აფხაზეთის ავტონომიური რესპუბლიკის განათლებისა და კულტურის მინისტრის პირველმა მოადგილემ, გური ბაქრაძემ, დასავლეთ საქართველოს ტერიტორიაზე არსებული აფხაზეთის საჯარო სკოლები მოინახულა.

მინისტრის პირველი მოადგილე ქუთაისში მდებარე აფხაზეთის N5 და ჟიული შარტავას სახელობის N6 საჯარო სკოლებს, ასევე სენაკში თემურ ბოკუჩავას სახელობის აფხაზეთის N7 საჯარო სკოლასა და ჩხოროწყუში არსებულ აფხაზეთის N10 საჯარო სკოლას, სამინისტროს განათლებისა და საგანმანათლებლო პროგრამების დეპარტამენტის წარმომადგენლებთან ერთად ეწვია.

ვიზიტის ფარგლებში, მინისტრის პირველი მოადგილე ადგილზე გაეცნო სასწავლო პროცესს, დაათვალიერა სკოლების ინფრასტრუქტურა და სასწავლო გარემო. სამინისტროს წარმომადგენლებმა სკოლების ადმინისტრაციული პერსონალისგან, მასწავლებლებისა და მოსწავლეებისაგან ინფორმაცია მოისმინეს მათი საჭიროებების შესახებ და, სასწავლო პროცესის გაუმჯობესებასთან დაკავშირებით, მოსაზრებები გაიზიარეს.

აფხაზეთის ავტონომიური რესპუბლიკის განათლებისა და კულტურის სამინისტროს დაქვემდებარებაში არსებული 13 საჯარო სკოლა, საქართველოს სხვადასხვა რეგიონშია განაწილებული. აფხაზეთის საჯარო სკოლებში 2 351 მოსწავლე ირიცხება და 312 მასწავლებელია დასაქმებული.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, ბერლინის კონცერტჰაუსში, აფხაზეთის სიმღერის სახელმწიფო ანსამბლ „შავნაბადას“ კონცერტს დაესწრო.

მთავრობის თავმჯდომარემ, ქართულ-აფხაზურ ისტორიულ კავშირებსა და უნიკალურ ტრადიციებზე, ასევე შერიგების პროცესში კულტურული დიპლომატიის განსაკუთრებულ მნიშვნელობაზე ისაუბრა.

„განსაკუთრებული და ემოციებით დატვირთული ბრწყინვალე საღამო იყო, რომელმაც ნამდვილი აღფრთოვანება გამოიწვია. დღეს კიდევ ერთხელ გაჟღერდა ჩვენი ქართული კულტურა ევროპის შუაგულში და ასევე ის, რომ აფხაზეთი არის და ყოველთვის იქნება საქართველოს განუყოფელი ნაწილი. წარმატებები მინდა ვუსურვო ანსამბლ „შავნაბადას“. ჩვენ კვლავ გავაგრძელებთ კულტურული ინიციატივების ხელშეწყობას და ჩვენი ანსამბლების მხარდაჭერას. ღონისძიების მხარდაჭერისთვის განსაკუთრებული მადლობა მინდა გადავუხადო კულტურის სამინისტროს“, - განაცხადა გიორგი ჯინჭარაძემ.

„შავნაბადა“ გერმანიის ფედერაციულ რესპუბლიკაში მუსიკალურ ფესტივალში მონაწილეობს და ბერლინში, ჰამბურგსა და მიუნხენში კონცერტებს მართავს.

პირველი კონცერტი ანსამბლმა ბერლინში გამართა. მაყურებლის წინაშე „შავნაბადა“ დავით ცინცაძის ხელმძღვანელობით, ახალი მუსიკალური პროგრამით წარდგა. კონცერტზე ქართულ-აფხაზური, ასევე საქართველოს სხვა რეგიონების ტრადიციული, ხალხური მრავალხმიანი ფოლკლორული ნომრები შესრულდა.

კონცერტმა სრული ანშლაგით ჩაიარა და მაყურებლის დიდი მოწონება დაიმსახურა.

„შავნაბადას“ კონცერტს ასევე, აფხაზეთის განათლებისა და კულტურის მინისტრი გიორგი ძაძამია, საქართველოს საგანგებო და სრულუფლებიანი ელჩი გერმანიის ფედერაციულ რესპუბლიკაში ალექსანდრე კარტოზია, ბერლინის ქართული დიასპორის წარმომადგენლები და ადგილობრივები ესწრებოდნენ.

ღონისძიება აფხაზეთის ავტონომიური რესპუბლიკის მთავრობის ორგანიზებით, ასევე, საქართველოს კულტურის სამინისტროსა და საგარეო საქმეთა სამინისტროს მხარდაჭერით განხორციელდა.

აფხაზეთის ავტონომიური რესპუბლიკის განათლებისა და კულტურის სამინისტრო აფხაზეთის თემატიკასთან დაკავშირებული ახალგაზრდული ინიციატივების საპროექტო განაცხადებს არაუმეტეს 20 000 ლარის ფარგლებში დააფინანსებს. 

აღნიშნული პროგრამა ახალგაზრდული ორგანიზაციების ხელშეწყობასა და აფხაზეთიდან დევნილი ახალგაზრდების საზოგადოებრივ ცხოვრებაში ჩართვისა და თვითრეალიზაციის შესაძლებლობების ამაღლებას ისახავს მიზნად.

დაფინანსებას ექვემდებარება საპროექტო განაცხადი შემდეგი მიმართულებებით:

ა) ახალგაზრდების არაფორმალური განათლების, ცნობიერების ამაღლებისა და პიროვნული და პროფესიული უნარების განვითარების ხელშეწყობა;

ბ) ახალგაზრდების სოციალური და სამოქალაქო კომპეტენციების განვითარებისა და პრაქტიკული ინიციატივების განხორციელების ხელშეწყობა;

გ) დროებით ოკუპირებული აფხაზეთისა და საქართველოს კონტროლირებად ტერიტორიებზე მცხოვრები, დევნილი ახალგაზრდების საზოგადოებრივ, სამოქალაქო და მოხალისეობრივ საქმიანობაში ჩართულობის ხელშეწყობა;

დ) ახალგაზრდების საჭიროებებსა და ინტერესებზე მორგებული პროექტებისა და ინიციატივების განხორციელების მხარდაჭერა;

ე) ახალგაზრდულ საკითხებზე მომუშავე არასამეწარმეო (არაკომერციული) იურიდიული პირებისა და საჯარო სამართლის იურიდიული პირების ინსტიტუციური შესაძლებლობებისა და მდგრადობის გაძლიერების ხელშეწყობა;

ვ) ახალგაზრდების თანამშრომლობისა და მონაწილეობისათვის ერთობლივი და მონაწილეობითი პლატფორმებისა და სერვისების შექმნისა და განვითარების ხელშეწყობა.

დაფინანსების მიმღებები არიან საქართველოს კანონმდებლობის შესაბამისად საქართველოს ტერიტორიაზე რეგისტრირებული არასამეწარმეო (არაკომერციული) იურიდიული პირები (ა(ა)იპ) და საჯარო სამართლის იურიდიული პირები (სსიპ), რომელთა საქმიანობა დაკავშირებულია ახალგაზრდულ საკითხებთან.

საპროექტო განაცხადების მიღების ბოლო ვადაა 2026 წლის 20 ნოემბერი.

პროგრამის შესახებ დეტალური ინფორმაცია იხილეთ სამინისტროს ვებგვერდზე. ელექტრონულად განაცხადის შევსება შესაძლებელია აფხაზეთის ავტონომიური რესპუბლიკის მთავრობის ერთიან ელექტრონულ პორტალზე. 

აფხაზეთის ავტონომიური რესპუბლიკის განათლებისა და კულტურის სამინისტროს მიერ გამოცხადებული ლიტერატურული კონკურსის „აფხაზეთი“ ფარგლებში განაცხადების მიღება დაიწყო.

კონკურსი II ეტაპად ჩატარდება და აფხაზეთის თემაზე პროზაული ნაწარმოებების (მოთხრობის, ნოველის ან მინიატურის) შექმნას ითვალისწინებს.

ფინალური ეტაპის დასრულების შემდეგ, გამოვლინდება სამი გამარჯვებული.

კონკურსის გამარჯვებული პირველადგილოსანი საერთაშორისო საზაფხულო სკოლაში გაემგზავრება. მეორე და მესამე ადგილის მფლობელ კონკურსანტებს სპეციალური საჩუქრები გადაეცემათ.

განაცხადები 15 ნოემბრის ჩათვლით მიიღება.

მონაწილეობის პირობები, საჭირო დოკუმენტაციის ჩამონათვალი და კონკურსის დეტალური აღწერა იხილეთ სამინისტროს ვებგვერდზე 

განაცხადები მიიღება ელექტრონულად:

 აფხაზეთის ავტონომიური რესპუბლიკის მთავრობის ერთიან ელექტრონულ პორტალზე

 ან ელექტრონული ფოსტის მეშვეობით: meca@gov.ge

საქართველოს განათლების მეცნიერებისა და ახალგაზრდობის სამინისტროს ორგანიზებით, მასწავლებლის ეროვნული პრემიის დაჯილდოების საზეიმო ცერემონია გაიმართა.

ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე და განათლებისა და კულტურის მინისტრი გიორგი ძაძამია, პირველ მოადგილე გური ბაქრაძესთან ერთად ესწრებოდნენ.

დაჯილდოების ცერემონიაზე საზოგადოებას სიტყვით მიმართეს და მასწავლებლებს პროფესიული დღე მიულოცეს საქართველოს პრეზიდენტმა, მიხეილ ყაველაშვილმა, პრემიერ-მინისტრმა, ირაკლი კობახიძემ, პარლამენტის თავმჯდომარე შალვა პაპუაშვილმა და განათლების, მეცნიერებისა და ახალგაზრდობის მინისტრმა, გივი მიქანაძემ. მათ პედაგოგებს მომავალი თაობების აღზრდასა და განათლებაში შეტანილი ფასდაუდებელი წვლილისთვის მადლობა გადაუხადეს.

საზოგადოებისა და განათლების სისტემის განვითარებაში შეტანილი განსაკუთრებული წვლილისთვის საქართველოს განათლების, მეცნიერებისა და ახალგაზრდობის სამინისტრომ 10 ღვაწლმოსილი პედაგოგი გამოავლინა და მასწავლებლის ეროვნულ პრემიასთან ერთად, 10 000 ლარით დააჯილდოვა.

გამარჯვებულ მასწავლებლებს შორის იყო აფხაზეთის მე-5 საჯარო სკოლის ინგლისური ენის პედაგოგი რუსუდან ლომთაძე. აფხაზეთიდან დევნილი მასწავლებელი მოსწავლეზე ორიენტირებული სწავლების მეთოდებითა და მათი იდეების ხელშეწყობით გამოირჩევა. სწავლების პროცესში აქტიურად იყენებს არაფორმალურ განათლებას, ხელმძღვანელობს მედიაწიგნიერების, დებატების, მეტყველებისა და მკითხველთა კლუბებს. 2024 წელს იგი აფხაზეთის საჯარო სკოლების წლის საუკეთესო მასწავლებლად დასახელდა.

დაჯილდოების ცერემონიას საქართველოს მთავრობისა და პარლამენტის წევრები, სახელმწიფო რწმუნებულები, აფხაზეთის ავტონომიური რესპუბლიკის მთავრობის წევრები, უმაღლესი საბჭოს თავმჯდომარე ჯემალ გამახარია, დეპუტატები, ადგილობრივი ხელისუფლებისა და საპატრიარქოს წარმომადგენლები ესწრებოდნენ.

მასწავლებლის ეროვნული დღე ყოველწლიურად, 27 ოქტომბერს, ქართველი პედაგოგის, მეცნიერული პედაგოგიკის ფუძემდებლის, პუბლიცისტის, საბავშვო მწერლისა და საზოგადო მოღვაწის, იაკობ გოგებაშვილის დაბადების დღეს აღინიშნება.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრომ დევნილ მოქალაქეებს მხედველობის ლაზერული კორექცია სრულად დაუფინანსა. ბენეფიციარებს ოპერაცია კლინიკა „ახალ მზერაში“ პროფესორმა მერაბ დვალმა ჩაუტარა.

მხედველობის ლაზერული კორექციის მიმდინარეობის პროცესს აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ბესიკ კუსიდი გაეცნო და ბენეფიციარებისთვის გაწეული სამედიცინო მომსახურების შესახებ ინფორმაცია მიიღო. მისი თქმით, სამინისტროს ერთ-ერთი მიზანი, აფხაზეთიდან დევნილებისთვის მაღალი ხარისხის ოფთალმოლოგიურ სერვისებზე ხელმისაწვდომობის გაზრდაა.

„ჩვენი უწყებისთვის მნიშვნელოვანია, აფხაზეთიდან დევნილ მოქალაქეებს მაღალი ხარისხის ოფთალმოლოგიურ სერვისებზე მუდმივი წვდომა ჰქონდეთ. მხედველობის ლაზერული კორექციის სრულად დაფინანსებით ვცდილობთ, შევამციროთ ფინანსური ბარიერი და დევნილებს ჯანმრთელობაზე ზრუნვის შესაძლებლობა გავუზარდოთ. ჩვენთვის პრიორიტეტულია, რომ პროგრამები ბენეფიციარების რეალურ საჭიროებებს პასუხობდეს“, - განაცხადა ბესიკ კუსიდმა.

აღსანიშნავია, რომ პროგრამის „მხედველობის დაავადებათა დიაგნოსტიკისა და მკურნალობის მომსახურება“ ფარგლებში, 18-დან 40 წლამდე აფხაზეთიდან დევნილებისთვის კლინიკა „ახალ მზერაში“ მხედველობის საშუალო და მაღალი ხარისხის რეფრაქციული ანომალიების ექსიმერული ლაზერით კორექციაა შესაძლებელი. თანამედროვე ოფთალმოლოგიური მეთოდი ახლომხედველობის, შორსმხედველობისა და ასტიგმატიზმის საკორექციოდ გამოიყენება.

პროგრამის ფარგლებში, მომსახურების სრული დაფინანსება მოიცავს არა მხოლოდ მხედველობის ლაზერულ კორექციას, არამედ ექიმ-სპეციალისტის კონსულტაციასა და აუცილებელ წინასაოპერაციო კვლევებს.

2026 წლის 26 ოქტომბერს, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე საგარეო საქმეთა სამინისტროში ჟენევის საერთაშორისო მოლაპარაკებების 68-ე რაუნდის მოსამზადებელ შეხვედრაში მიიღო მონაწილეობა.

საქართველოს მხრიდან შეხვედრას ხელმძღვანელობდა საგარეო საქმეთა მინისტრის მოადგილე და ჟენევის საერთაშორისო მოლაპარაკებებში (GID) საქართველოს დელეგაციის ხელმძღვანელი, ლაშა დარსალია. საგარეო საქმეთა სამინისტროს მიერ ორგანიზებულ შეხვედრაში მონაწილეობა მიიღეს ევროკავშირის, ეუთოსა და გაეროს თანათავმჯდომარეებმა და დელეგაციამ.

შეხვედრაზე ქართულმა მხარემ განსაკუთრებული ყურადღება გაამახვილა საქართველოს ოკუპირებულ რეგიონებსა და საოკუპაციო ხაზის მიმდებარე ტერიტორიებზე უსაფრთხოების, ჰუმანიტარული და ადამიანის უფლებების კუთხით არსებულ გამოწვევებზე. განხილული იქნა რუსეთის ფედერაციის მიერ საქართველოს ოკუპირებული რეგიონების უკანონო ანექსიისკენ მიმართული ქმედებები, რომლებიც ეწინააღმდეგება საერთაშორისო სამართლის ფუნდამენტურ პრინციპებს.

შეხვედრაზე, ასევე, ხაზი გაესვა მოლაპარაკებების ფორმატის ეფექტიანობის უზრუნველყოფისა და არსებით საკითხებზე კონკრეტული პროგრესის მიღწევის აუცილებლობას.

ამ კონტექსტში განსაკუთრებული ყურადღება გამახვილდა რუსეთის ფედერაციის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით გათვალისწინებული საერთაშორისო ვალდებულებების შესრულებაზე, აგრეთვე იძულებით გადაადგილებულ პირთა და ლტოლვილთა საკუთარ საცხოვრებელ ადგილებში უსაფრთხო და ღირსეული დაბრუნების საკითხზე.

ჟენევის საერთაშორისო მოლაპარაკებების 68-ე რაუნდი 2026 წლის 10-11 ნოემბერს გაიმართება.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია და აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე ნოდარ დუმბაძის სახელობის მოზარდ მაყურებელთა თეატრში სპექტაკლს „დევნილთა უღელტეხილი“ დაესწრნენ.

ნიკოლოზ რობაქიძის პიესა გურამ ოდიშარიას ამავე სახელწოდების მოთხრობითაა შთაგონებული და დევნილობის მძიმე გამოცდილებას, მშობლიურ სახლთან განშორებას, ომის ტრაგედიასა და დაბრუნების იმედს ასახავს.

წარმოდგენას აფხაზეთის ავტონომიური რესპუბლიკის მთავრობის წევრები, მწერალი გურამ ოდიშარია, კულტურის სფეროს წარმომადგენლები და სხვა მოწვეული სტუმრები ესწრებოდნენ.

სპექტაკლი ფესტივალის „ციფრული სოხუმი“ ფარგლებში დაიდგა.