აფხაზეთის შეიარაღებული კონფლიქტის დაწყებიდან 34 წელი გავიდა. 1992 წლის 14 აგვისტოს აფხაზეთში განვითარებულ ტრაგიკულ მოვლენებთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის მთავრობის წევრებთან ერთად, საქართველოს ტერიტორიული მთლიანობისთვის დაღუპულთა ხსოვნას პატივი მიაგო და გმირთა მემორიალი გვირგვინით შეამკო.
„1992 წლის 14 აგვისტო არის ერთ-ერთი ყველაზე ტრაგიკული თარიღი ჩვენი ქვეყნის უახლეს ისტორიაში. დღეს ჩვენ პატივს მივაგებთ გმირებს, სამხედროებს და სამოქალაქო პირებს ვინც თავი ჩვენი ქვეყნის დამოუკიდებლობას და სუვერენიტეტს შესწირა. მათ მოგვცეს იმის მაგალითი თუ როგორ უნდა გვიყვარდეს ჩვენი სამშობლო და ღირსეულად ვემსახურებოდეთ ქვეყანას.
ჩვენი ვალია, ყველაფერი გავაკეთოთ იმისთვის, რომ საქართველოს დეოკუპაცია და ტერიტორიული მთლიანობის აღდგენა მშვიდობიანი გზით შევძლოთ.
ჩვენ გვწამს, რომ საქართველოს მთავრობის პრაგმატული და თანმიმდევრული სამშვიდობო პოლიტიკის საფუძველზე ეს იდეა და ეს მისია, რომლისთვისაც ამ ხალხმა თავი მიუძღვნეს საკუთარ სამშობლოს, აუცილებლად იქნება აღსრულებული და ჩვენ შევძლებთ აფხაზ და-ძმებთან ერთად, ერთიან საქართველოში თანაცხოვრებას“, - განაცხადა გიორგი ჯინჭარაძემ.
მემორიალთან საქართველოს თავდაცვის მინისტრის მოადგილე გრიგოლ გიორგაძე, თავდაცვის ძალების მეთაურის მოადგილე გენერალური შტაბის უფროსი, გენერალ-მაიორი ჯონი ტატუნაშვილი, ვეტერანების საქმეთა სახელმწიფო სამსახურის დირექტორი კობა კობალაძე, აფხაზეთის მეომართა კავშირის თავმჯდომარე ანზორ მარგიანი, აფხაზეთის უმაღლესი საბჭოს დეპუტატები, აფხაზეთის ომის ვეტერანები და დაღუპულთა ოჯახის წევრები იმყოფებოდნენ.
აფხაზეთში შეიარაღებული დაპირისპირება 1992 წლის 14 აგვისტოს დაიწყო. პირველი შეტაკებები ოჩამჩირისა და გულრიფშის რაიონებში მოხდა. სამხედრო კონფლიქტი 13 თვე და 13 დღე გაგრძელდა, რასაც ათასობით მშვიდობიანი მოქალაქისა და ჯარისკაცის სიცოცხლე შეეწირა.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძის ხელმძღვანელობით დღეს მთავრობის მორიგი სხდომა გაიმართა, სადაც მთავრობის წევრებმა ახალ ინიციატივებთან დაკავშირებით იმსჯელეს.
მთავრობის თავმჯდომარის განცხადებით, აფხაზეთის ავტონომიური რესპუბლიკის მთავრობა აგრძელებს ახალი პროგრამების განხორციელებას, რომლებიც დევნილი მოსახლეობის მხარდაჭერას და მათ შრომით ბაზარზე ინტეგრაციის ხელშეწყობას ითვალისწინებს.
„ვიწყებთ პროექტს, რომელიც ჩვენი დევნილი მოქალაქეების შრომის ბაზარზე ინტეგრაციას შეუწყობს ხელს. აღნიშნული კუთხით ჩვენ ვიწყებთ სასწავლო კურსების დაფინანსებას ისეთ მოთხოვნად პროფესიებში, როგორიცაა დიზაინი, ციფრული მედია, მულტიმედია, საინფორმაციო ტექნოლოგიები და პროგრამული უზრუნველყოფა. ასევე, ხორციელდება თანადაფინანსება საწარმოო ტექნოლოგიების, წარმოების, კულინარიის, კონდიტერისა და ტიხრული მინანქრის მიმართულებით.
პროგრამის თითოეული ბენეფიციარი მიიღებს მაქსიმუმ 80%-იან თანადაფინანსებას, 2000 ლარის ფარგლებში.
ასევე ვიწყებთ ახალ პროგრამებს განათლებისა და ახალგაზრდობის მიმართულებით.
სახელობითი სტიპენდიები აფხაზეთიდან დევნილი, უმაღლესი სახელოვნებო საგანმანათლებლო პროგრამების ბაკალავრიატისა და მაგისტრატურის სტუდენტებისთვის არის განკუთვნილი და ერთი სასწავლო წლის განმავლობაში, ყოველთვიურად 300 ლარის ოდენობის სტიპენდიას ითვალისწინებს.
გარდა ამისა, უმაღლესი სახელოვნებო სასწავლებლების, აფხაზეთიდან დევნილი სტუდენტებისა და კურსდამთავრებულებისთვის ამოქმედდა ოთხთვიანი სტაჟირების პროგრამა აფხაზეთის შემოქმედებით კოლექტივებში. შერჩეული კანდიდატები 4 თვის განმავლობაში შეძლებენ, შეიძინონ პრაქტიკული გამოცდილება, გაიღრმაონ პროფესიული უნარები და სრულად წარმოაჩინონ საკუთარი შემოქმედებითი პოტენციალი.
აქვე არ შემიძლია არ შევეხო სპორტისა და ახალგაზრდობის მიმართულებას, სადაც უკვე გაზრდილი ბიუჯეტით ვიწყებთ ჩვენი კლუბებისა და გუნდების მხარდაჭერას. ამისათვის 205 000 ლარი გამოიყო. აგრეთვე გავზარდეთ სპორტული ინიციატივების მხარდაჭერის პროგრამა და ამისთვის მადლობა მინდა ვუთხრა აფხაზეთის განათლებისა და კულტურის სამინისტროს.
ამ თითოეული პროგრამის განხორციელება ცენტრალური მთავრობის მიერ გამოყოფილი დამატებითი რესურსის გარეშე შეუძლებელი იქნებოდა, რისთვისაც დიდი მადლობა მინდა გადავუხადო საქართველოს პრემიერ-მინისტრს, ბატონ ირაკლი კობახიძეს. გაზრდილი ბიუჯეტი კი ჩვენ გვაძლევს საშუალებას დავნერგოთ ახალი პროგრამები და პროექტები“, - განაცხადა გიორგი ჯინჭარაძემ.
აფხაზეთის მთავრობის სხდომაზე ასევე დღის წესრიგით გათვალისწინებული სხვა მიმდინარე საკითხები განიხილეს.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის მთავრობის წევრებთან და უმაღლესი საბჭოს დეპუტატებთან ერთად, მუხათგვერდის ძმათა სასაფლაოზე 2008 წლის რუსეთ-საქართველოს ომში დაღუპულთა ხსოვნას პატივი მიაგო.
მემორიალთან საქართველოს პრეზიდენტი, პრემიერ-მინისტრი, პარლამენტის თავმჯდომარე, დედაქალაქის მერი, აღმასრულებელი და საკანონმდებლო ხელისუფლებისა და დიპლომატიური კორპუსის წარმომადგენლები იმყოფებოდნენ.
2008 წლის რუსეთ-საქართველოს ომიდან 18 წელი გავიდა. 5-დღიან საომარ მოქმედებებს 400-ზე მეტი ადამიანის სიცოცხლე შეეწირა, მათ შორის 170 სამხედრო, შსს-ს 19 თანამშრომელი, 244 სამოქალაქო პირი, 2 234 ადამიანი დაიჭრა, ხოლო 26 000 კი დევნილად იქცა.
რუსული აგრესიის დროს დაღუპულთა ხსოვნის პატივსაცემად, 8 აგვისტოს, მთელი ქვეყნის მასშტაბით სახელმწიფო დროშები დაეშვა.
