სიახლეები

აფხაზეთის ჯანდაცვის სამინისტროსა და იაპონიის საელჩოს შორის  ხელშეკრულება გაფორმდა, რომელიც თბილისში, კალოუბნის #16-ში მდებარე აფხაზეთიდან იძულებით გადაადგილებულ პირთა სამედიცინო დაწესებულების შენობის რეაბილიტაციას ითვალისწინებს.

ხელმოწერის ცერემონიალს, რომელიც საქართველოში იაპონიის საგანგებო და სრულუფლებიანი ელჩის, მასაიოში კამოჰარას  რეზიდენციაში გაიმართა, აფხაზეთის მთავრობის თავმჯდომარე, გიორგი ბარამია დაესწრო.

აფხაზეთის მთავრობის თავმჯდომარემ  იაპონიის ელჩს თანამშრომლობისათვის მადლობა გადაუხადა.

,,აფხაზეთის მთავრობისათვის ჯანდაცვის სფერო მნიშვნელოვანია, რადგან სწორედ ჯანდაცვა არის ჩვენი ერთ-ერთი პრიორიტეტი. რეაბილიტირებული სამედიცინო დაწესებულება  დევნილ მოსახლეობას კვალიფიციურ კონსულტაციას გაუწევს და მაღალ დონეზე მოემსახურება.  მე კიდევ ერთხელ მინდა გამოვხატო ჩემი პატივისცემა და მადლიერება იაპონიის ხელისუფლების მიმართ,"- განუცხადა ჟურნალისტებს შეხვედრის დასრულების შემდეგ გიორგი ბარამიამ.

იაპონიის მთავრობა ,,გრასრუტისა და ადამიანის უსაფრთხოების პროექტებისთვის საგრანტო დახმარების" ფარგლებში, აფხაზეთიდან იძულებით გადაადგილებულ პირთა სამედიცინო დაწესებულების შენობის რეაბილიტაციას ჩაატარებს, რომელიც თბილისში მცხოვრებ 85 ათასამდე დევნილს მოემსახურება.  პროექტის ღირებულება 102,620 აშშ დოლარს შეადგენს.

სასტუმრო „რედისონ ბლუ ივერიაში" აფხაზეთის განათლებისა და დასაქმების პირველი მასშტაბური ფორუმი გაიხსნება. ფორუმი 18-19 დეკემბერს ჩატარდება. 

ფორუმზე წარმოდგენილი იქნება, უმაღლესი და პროფესიული განათლების, დასაქმებისა და სტაჟირების  უამრავი შესაძლებლობა. დასაქმების მაძიებელთათვის უწყვეტ რეჟიმში ჩატარდება სემინარები თემებზე: „როგორ შევადგინოთ CV და სამოტივაციო წერილი", „როგორ გავიაროთ ინტერვიუ" და „საპრეზენტაციო უნარები".   

ფორუმის მიზანია, დევნილებისათვის უმაღლესი და პროფესიული განათლების, ასევე სხვადასხვა კვალიფიკაციის ასამაღლებელი მოკლე და გრძელვადიან ტრენინგებზე, სტიპენდიებზე, სტუდენტურ სესხებზე, გაცვლით საგანმანათლებლო და პროფესიულ პროგრამებზე  ინფორმაციის მიწოდება, რაც თვის მხრივ ხელს შეუწყობს დევნილთა მოტივაციისა და ქმედითუნარიანობის ამაღლებას, რაც შემდგომში მათ საშუალებას მისცემს საქმიანობის პრიორიტეტებიდან გამომდინარე, მოიძიონ სასურველი ვაკანსია სტაჟირების, დასაქმების ან მოხალისეობის პროგრამის ფარგლებში.

ფორუმის ორგანიზატორები არიან აფხაზეთის მთავრობა, აფხაზეთის განათლებისა და კულტურის სამინისტრო, პარტნიორები კი -„მრავალეროვანი საქართველო დემოკრატიული ღირებულებების განმტკიცებისათვის", მიგრაციის საერთაშორისო ორგანიზაცია (IOM), საგანმანათლებლო ცენტრი „ცოდნა", ასოციაცია „მშვიდობა და განათლება", „კოალიცია სამართლიანობისათვის" და „Helping Hand" .

აფხაზეთის ჯანდაცვის სამინისტროში,  ბარბარობის ბრწყინვალე დღესასწაულთან დაკავშირებით, დევნილი ბვშვებისათვის აქცია მოეწყო. 

აფხაზეთის მთავრობის თავმჯდომარის მეუღლემ, ქეთევან კაჭარავამ და აფხაზეთის ჯანდაცვის მინისტრმა, ლექსო ლაგვილავამ 76 დევნილ ბავშვს  ბარბარობის  დღესასწაული მიულოცეს და საჩუქრები გადასცეს.

აფხაზეთის ჯანდაცვის სამინისტროსა და მის პარტნიორ კომპანიებს - "ჰუმანა-ჯორჯია", "დიპლომატ ჯორჯია პამპერსი", სათამაშოების მაღაზიათა ქსელი "ჭიტა", კომპანია " ბაგი" და ბავშვთა გასართობი ცენტრები  "ბასტი ბუბუ" და "ბაობაბ"- ს  შორის თანამშრომლობის მემორანდუმი გაფორმდა, რომელიც მომავლში მსგავსი აქციების გამართვას ითავლისწინებს.

დევნილ ბავშვებს, ბარბარობის  ბრწყინვალე დღესასწაული  საპატრიარქოს წარმომაგდენლებმაც მიულოცეს და საჩუქრად ხატები გადასცეს.

აფხაზეთის მთავრობის თავმჯდომარე, გიორგი ბარამია ჟენევის მოლაპარაკებათა მე-14 რაუნდში მიიღებს მონაწილეობას.

მოლაპარაკებებზე განხილული იქნება უსაფრთხოებისა და დევნილთა დაბრუნების თემატიკა. საქართველოს ტერიტორიაზე მომხდარი აფეთქებებისა და ოკუპირებულ ტერიტორიებზე ქართული კულტურული მემკვიდრეობის ძეგლების ხელყოფის საკითხები.

აფხაზეთის მთავრობის თავმჯდომარის განცხადებით, ბოლო პერიოდში, საქართველოში  განვითარებული მოვლენების ფონზე, საერთაშორისო თანამეგობრობის მხარდაჭერა ნათლად გამოიკვეთა .

„ქართულ მხარეს საკმარისი არგუმენტები გააჩნია იმისათვის,რომ მოლაპარაკებების პროცესში უფრო პრინციპულად დააყენოს ყველა ის მნიშვნელოვანი საკითხი, რომელიც უსაფრთხოებისა და დევნილთა უპირობო დაბრუნების თემატიკას შეეხება," - განუცხადა ჟურნალისტებს ჟენევაში გამგზავრებამდე  გიორგი ბარამიამ.

ეს არის მოლაპარაკებების პირველი რაუნდი მას შემდეგ, რაც საქართველოს პრეზიდენტი ევროპარლამენტში სამშვიდობო ინიციატივით გამოვიდა.
ქართულ დელეგაციას უშიშროების საბჭოს მდივანი გიგა ბოკერია ხელმძღვანელობს.

აფხაზეთის მთავრობის თავმჯდომარე, გიორგი ბარამია  მუხიანში 174-ე ბაგა-ბაღში კომპაქტურად ჩასახლებულ დევნილთა სოციალურ მდგომარეობას გაეცნო და სამედიცინო-პროფილაქტიკურ გამოკვლევებს დაესწრო.

გიორგი ბარამიას განცხადებით, ეს არაა ერთჯერადი აქცია და აფხაზეთის მთავრობა მზადაა, რომ მსგავსი პროექტები  დევნილთა კომპაქტურად ჩასახლების სხვა ობიექტებშიც განახორციელოს.

,,აფხაზეთის მთავრობამ, შიდა ეკონომიის საფუძველზე, აფხაზეთის ჯანდაცვის სამინისტროს დამატებით გამოუყო დაფინანსება. ანალოგიური პროექტის ფარგლებში, დევნილებისათვის სამედიცინო-პროფილაქტიკური გასინჯვები სხვა კომპაქტურად ჩასახლების ობიექტებშიც ჩატარდება," - განაცხადა აფხაზეთის მთავრობის თავმჯდომარემ.

მაღალკვალიფიციური ექიმებით დაკომპლექტებული ჯგუფი, სამედიცინო გამოკვლევებს მთელი დღის განმავლობაში ატარებდა.

აღნიშნულ ობიექტში 35-მდე აფხაზეთიდან დევნილი ოჯახია ჩასახლებული. 

აფხაზეთის  მთავრობის თავმჯდომარე, გიორგი ბარამია გალის რ-ში სოფელ ფიჩორში რუსული  სამხედრო ბაზის გახსნას გამოეხმაურა. გიორგი ბარამიას განცხადებით, საოკუპაციო ხაზთან ახლოს რუსეთის უშიშროების სამსახურის სასაზღვრო ძალების სამხედრო ქალაქის გახსნით, კრემლი ცდილობს ხაზი გაუსვას, რომ აფხაზეთის ტერიტორია რუსეთს ეკუთვნის და არა საქართველოს.

„გალის რაიონში მდებარე 6  რუსული სამხედრო ბაზიდან, ფიჩორის სამხედრო ბაზას განსაკუთრებული დანიშნულება აქვს. რადგან, სწორედ აქედან ხდება რეგიონში განთავსებული  სხვა ბაზების კოორდინაცია,  ამ პუნქტიდან იმართება ის დესტრუქციული, ანტისახელმწიფოებრივი ქმედებები, რომელსაც რუსეთი საქართველოს წინააღმდეგ მიმართავს,"- განაცხადა  გიორგი ბარამაიამ.

აფხაზეთის მთავრობის თავმჯდომარის განცხადებით, ოკუპანტების ჩანაფიქრი ფიჩორის სამხედრო ბაზიდან საზღვაო აკვატორიისა და სახმელეთო  საზღვრის  მთელი პერიმეტრის,  მათ შორის ენგურზე  არსებული ყველა გადასასვლელის გაკონტროლებაა.

„ფაქტიურად,  კრემლის მომდევნო ნაბიჯი  რუსეთ-საქართველოს  საზღვრის ფსოუდან  ენგურზე გადმოტანა იქნება.  რაც კიდევ უფრო გაართულებს ადმინისტარციულ საზღვარზე გალის რაიონის მოსახლეობის გადაადგილებას.

ბოლო პერიოდში განსაკუთრებით  ინტენსიურად მიმდინარეობს რეგიონის მილიტარიზაცია. რუსეთის მიზანია ოკუპირებული გალის ტერიტორიის სამხედრო დასახლებად გადაქცევა. დაგეგმილია  რუსი ოფიცრების ოჯახის წევრების ჩამოსახლება,  რაც იმის თქმის საფუძველს გვაძლევს, რომ მოკლე ხანში რუსეთმა შეიძლება განცხადებაც კი გააკეთოს გალის რაიონის საოკუპაციო ხაზზე საერთაშორისო ნორმების დარღვევით ცალმხრივი სავიზო რეჟიმის შემოღების შესახებ," - განაცხადა აფხაზეთის მთავრობის თავმჯდომარემ.

აფხაზეთის ავტონომიური რესპუბლიკის მთავრობის თავმჯდომარემ, გიორგი ბარამიამ, ფოტოგამოფენა - "სამშობლოსათვის მარადისობაში"  გახსნა.

ფოტოგამოფენა, საქართველოს ეროვნული არქივის საგამოფენო დარბაზში, აფხაზეთის ავტონომიური რესპუბლიკის იუსტიციის დეპარტამენტის არქივისა და საინფორმაციო განყოფილებების ორგანიზებით  მოეწყო.

„ღონისძიების მთავარი თემა, აფხაზეთის ომში გმირულად დაღუპული მეომრების დოკუმენტური ფონდის დაფუძნებაა. ფონდის შექმნას მიეძღვნა დღევანდელი დღე , სადაც  უკვე 200-ზე მეტი საქმეა შესული. ამ არქივის დაკომპლექტება დღესაც გრძელდება," -  განაცხადა გიორგი ბარამიამ.

გამოფენაზე მეომართა საქმეებისა და ფოტოების გარდა წარმოდგენილიყო ფოტოხელოვან, იური მეჩითოვის მიერ გადაღებული სოხუმის ფოტოები, აფხაზეთის ომში გმირულად დაღუპული, ვახტანგ თედიაშვილის ფერწერული ნამუშევრები. გამოფენაზე ასევე წარმოგენილი იყო ომში დაღუპული მეომართა სიები.

აფხაზეთის ავტონომიური რესპუბლიკის მთავრობის თავმჯდომარე, გიორგი ბარამია იტალიის ქ. პიზის მუნიციპალიტეტის მედია-დაგეგმარების, ბიზნეს კომუნიკაციების, ტურიზმისა და კულტურული პროგრამების დეპარტამენტის წარმომადგენელს, კლაუდიო ჩერაის შეხვდა. შეხვედრაზე მხარეებმა განათლებისა და კულტურის, ბიზნესის ხელშეწყობის, მშვიდობის ბანაკის ორგანიზებისა და იტალიაში აფხაზეთის კულტურული დღეების გამართვის საკითხები განიხილეს. შეხვედრა იტალიური მხარის ინიციატივით გაიმართა და გაცნობით ხასიათს ატარებდა. "ეს პირველი შეხვრდრაა ქალაქ პიზის მუნიციპალიტეტის წარმომადგენლებთან, რომელიც იტალიაში საქართველოს კულტურის წარმოჩენასა და ახალგაზრდებისათვის საგანმანათლებლო პროექტების განხორციელებას უკავშირდება. საკმაოდ საინტერესო წინადადებები შემოგვთავაზა იტალიის დელეგაციამ. ჩვენ მზად ვარ ვითანამშრომლოთ ყველა ევროპული ქვეყნის მუნიციპალიტეტის წარმომადგენლებთან. მათ მიერ შემოთავაზებული ნებისმიერი წინადადება, რომელიც დევნილი მოსახლეობის კეთილდღეობას წაადგება, ჩვენთვის მნიშვნელოვანი და საინტერესოა," - განაცხადა აფხაზეთის მთავრობის თავმჯდომარემ.

ამერიკის შეერთებილ შტატებში ოფიციალური ვიზიტის ფარგლებში, აფხაზეთის მთავრობის თავმჯდომარე გიორგი ბარამია, ნიუ-იორკში საქრთველოს საკონსულოში აფხაზეთიდან დევნილებს შეხვდა. შეხვედრას ნიუ-იორკში საქართველოს გენერალური კონსული, ირაკლი ჟორდანია ესწრებოდა. აფხაზეთის მთავრობის თავმჯდომარემ დევნილებთან ერთად ხელი მოაწერა გრაგნილს, რომელიც ცივილიზებული სამყაროს მიმართ აფხაზეთიდან და სამხრეთ ოსეთიდან დევნილი მოსახლეობის მიმართვას ასახავს. გრაგნილი რამდენიმე დღეში გაერთიანებული ერების ორგანიზაციას გადაეცემა.

„ჩვენი შეხვედრის მიზანია დევნილების ჩართვა ყველა პროცესში. მოხარული ვარ, რომ მათთან ერთად მივიღე ამ აქციაში მონაწილეობა. ეს კიდევ ერთი მესიჯია, რათა საერთაშორისო საზოგადოებამ ნათლად დაინახოს ის დესტრუქციული ქმედება, რასაც რუსეთი საქართველოს ოკუპირებულ ტერიტორიებზე ახორცილებს,"- განაცხადა გიორგი ბარამიამ.

ოფიციალური ვიზიტის ფარგლებში, მთავრობის თავმჯდომარე ნებრასკას შტატის ვიცე-გუბერნატორს რიკი შიჰის შეხვდა. შეხვედრისას მხარეება განიხილეს ოკუპირებული აფხაზეთის ტერიტორიაზე არსებული მძიმე ვითარება. ასევე, აშშ-ში შეხვედრის ფარგლებში გიორგი ბარამიამ  და სამხრეთ-აღმოსავლეთის საზოგადოებრივი კოლეჯის „ბიატრისის სტუდენტური დაწესებულების" პრეზიდენტმა, დევნილებისათვის გაცვლითი პროგრამების საკითხი განიხილეს. აფხაზეთის მთავრობის დელეგაციამ შეხვედრა გამართა ამერიკელ მილიარდელ ტონი დუნკანთანაც, რომელმაც საინვესტიციო გარემოს შესწავლის მიზნით საქართველშო ჩამოსვლის სურვილი გამოთქვა.

აფხაზეთის ავტონომიური რესპუბლიკის მთავრობა ღრმა მწუხარებას გამოთქვამს აფხაზეთიდან დევნილი, ნანა ფიფიას გარდაცვალების გამო და უსამძიმრებს გარდაცვლილის ოჯახს.

ნანა ფიფიას ოჯახს, არსებული პრობლემის გარკვევის შემდეგ ერთჯერადი დახმარება გადაეცა. ამასთანავე სტაციონალური მკურნალობის პერიოდში აფხაზეთის ჯანდაცვის სამინისტროს ექიმთა ჯგუფი პაციენტის მდგომარეობას მორიგეობით აკონტროლებდა.

აფხაზეთის მთავრობა  ნანა ფიფიას ოჯახს კომპეტენციისა და შესაძლებლობის ფარგლებში მომავალშიც დაეხმარება.

ამერიკის შეერთებულ შტატებში ოფიციალური ვიზიტის ფარგლებში აფხაზეთის ავტონომიური რესპუბლიკის მთავრობის თავმჯდომარე, გიორგი ბარამია, აშშ-ის ნებრასკის შტატის ვიცე-გუბერნატორს, რიკ შიჰის შეხვდა. გიორგი ბარამია ვიცე-გუბერნატორს საქართველოს ოკუპირებულ ტერიტორიებზე არსებულ ვითარებაზე და ადამიანის უფლებების დარღვევის ფაქტებზე ესაუბრა.

შეხვედრაზე  მთავრობის თავმჯდომარემ, ყურადღება გაამახვილა კონფლიქტების მშვიდობიანი გზით მოგვარებაზე, ამ პროცესში სახალხო დიპლომატიის როლსა და ოკუპირებული ტერიტორიების მიმართ სახელმწიფო სტრატეგიაზე. ვიცე-გუბერნატორთან შეხვედრისას, აფხაზეთის ავტონომიური რესპუბლიკის მთავრობის დელეგაციამ, საქართველოში ეკონომიკური განვითარების შესაძლებლობებზე არსებულ საინვესტიციო გარემოზე და ამ მიმართულებით სამომავლო თანამშრომლობაზე იმსჯელეს.

შეხვედრას აფხაზეთის განათლებისა და კულტურის მინისტრი, დალი ხომერიკი და აფხაზეთის ეკონომიკის მინისტრი ნუგზარ სექანია ესწრებოდნენ.

აფხაზეთის მთავრობა ღრმა მწუხარებას გამოთქვამს, საქართველოს პარლამენტის წევრის, ადამიანის უფლებათა დაცვისა და სამოქალაქო ინტეგრაციის თავმჯდომარის გია არსენიშვილის გარდაცვალების გამო და სამძიმარს უცხადებს გარდაცვლილის ოჯახს. ბატონი გიას სახით საქართველომ დაკარგი კარგი მამულიშვილი, ბრწყინვალე მეცნიერი და საკუთარი ქვეყნის პატრიოტი პიროვნება.

აფხაზეთის ავტონომიური რესპუბლიკის მთავრობის დელეგაცია, რომელსაც მთავრობის თავმჯდომარე გიორგი ბარამია ხელმძღვანელობს, ოფიციალური ვიზიტით ამერიკის შეერთებულ შტატებში იმყოფება. დელეგაციაში ასევე შედიან აფხაზეთის განათლებისა და კულტურის მინისტრი დალი ხომერიკი და აფხაზეთის ეკონომიკის მინისტრი ნუგზარ სექანია.

ვიზიტის ფარგლებში დაგეგმილია შეხვედრები  სამხრეთ-აღმოსავლეთის საზოგადოებრივი კოლეჯის პრეზიდენტ დოქტორ ჯეკ ჰუკთან, ნებრასკის ვიცე-გუბერნატორ რიკ შიჰისთან და ნებრასკის ეკონომიკური განვითარების დეპარტამენტის დირექტორთან რიჩარდ ბაიერთან.

ქართული სამთავრობო დელეგაცია  სამხრეთ-აღმოსავლეთის საზოგადოებრივი კოლეჯის პრეზიდენტთან შეხვედრისას „სამშვიდობო განათლების" საზაფხულო ბანაკის ორგანიზებასთან დაკავშირებულ საკითხს განიხილავს, რომელიც სავარაუდოდ  2011 წელს  ბეატრისის სტუდენტურ დაწესებულებაში მოეწყობა.

შეხვედრისას  მხარეები  სამხრეთ-აღმოსავლეთის საზოგადოებრივი კოლეჯისა და საქართველოს შესახებ ისაუბრებენ. ასევე  განიხილავენ საქართველოს ნებრასკითა და სამხრეთ-აღმოსავლეთის საზოგადოებრივი კოლეჯით დაინტერესების საკითხსა და ეკონომიკური განვითარების შესაძლებლობებს საქართველოში.

მოეწყობა ტური „სამხრეთ-აღმოსავლეთის საზოგადოებრივი კოლეჯის" ბეატრისის სტუდენტურ დაწესებულებაში, რის შემდეგაც იგეგმება ქართული დელეგაციის ვიზიტი ლინკოლნის სტუდენტურ დაწესებულებაში. „ლინკოლნის ნებრასკის უნივერსიტეტის" დოქტორის დელ ჰარნიშის ორგანიზებით, ასევე მოეწყობა ტური აღმოსავლეთის სტუდენტურ დაწესებულებაში.

20 ნოემბერს ქართული დელეგაცია  ჰუმანიტარულ აქციაში მიიღებს მონაწილეობას , რომელიც ლინკოლნში მცხოვრები დაბალი შემოსავლების მქონე ოჯახებისთვის „სოციალურად დაუცველი პირების ცენტრი"-ში  გაიმართება.

14 ნოემბერს, აფხაზეთის ავტონომიური რესპუბლიკის მთავრობის ორგანიზებით, ეთნოგრაფიულ მუზეუმში სახალხო ზეიმი „აფხაზეთობა 2010" გაიმართა.  ჩატარდა კულტურული და საგანმანათლებლო ღონისძიებები, რომელშიც მონაწილეობა მიიღეს აფხაზეთის სიმღერისა და ცეკვის სახელმწიფო ანსამბლმა, აფხაზეთის ახალგარზდულმა კაპელამ, აფხაზეთის შემოქმედებითმა ჯგუფებმა, ბავშვთა ანსამბლებმა და ცნობილმა ქართველმა მომღერლებმა.

აფხაზეთის განათლებისა და კულტურის სამინისტროს ორგანიზებით, აფხაზეთიდან დევნილი მხატვრების ნამუშევრების, მოზარდების ხეალნაკეთი ნივთებისა და წიგნების გამოფენა მოეწყო, რის შემდეგაც რუსთაველის სახელმწიფო დრამატული თეატრის მცირე დარბაზში,  ჩრდილების სახელმწიფო თეატრმა სპექტაკლი „აფხაზეთი - წელიწადის ოთხი დრო" წარმოადგინა.

13:00 საათზე კი მუზეუმის ამფითეატრში, აფხაზეთის მოზარდ მაყურებელთა თეატრმა სპექტაკლის „გამარჯობა სოხუმო" ჩვენება გამართა.

არასამთავრობო ორგანიზაციამ ,,კოალიცია სამართლიანობისათვის"პროექტის - "მეხსიერების ბიბლიოთეკა" ფარგლებში ექსპონატების გამოფენა მოაწყო.

14:00 საათზე, ეთნოგრაფიულ მუზეუმში ქართულ-აფხაზური ტრადიციული ქორწილი გაიმართა. ქორწილი აფხაზური ტრადიციით ჩატარდა. პატარძალი ეთნოგრაფიული მუზეუმის ტერიტორიაზე მდებარე სენაკური ოდიდან გამოიყვანეს. მას ეზოში აფხაზური სიმღერითა და ცეკვით შეხვდნენ, რომელიც აფხაზეთის სიმღერისა და ცეკვის სახელმწიფო ანსამბლის წევრებმა შეასრულეს. სახალხო ზეიმი „აფხაზეთობა 2010" 16:00 საათზე, გალა კონცერტით დასრულდა.

სახალხო დღესასწაულს, აფხაზეთის მთავრობის თავმჯდომარე, აფხაზეთის მთავრობის წარმომადგენლები, საქართველოს პარლამენტის წევრები და საზოგადოების ცნობილი სახეები ესწრებოდნენ. „აფხაზეთობა" აფხაზეთის მთავრობის ინიციატივით 2009 წლიდან იმართება.

12 ნოემბერს, აფხაზეთის მთავრობის თავმჯდომარის, გიორგი ბარამიას ინიციატივით, შეზღუდული შესაძლებლობის მქონე აფხაზეთიდან დევნილ, ვლადიმერ ფანჩულიძეს საჩუქრად პერსონალური კომპიუტერი გადაეცა.

ვლადიმერ ფანჩულიძე აფხაზეთის მთავრობის ეკონომიკის მინისტრმა  ნუგზარ სექანიამ მოინახულა და აფხაზეთის მთავრობის თავმჯდომარის საჩუქარი პირადად გადასცა. 

ვლადიმერ ფანჩულიძე დევნილობის შემდეგ ქ. სენაკში ნათესავებთან ცხოვრობს.  ის 3 წლიდან ინვალიდის ეტლსაა მიჯაჭვული და დამოუკიდებლად გადაადგილებას ვერ ახერხებს.