აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

სიახლეები

ფარიკაობაში აფხაზეთის ღია პირველობა დასრულდა

ნუგზარ ასათიანის სახელობის ფარიკაობის დარბაზში აფხაზეთის ღია პირველობის დასკვნითი შეხვედრები გაიმართა. ტურნირში საქართველოს სხვადასხვა რეგიონების წარმომადგენლები მონაწილეობდნენ.

ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის განათლებისა და კულტურის მინისტრი ნანა გაბელია და აფხაზეთის კულტურის, სპორტის და ახალგაზრდულ საქმეთა სააგენტოს დირექტორი ლიკა კვარაცხელია ესწრებოდნენ, რომლებმაც „აფხაზეთის თასის“ მონაწილეები თასებითა და მედლებით დააჯილდოვეს. 

შეჯიბრი აფხაზეთის კულტურის, სპორტის და ახალგაზრდულ საქმეთა სააგენტოს მხარდაჭერით ჩატარდა და მასში 10, 12 და 15 წლამდე ასაკის გოგონები და ვაჟები მონაწილეობდნენ.

დავით ფაცაცია საქართველოს პარლამენტის ეროვნულ ბიბლიოთეკაში აფხაზი გოგოს -„სამირას დღიურების“ პრეზენტაციას დაესწრო

აფხაზეთიდან იძულებით გადაადგილებულ პირთა-დევნილთა მომსახურების სააგენტომ აფხაზი გოგოს -„სამირას დღიურები“ გამოსცა, რომლის პრეზენტაციაც საქართველოს პარლამენტის ეროვნულ ბიბლიოთეკაში გაიმართა.

წიგნში სამირა წარმოადგენს რეალისტურ მთავარ გმირს, ქართულ-აფხაზური ფესვებით, რომელიც ცდილობს გაგვაგონოს ხმა ენგურს მიღმა საქართველოდან. ის წიგნში დეტალურად აღწერს ქართულ-აფხაზურ ურთიერთობებს, ოკუპირებულ ტერიტორიაზე არსებულ მდგომარეობას.

„მინდა აღვნიშნო, რომ რაც წიგნშია ასახული არის ერთ-ერთი გამორჩეული მაგალითი, იმისა თუ რა ტიპის ცხოვრება ჰქონდათ აფხაზეთის ოკუპირებულ ტერიტორიაზე მცხოვრებ ახალგაზრდებს 90-იან წლებში და შემდგომ პერიოდში.

განსაკუთრებით მადლიერი ვარ ჩვენი ორი ძვირფასი ქალბატონის - ქეთი ხატიაშვილის და ჯილდა მაჭავარიანის, რომლებმაც სამირას წერილების წიგნად გამოცემის იდეა მოგვაწოდეს. დღევანდელ დღეს ბევრად მარტივია საუბარიც, მოქმედებაც, გადაადგილებაც და ა.შ., მაგრამ რამდენიმე წლის წინ, როცა ამ ქალბატონებმა ჩაიფიქრეს წერილების წიგნად გამოცემა, ეს ყველაფერი ბევრად რთული იყო.

ძალიან დიდი იმედი მაქვს, რომ გავიმარჯვებთ და ყველანი ერთად შევქმნით იმ ნათელ მომავალს, რომელიც ჩვენ გვჭირდება, აფხაზებს სჭირდებათ. ჩვენ, ქართველებიც და აფხაზებიც 30 წლიანი ტრაგედიის შემდეგ მივხვდით, რომ ორივე მხარე ვიყავით ხაფანგში, რომელიც ჩვენმა მტერმა, ოკუპანტმა დაგვიგო და გაიმარჯვა. შედეგად ჩვენ ერთმანეთი, ერთმანეთის ოჯახები, ერთმანეთის სიცოცხლე დავკარგეთ.

ახლა ვდგავართ იმ გზაზე, როცა უნდა გავაერთიანოთ ქვეყანა „მამულის, ენის, სარწმუნოების“ ერთობით. ჩვენ ერთმანეთს ვჭირდებით, ჩვენი ფასეულობები განწირულია ერთობისთვის, თუ აფხაზი ერი უნდა გადარჩეს, ის მხოლოდ ქართულ ეთნოსში და ქართულ სივრცეში გადარჩება, სხვა ალტერნატივა არ არსებობს.

მე მჯერა, რომ სწორედ ისეთი ახალგაზრდები, რომლებიც ქმნიან „სამირას დღიურების“ მსგავს ნაწარმოებებს, იქნებიან მთავარი მედროშეები ჩვენი ქართულ-აფხაზური ერთიანი სიყვარულის, სახელმწიფოებრიობის, თუ მომავლის მშენებლობის.“ - დავით ფაცაცია

 

დავით ფაცაცია ქუთაისში წიგნის „საქართველოს ებრაელთა ისტორიის (საარქივო მასალების მიხედვით)“ პრეზენტაციას დაესწრო

ქუთაისში, სოხუმში დაბადებული და გაზრდილი ქართველი ებრაელის, იაკობ ოფირი-ეფრემაშვილის წიგნის „საქართველოს ებრაელთა ისტორიის (საარქივო მასალების მიხედვით)“ პრეზენტაცია გაიმართა.

წიგნი აფხაზეთიდან იძულებით გადაადგილებულ პირთა-დევნილთა მომსახურების სააგენტომ გამოსცა და მასში შესულია უნიკალური საარქივო მასალები, რომელთაც ძალიან დიდი ხნის განმავლობაში ედო გრიფი „საიდუმლო“.

პრეზენტაციას ესწრებოდნენ აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, სამინისტროს წარმომადგენლები და სხვა მოწვეული სტუმრები.

 

 

აფხაზეთის ავტონომიური რესპუბლიკის იძულებით გადაადგილებულ პირთა სამინისტროს წარმომადგენლები პროექტის „აფხაზეთი საქართველოა“ მონაწილეების საჩვენებელ ღონისძიებებს დაესწრნენ

აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, მინისტრის მოადგილე იგორ კოპალიანი და აფხაზეთიდან იძულებით გადაადგილებულ პირთა-დევნილთა მომსახურების სააგენტოს დირექტორი სალომე დოლიძე თბილისის რამდენიმე სკოლაში პროექტის „აფხაზეთი საქართველოა“ მონაწილეების საჩვენებელ ღონისძიებებს დაესწრნენ, სადაც დაიდგა სპექტაკლი აფხაზეთის თემატიკაზე, ასევე წარმოდგენილ იქნა საცეკვაო და მუსიკალური ნომრები.

პროექტი აფხაზეთიდან იძულებით გადაადგილებულ პირთა-დევნილთა მომსახურების სააგენტოსა და არასამთავრობო ორგანიზაცია "ვოი-ახალგაზრდების ხმის" ერთობლივი ორგანიზებითა და საქართველოს საპატრიარქოს მხარდაჭერით ხორციელდება.

პროექტის ფარგლებში, თბილისში მდებარე 50-მდე საჯარო და კერძო ზოგადსაგანმანათლებლო დაწესებულების მოსწავლეებს საშუალება აქვთ აქტიურად ჩაერთონ ქართულ-აფხაზური ურთიერთობის გაუმჯობესებისათვის მიმართულ კამპანიაში, მეტად გაიღრმაონ ცოდნა და გაეცნონ მიმდინარე პროცესებს.

 

გურამ მისაბიშვილმა აფხაზეთის უმაღლეს საბჭოს ჰუმანიტარულ აქციაში მიიღო მონაწილეობა

აფხაზეთის ავტონომიური რესპუბლიკის უმაღლესმა საბჭომ სენაკის დევნილთა განსახლების ობიექტში ჰუმანიტარული აქცია მოაწყო, რომლის ფარგლებშიც 430 დევნილ ოჯახს სასურსათო პროდუქტები გადაეცა.

ღონისძიების ფარგლებში, აფხაზეთის ავტონომიური რესპუბლიკის საპატიო და წარმატებულის სიგელები გადაეცათ სენაკის მუნიციპალიტეტის მერს ვახტანგ გადელიას, სენაკის მუნიციპალიტეტის საკრებულოს თავმჯდომარეს საბა ოდიშარიას, სხვადასხვა პროფესიის ადამიანებს და წარმატებულ მოზარდებს.

ღონისძიებებში მონაწილეობას იღებდნენ აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე გურამ მისაბიშვილი, აფხაზეთის ავტონომიური რესპუბლიკის უმაღლესი საბჭოს წევრები და ადგილობრივი ხელისუფლების წარმომადგენლები.

შეხვედრის ფარგლებში, ხელისუფლების წარმომადგენლებმა და სენაკის დევნილთა განსახლების ადგილში მცხოვრებმა დევნილებმა ერთად განიხილეს, აფხაზეთიდან იძულებით გადაადგილებულ პირთა წინაშე არსებულ გამოწვევები და მათი მოგვარების გზები დასახეს.

 

„სქილვილში“ პროგრამის „თანამედროვე ტექნოლოგიური პროფესიების შესწავლა აფხაზეთიდან დევნილი მოსახლეობისთვის“ მონაწილეებთან შეხვედრა გაიმართა

ნეო უნივერსიტეტ „სქილვილში“ აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი გიორგი გაბედავა პროგრამის „თანამედროვე ტექნოლოგიური პროფესიების შესწავლა აფხაზეთიდან დევნილი მოსახლეობისთვის“ ახალ და ძველ მონაწილეებს შეხვდნენ.

აფხაზეთის მთავრობის მხარდაჭერით, პროგრამის ფარგლებში, აფხაზეთიდან დევნილი სტატუსის მქონე პირები, საბაზისო ცოდნისა და გამოცდილების გარეშე, სრული დაფინანსებით სწავლობენ თანამედროვე პროფესიებს, რომლებიც მათ შესაძლებლობას მისცემს შრომით ბაზარზე იყვნენ კონკურენტუნარიანები. 

მიმდინარე სემესტრში, მაღალი მოთხოვნის გამო დაემატა ახალი მიმართულებები. დევნილ ახალგაზრდებს შესაძლებლობა ეძლევათ შეისწავლონ 7 ყველაზე მოთხოვნადი პროგრამა, მათ შორის: IT პროექტების მართვა, UX/UI დიზაინი და ციფრული პროდუქტების ტესტირება, კიბერუსაფრთხოება, ციფრული მარკეტინგი. 

სასწავლო კურსი 3-დან 7 თვის განმავლობაში ონლაინ რეჟიმში მიმდინარეობს და წარმატებით დასრულების შემდეგ მონაწილეებს შესაბამისი სერტიფიკატი გადაეცემათ.

პროგრამა „თანამედროვე ტექნოლოგიური პროფესიების შესწავლა აფხაზეთიდან დევნილი მოსახლეობისთვის“ იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის და ნეო უნივერსიტეტი „სქილვილის“ ერთობლივი პროექტია, რომლის მიზანია ხელი შეუწყოს დევნილი ადამიანების სამოქალაქო ინტეგრაციასა და დასაქმებას.

აფხაზეთის მთავრობის წარმომადგენლებმა მეორე მსოფლიო ომში დაღუპულთა ხსოვნას პატივი მიაგეს

ფაშიზმზე გამარჯვების 79-ე წლისთავთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის მთავრობის წევრებთან, უმაღლესი საბჭოს დეპუტატებთან და აფხაზეთის მეომართა კავშირის წარმომადგენლებთან ერთად, ვეტერანთა კულტურისა და დასვენების პარკში მელიტონ ქანთარიას ბიუსტი ყვავილებით შეამკო და მეორე მსოფლიო ომში დაღუპულთა ხსოვნას პატივი მიაგო.

ვეტერანთა კულტურისა და დასვენების პარკში საქართველოს პრემიერ-მინისტრი, პარლამენტის თავმჯდომარე და თბილისის მერი იმყოფებოდნენ.

რუსლან აბაშიძე სააღდგომო ლიტურგიას დაესწრო

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე სიონის საკათედრო ტაძარში სააღდგომო ლიტურგიას დაესწრო.

საზეიმო წირვა სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ, კათოლიკოს-პატრიარქის ტახტის მოსაყდრე, სენაკისა და ჩხოროწყუს მიტროპოლიტ შიოსთან ერთად აღავლინა.

წირვის დაწყებამდე, სიონის საკათედრო ტაძარში შეკრებილმა მრევლმა საქართველოს პატრიარქის სააღდგომო ეპისტოლე მოისმინა.

სიონის საკათედრო ტაძარში საქართველოს პრეზიდენტი, პრემიერ-მინისტრი, პარლამენტის თავმჯდომარე, საქართველოს აღმასრულებელი და საკანონმდებლო ხელისუფლების წარმომადგენლები იმყოფებოდნენ.

აფხაზეთის მთავრობის მხარდაჭერით ბავშვთა თავშესაფარს სააღდგომო საჩუქრები გადაეცა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის სულიერების ცენტრის დირექტორმა ბესიკ სილაგაძემ აღდგომის დღესასწაულთან დაკავშირებით საქართველოს საპატრიარქოს პატრონაჟის ქვეშ მყოფი ბავშვთა თავშესაფარი „კიდევაც დაიზრდებიან“ მოინახულეს. მთავრობის თავმჯდომარემ ბავშვებს აღდგომის დღესასწაული მიულოცა და საჩუქრები გადასცა.

ღონისძიება აფხაზეთის სულიერების ცენტრის ორგანიზებითა და აფხაზეთის ავტონომიური რესპუბლიკის მთავრობის მხარდაჭერით ყოველწლიურად ხორციელდება.

აფხაზეთის მთავრობის წარმომადგენლებმა გუანჯოუში შეხვედრები გამართეს

ჩინეთში სამუშაო ვიზიტის ფარგლებში, აფხაზეთის  მთავრობის  წარმომადგენლები  ქალაქ გუანჯოუს მთავრობის წევრებს და  მეწარმეთა ასოციაციის ვიცე-პრეზიდენტს შეხვდნენ.

შეხვედრაში აფხაზეთის მთავრობის თავმდჯომარის მოადგილე ანზორ მარგიანი, აფხაზეთის ფინანსთა და ეკონომიკის მინისტრი ლევან თევზაია, მინისტრის მოადგილე გიორგი ჯინჭარაძე, სამინისტროს ”ეკონომიკური პროგრამების სააგენტოს“ ხელმძღვანელი ვასილ ბაბუნაშვილი და აფხაზეთის ა/რ სავაჭრო პალატის პრეზიდენტი გოგიტა თედორაძე მონაწილეობდნენ.

შეხვედრაზე ჩინური მხარის მიერ  საქართველოში ვიზიტის და  ვითარების ადგილზე გაცნობის სურვილი გამოითქვა.

მთავრობის წარმომადგენლებმა ასევე გუანჯოუს რამდენიმე ყველაზე მძლავრი მსუბუქი მრეწველობის საწარმო დაათვალიერეს.

აფხაზეთის ავტონომიური რესპუბლიკის იძულებით გადაადგილებულ პირთა სამინისტრომ სააღდგომო ნობათები დაარიგა

აფხაზეთის ავტონომიური რესპუბლიკის იძულებით გადაადგილებულ პირთა სამინისტრომ, აღდგომის დღესასწაულთან დაკავშირებით, აფხაზეთიდან დევნილ, სხვადასხვა სოციალური კატეგორიის 900-მდე ოჯახს, საჩუქრად საკვები პროდუქტები გადასცა.

სააღდგომო ნობათები აფხაზეთის ავტონომიური რესპუბლიკის მთავრობის ინიციატივითა და აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ორგანიზებით მთელი ქვეყნის მასშტაბით ყოველწლიურად რიგდება და სხვადასხვა სახეობის სასურსათო პროდუქტი გადაეცემა როგორც თბილისში, ასევე რეგიონებში მცხოვრებ აფხაზეთიდან იძულებით გადაადგილებულ სოციალურად დაუცველ და უკიდურესად შეჭირვებულ ოჯახებს.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, მინისტრის პირველი მოადგილე გურამ მისაბიშვილი და სამინისტროს წარმომადგენლები, აფხაზეთიდან დევნილ, განსაკუთრებული საჭიროებების მქონე ოჯახებს ესტუმრნენ და სააღდგომო ნობათები პირადად გადასცეს.

სააღდგომო ღონისძიებებისას, აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე გურამ მისაბიშვილი, აფხაზეთის ავტონომიური რესპუბლიკის უმაღლესი საბჭოს წევრებთან ერთად, სენაკის დევნილთა განსახლების ადგილას (ე.წ. სამხედრო დასახლებაში) მცხოვრებ დევნილ მოსახლეობას შეხვდა. შეხვედრაზე სსიპ - თემურ ბოკუჩავას სახელობის აფხაზეთის №7 საჯარო სკოლის წარმატებულ მოსწავლეებს, დირექტორსა და მასწავლებლებს უმაღლესი საბჭოს საპატიო სიგელები გადაეცათ.

სამუშაო ვიზიტის ფარგლებში, აფხაზეთის მთავრობის წარმომადგენლებმა, ხობის მუნიციპალიტეტის სოფელ ნოჯიხევში განხორციელებული ინფრასტრუქტურული სამუშაოები დაათვალიერეს, რომელიც აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ინფრასტრუქტურული პროგრამის ფარგლებში განხორციელდა.

 

აფხაზეთის მთავრობის წარმომადგენლებმა გუანდუნის პროვინციაში შეხვედრა გამართეს

აფხაზეთის ავტონომიური რესპუბლიკის მთავრობის წარმომადგენლები, ჩინეთში სამუშაო ვიზიტის ფარგლებში, გუანდუნის პროვინციაში უმსხვილესი სავაჭრო ცენტრის ხელმძღვანელობას შეხვდნენ.  

შეხვედრისას მხარეებმა საინვესტიციო ჭრილში, აფხაზეთიდან დევნილი მეწარმეების მხარდასაჭერად სამომავლო თანამშრომლების პერსპექტივები განიხილეს.

შეხვედრაში აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის ფინანსთა და ეკონომიკის მინისტრი ლევან თევზაია, მინისტრის მოადგილე გიორგი ჯინჭარაძე, სამინისტროს „ეკონომიკური პროგრამების სააგენტოს“ ხელმძღვანელი ვასილ ბაბუნაშვილი და აფხაზეთის ავტონომიური რესპუბლიკის სავაჭრო პალატის პრეზიდენტი გოგიტა თედორაძე მონაწილეობდნენ.

აღნიშნული სავაჭრო ცენტრი უმსხვილესია გუანდუნის პროვინციაში და სხვადასხვა პროდუქციის მეწარმეთა ასოციაციას აერთიანებს.

რუსლან აბაშიძემ აფხაზეთიდან დევნილ ოჯახებს სააღდგომო ნობათები გადასცა

აღდგომის ბრწყინვალე დღესასწაულთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ,  აფხაზეთის იძულებით გადაადგილებულ პირთა მინისტრის პირველ მოადგილე გურამ მისაბიშვილთან ერთად, სამეგრელო-ზემო სვანეთის რეგიონში მცხოვრები აფხაზეთიდან იძულებით გადაადგილებული ოჯახები მოინახულა. მთავრობის თავმჯდომარემ ზუგდიდში, სენაკსა და ფოცხოეწერში განსახლებულ დევნილებს აღდგომის დღესასწაული მიულოცა და სააღდგომო ნობათი გადასცა.

დღესვე რუსლან აბაშიძემ აფხაზეთის ავტონომიური რესპუბლიკის იძულებით გადაადგილებულ პირთა სამინისტროს წარმომადგენლებთან ერთად, ხობის მუნიციპალიტეტის სოფელ ნოჯიხევში განხორციელებული ინფრასტრუქტურული სამუშაოები დაათვალიერა, რომელიც აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ინფრასტრუქტურული პროგრამის ფარგლებში განხორციელდა.

ღონისძიებებში აფხაზეთის ავტონომიური რესპუბლიკის მთავრობის და ადგილობრივი ხელისუფლების წარმომადგენლები მონაწილეობდნენ.

აღდგომის დღესასწაულთან დაკავშირებით აფხაზეთის ავტონომიური რესპუბლიკის მთავრობის ორგანიზებით საქველმოქმედო აქცია ყოველწლიურად იმართება და სასურსათო პროდუქტი აფხაზეთიდან იძულებით გადაადგილებულ ოჯახებს გადაეცემა.

აფხაზეთის ავტონომიური რესპუბლიკის განათლებისა და კულტურის სამინისტრო ქვეპროგრამის „წარმატებული ახალგაზრდების მხარდაჭერა“ 2024 წლის II ეტაპის განხორციელებას იწყებს

სამიზნე ჯგუფებს წარმოადგენენ აფხაზეთიდან იძულებით გადაადგილებული პირები, კერძოდ:

ავტორიზებული პროფესიული საგანმანათლებლო დაწესებულებების აკრედიტებული პროგრამების სტუდენტები;

ავტორიზებული უმაღლესი საგანმანათლებლო დაწესებულებების აკრედიტებული პროგრამების (ბაკალავრები,მაგისტრანტები) სტუდენტები;

ავტორიზებული სამედიცინო/სტომატოლოგიური დაწესებულებების აკრედიტებული პროგრამების რეზიდენტები.

მოქალაქეთა განცხადებები მიიღება მიმდინარე წლის 1 მაისიდან 31 მაისის ჩათვლით:

ელექტრონულ მისამართზე - apkhazeti@mes.gov.ge

აფხაზეთის ავტონომიური რესპუბლიკის განათლებისა და კულტურის სამინისტროში

(მისამართი: თბილისი, დ. უზნაძის ქ. №68).

დამატებითი ინფორმაციისთვის დაგვიკავშირდით შემდეგ სატელეფონო ნომერზე: +995 577 09 22 39

იხ. განცხადების ბლანკი: https://shorturl.at/tyKLV

იხ. ვრცლად: https://shorturl.at/rAIS5

 

აფხაზეთის ავტონომიური რესპუბლიკის მთავრობის წარმომადგენლები სამუშაო ვიზიტით ჩინეთში იმყოფებიან

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის მთავრობის წარმომადგენლებთან ერთად სამუშაო ვიზიტით ჩინეთის სახალხო რესპუბლიკაში იმყოფება.

ვიზიტის ფარგლებში პირველი შეხვედრა „სარტყლისა და გზის საქართველოს ბიზნეს სახლის“ ხელმძღვანელთან,  საქართველოს სავაჭრო პალატის წარმომადგენელთან ქალაქ გუანჯოუში, ბექა მიქაბერიძესთან გაიმართა.

შეხვედრაზე განიხილეს ეკონომიკური ურთიერთობების გაღრმავების, აფხაზეთიდან დევნილი მეწარმეების ხელშეწყობის, ჩინური ინვესტიციების მოზიდვისა და ერთობლივი საწარმოების შექმნის შესაძლებლობები.

მხარეებმა აღნიშნეს, რომ ქვეყნებს შორის თანამშრომლობა სავაჭრო-ეკონომიკური ურთიერთობის განვითარებასა და მეწარმეების მხარდაჭერას შეუწყობს ხელს.

შეხვედრებში აფხაზეთის ავტონომიური რესპუბლიკის ფინანსთა და ეკონომიკის მინისტრი ლევან თევზაია, მინისტრის მოადგილე გიორგი ჯინჭარაძე, სამინისტროს „ეკონომიკური პროგრამების სააგენტოს“ ხელმძღვანელი ვასილ ბაბუნაშვილი და აფხაზეთის ავტონომიური რესპუბლიკის სავაჭრო პალატის პრეზიდენტი გოგიტა თედორაძე მონაწილეობენ.

ჩინეთში სამუშაო ვიზიტის ფარგლებში დაგეგმილი შეხვედრები საქართველოს ბიზნეს სახლის ხელმძღვანელის ორგანიზებით იმართება.

ბიზნეს სახლის მთავარი მისიაა ახალი აბრეშუმის გზაზე მყოფი ქვეყნები გააერთიანოს ერთი პლატფორმის ქვეშ და მათ შორის განავითაროს სავაჭრო-ბიზნეს ურთიერთობები.