებლო, კულტურული და სოციალური პროექტების განხორციელების მიმართულებით.

პარტნიორობა ითვალისწინებს მხარეთა რესურსების, გამოცდილებისა და პროფესიული შესაძლებლობების გაერთიანებას, რაც ხელს შეუწყობს აფხაზეთიდან იძულებით გადაადგილებული მოსახლეობის მხარდაჭერას, ასევე მათთვის განვითარების, განათლებისა და საზოგადოებრივ ცხოვრებაში აქტიური ჩართულობის დამატებითი შესაძლებლობების შექმნას.

თანამშრომლობის ფარგლებში მხარეები ერთობლივად დაგეგმავენ და განახორციელებენ სხვადასხვა პროექტსა და ინიციატივას, უზრუნველყოფენ ანალიტიკური, მეთოდოლოგიური და საინფორმაციო რესურსების გაზიარებას, რაც გააძლიერებს ინსტიტუციურ თანამშრომლობას, გაზრდის პროგრამების ეფექტიანობას და ხელს შეუწყობს საერთო მიზნების მიღწევას.

ურთიერთთანამშრომლობის მემორანდუმს ხელი აფხაზეთის ავტონომიური რესპუბლიკის განათლებისა და კულტურის მინისტრმა გიორგი ძაძამიამ და აფხაზეთის მეომართა კავშირის მეომართა საბჭოს თავმჯდომარემ, ლევან ქეცბაიამ მოაწერეს.

მემორანდუმი ახალგაზრდებში საქართველოს უახლესი ისტორიის შესახებ ცნობიერების ამაღლების, პატრიოტული ღირებულებების განმტკიცებისა და ისტორიული მეხსიერების შენარჩუნებისათვის ერთობლივი ღონისძიებების განხორციელებას ისახავს მიზნად.

თანამშრომლობა საგანმანათლებლო, კულტურულ და შემეცნებით პროექტებს, ღონისძიებებს, შეხვედრებსა და სხვა ინიციატივებს ითვალისწინებს. განსაკუთრებული ყურადღება დაეთმობა აფხაზეთის თემატიკასთან დაკავშირებული პროექტების მხარდაჭერას, ომის ვეტერანებისა და ახალგაზრდების ჩართულობის გაზრდას, ასევე მომავალი თაობისთვის გამოცდილებისა და ცოდნის გაზიარებას.

მემორანდუმი გრძელვადიან თანამშრომლობასა და საერთო ძალისხმევით მნიშვნელოვანი პროექტების განხორციელებას შეუწყობს ხელს.

სოხუმის გიორგი რატიანის სახელობის მოზარდ მაყურებელთა თეატრმა, გამორჩეული ქართველი მწერლის, ნოდარ დუმბაძის დაბადების 98-ე იუბილე სპექტაკლით „მე, ბებია, ილიკო და ილარიონი“ აღნიშნა.

საღამოს აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე გური ბაქრაძე, აფხაზეთის ა/რ უმაღლესი საბჭოს თავმჯდომარე ჯემალ გამახარია, უმაღლესი საბჭოს დეპუტატები, აფხაზეთის ა/რ მთავრობის წარმომადგენლები და სხვა მოწვეული სტუმრები ესწრებოდნენ.

მაია ჩართოლანის რეჟისორობით ,,მე, ბებია, ილიკო და ილარიონი" წელს პირველად დაიდგა და მისი მთავარი ლაიტმოტივი დუმბაძის შემოქმედებისათვის დამახასიათებელი ცრემლნარევი იუმორი, სიკეთე, ჰუმანიზმი და ადამიანური ურთიერთობებია.

14 ივლისს სოხუმის სახელმწიფო დრამატულ თეატრში გამართული წარმოდგენით გიორგი რატიანის სახელობის თეატრი მაყურებელს მომავალ სეზონამდე დაემშვიდობა და თეატრალური სეზონი დახურა.