აფხაზეთის ავტონომიური რესპუბლიკის მთავრობა

იუსტიციისა და სამოქალაქო ინტეგრაციის სამინისტრო

2026-09-05

აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის სამინისტროს მიერ გამოცხადებული კონკურსის „სამოქალაქო ინტეგრაციის მხარდაჭერა” ფარგლებში 9 გამარჯვებული პროექტი გამოვლინდა.

საკონკურსო კომისიამ, დასკვნით სხდომაზე, წარმოდგენილი 25 განაცხადების განხილვის პროცესი დაასრულა და საბოლოო გადაწყვეტილება მიიღო. პროცესი რამდენიმე ეტაპად წარიმართა და წარმოდგენილი პროექტების განხილვასა და შერჩეულ კანდიდატებთან გასაუბრებას მოიცავდა.

კონკურსის მიზანია აფხაზეთის კონფლიქტის შედეგად არსებული სოციალური, კულტურული და ჰუმანიტარული გამოწვევების საპასუხოდ საზოგადოებრივი ჩართულობის გაზრდა, ერთობლივი ინიციატივების მხარდაჭერა და გაყოფილ საზოგადოებებს შორის ნდობის აღდგენის ხელშეწყობა.

გამარჯვებული პროექტები სამოქალაქო ინტეგრაციის, ახალგაზრდების ჩართულობის, დიალოგისა და ნდობის აღდგენის მიმართულებით კონკრეტული ინიციატივების განხორციელებას შეუწყობს ხელს.

იუსტიციისა და სამოქალაქო ინტეგრაციის სამინისტრო

2026-08-07

აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის სამინისტროსა და დევნილთა, ეკომიგრანტთა და საარსებო წყაროებით უზრუნველყოფის სააგენტოს შორის ურთიერთთანამშრომლობის მემორანდუმი გაფორმდა.

მემორანდუმს ხელი აფხაზეთის იუსტიციისა და სამოქალაქო ინტეგრაციის მინისტრმა ალიონა ჩხოტუამ და დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორმა დავით კაიკაციშვილმა მოაწერეს.

მემორანდუმი სამშვიდობო ინიციატივების და სამოქალაქო ინტეგრაცის მიმართულებით ურთიერთთანამშრომლობის გაღრმავებას ითვალისწინებს და მიზნად ისახავს სახელმწიფო სერვისებზე ხელმისაწვდომობის გაუმჯობესებას, დევნილ საზოგადოებასთან ეფექტური კომუნიკაციის გაძლიერებასა და სამოქალაქო ინტეგრაციის პროცესის კიდევ უფრო ეფექტიანად წარმართვას.

იუსტიციისა და სამოქალაქო ინტეგრაციის სამინისტრო

2026-08-06

აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის სამინისტროს მიერ გამოცხადებული კონკურსის „სამოქალაქო ინტეგრაციის მხარდაჭერა“ ფარგლებში საკონკურსო კომისიამ დაიწყო მუშაობა.

კომისიის წევრებმა, პირველ სხდომაზე განიხილეს კომისიის მუშაობის წესი. ასევე, კომისია გაეცნო კონკურსის ფარგლებში შემოსულ განაცხადებს. სულ შემოსულია 25 განაცხადი. კომისიის შემდგომი საქმიანობა მოიცავს კომისიის მიერ შერჩეულ კანდიდატებთან გასაუბრებას.

კონკურსი მიზნად ისახავს აფხაზეთის კონფლიქტის შედეგად არსებული სოციალური, კულტურული და ჰუმანიტარული გამოწვევების საპასუხოდ საზოგადოების, მათ შორის ახალგაზრდების, ჩართულობის გაზრდას, ერთობლივი ინიციატივების მხარდაჭერასა და გაყოფილ საზოგადოებებს შორის ნდობის აღდგენის ხელშეწყობას.

იუსტიციისა და სამოქალაქო ინტეგრაციის სამინისტრო

2026-07-30

აფხაზეთის ა/რ იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის ა/რ ჯანმრთელობისა და სოციალური დაცვის მინისტრ ბესიკ კუსიდისთან ერთად, ბერი ანდრიას სახელობის საქველმოქმედო ფონდის 15 წლის იუბილესადმი მიძღვნილ საღამოს დაესწრო.

ღონისძიება „ბედნიერ სახლში“ გაიმართა და ფონდის 15-წლიან საქმიანობას მიეძღვნა. საღამოს ფარგლებში ფონდის შვილობილების მონაწილეობით გაიმართა სპექტაკლი „ლურჯი ფრინველი“, რომელიც ბერი ანდრიას ჩანახატების მიხედვით დაიდგა.

ღონისძიებას ცენტრალური ხელისუფლების წარმომადგენლები და მოწვეული სტუმრები ესწრებოდნენ.

ბერი ანდრიას სახელობის საქველმოქმედო ფონდი უკვე 15 წელია 18 წლამდე ასაკის სიმსივნით დაავადებულ ბავშვებსა და მათ ოჯახებს ეხმარება. ფონდის საქმიანობა მოიცავს მკურნალობისა და რეაბილიტაციის პროცესში საჭირო მხარდაჭერას, მათ შორის „ბედნიერ სახლში“ ბავშვებისა და მათი ოჯახის წევრების საცხოვრებლით უზრუნველყოფას.

იუსტიციისა და სამოქალაქო ინტეგრაციის სამინისტრო

2026-07-25

აფხაზეთის ა/რ მთავრობის თავმჯდომარე გიორგი ჯინჭარაძე აფხაზეთის ა/რ იუსტიციისა და სამოქალაქო ინტეგრაციის მინისტრ ალიონა ჩხოტუასთან ერთად, ქუთაისის ტექნოლოგიური ჰაბის გახსნის საზეიმო ღონისძიებას დაესწრო.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის მინისტრ ალიონა ჩხოტუასთან და აფხაზეთის ავტონომიური რესპუბლიკის განათლებისა და კულტურის მინისტრ გიორგი ძაძამიასთან ერთად, ქუთაისის ტექნოლოგიური ჰაბის გახსნის საზეიმო ღონისძიებას დაესწრო.

მთავრობის თავმჯდომარემ და მინისტრებმა ტექნოლოგიური ჰაბის ინფრასტრუქტურა დაათვალიერეს და მაღალტექნოლოგიურ ლაბორატორიებს გაეცნენ.

ტექნოლოგიური ჰაბის გახსნის ღონისძიებაზე სიტყვით გამოვიდა საქართველოს პრემიერ-მინისტრი ირაკლი კობახიძე და ეკონომიკისა და მდგრადი განვითარების მინისტრი მარიამ ქვრივიშვილი. ახლად გახსნილი ტექნოლოგიური ჰაბის შესახებ პრეზენტაცია გამართა ინოვაციების და ტექნოლოგიების სააგენტოს თავმჯდომარე ავთანდილ კასრაძემ.

ქუთაისის ტექნოლოგიური ჰაბი საქართველოში ერთ-ერთი ყველაზე მასშტაბური და სტრატეგიული პროექტია ინოვაციებისა და ტექნოლოგიების მიმართულებით. პროექტი მიზნად ისახავს ქვეყნის, როგორც რეგიონული ინოვაციური ცენტრის, პოზიციის გაძლიერებას.

ახალი მრავალფუნქციური სივრცე ერთ ეკოსისტემაში აერთიანებს განათლებას, მეცნიერებას, ინოვაციებს, ტექნოლოგიურ მეწარმეობასა და თანამედროვე კვლევით ინფრასტრუქტურას.

იუსტიციისა და სამოქალაქო ინტეგრაციის სამინისტრო

2026-07-06

ზუგდიდში, ზვიად გამსახურდიას სახელობის საპრეზიდენტო ცენტრში, აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის სამინისტროს პროექტის „საერთო მემკვიდრეობა - საერთო მომავალი“ დასკვნითი ღონისძიება გაიმართა.

ღონისძიებაზე პროექტის მონაწილეებმა ერთი კვირის განმავლობაში მიღებული გამოცდილება პრეზენტაციების სახით წარადგინეს და აფხაზური სიმღერა „აჟლარი“ შეასრულეს.

დასკვნით ღონისძიებამდე მონაწილეები ენგურჰესის თაღოვან კაშხალს ეწვივნენ, სადაც შემეცნებით ტურში მიიღეს მონაწილეობა და ქვეყნის ერთ-ერთი უმნიშვნელოვანესი საინჟინრო ნაგებობის ისტორიისა და მნიშვნელობის შესახებ ინფორმაცია მოისმინეს.

ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ბესიკ კუსიდი, აფხაზეთის ავტონომიური რესპუბლიკის მთავრობის აპარატის უფროსი გიორგი სუთიძე, ხელვაჩაურის მუნიციპალიტეტის სოფელ ფერიის საჯარო სკოლის დირექტორი ლეილა დუმბაძე და სხვა მოწვეული სტუმრები ესწრებოდნენ. მათ მონაწილეებს წარმატებები უსურვეს და პროექტის დასრულება სერტიფიკატების გადაცემით აღნიშნეს.

პროექტი 2-7 ივლისს ქალაქ ზუგდიდში მიმდინარეობდა. მასში აფხაზეთიდან დევნილი 12-16 წლის 30 მოზარდი მონაწილეობდა. მონაწილეებს შორის იყვნენ ხელვაჩაურის მუნიციპალიტეტის სოფელ ფერიის საჯარო სკოლის ეთნიკურად აფხაზი მოსწავლეებიც.

ერთი კვირის განმავლობაში მონაწილეებმა ქართულ-აფხაზური ისტორიული ურთიერთობების, კულტურისა და საერთო მემკვიდრეობის, მულტიკულტურალიზმისა და სამოქალაქო პასუხისმგებლობის საკითხებზე ტრენინგები გაიარეს. პროექტის მიზანი ახალგაზრდებში საერთო კულტურული მემკვიდრეობის შესახებ ცნობიერების ამაღლება, სამოქალაქო ინტეგრაციის ხელშეწყობა და აქტიური სამოქალაქო პასუხისმგებლობის გაძლიერება იყო.

იუსტიციისა და სამოქალაქო ინტეგრაციის სამინისტრო

2026-06-19

აფხაზეთის ა/რ იუსტიციისა და სამოქალაქო ინტეგრაციის მინისტრი და განათლებისა და კულტურის მინისტრი საქართველოს ინოვაციებისა და ტექნოლოგიების სააგენტოს ხელმძღვანელსა და მის მოადგილეს შეხვდნენ.

სამუშაო შეხვედრაზე აფხაზეთიდან დევნილი ახალგაზრდებისთვის ახალი შესაძლებლობების შექმნის საკითხებზე იმსჯელეს. განხილვის მთავარი თემები ტექნოლოგიური განათლება, ინოვაციები, ციფრული უნარების განვითარება და სამოქალაქო ინტეგრაციის ხელშეწყობა იყო.

შეხვედრის ფარგლებში საუბარი შეეხო იმ ერთობლივი პროექტების დაგეგმვასა და განხორციელებას, რომლებიც ახალგაზრდების პროფესიულ განვითარებას, თანამედროვე ტექნოლოგიებზე ხელმისაწვდომობის გაზრდასა და არაფორმალური განათლების გზით ახალი შესაძლებლობების შექმნას შეუწყობს ხელს.

მხარეებმა ახალგაზრდების მხარდაჭერის, მათი პოტენციალის განვითარების და საზოგადოებრივ ცხოვრებაში აქტიური ჩართულობის ხელშეწყობის მიმართულებით თანამშრომლობის გაგრძელების მზადყოფნა გამოთქვეს.

იუსტიციისა და სამოქალაქო ინტეგრაციის სამინისტრო

2026-06-12

აფხაზეთიდან იძულებით გადაადგილებული ახალგაზრდებისთვის ყვარელში გამართული ახალგაზრდული თემატური ბანაკი წარმატებით დასრულდა

ბანაკის დასკვნით დღეს მონაწილეებს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის განათლებისა და კულტურის მინისტრი გიორგი ძაძამია და ახალგაზრდობის სააგენტოს ხელმძღვანელის მოვალეობის შემსრულებელი ანა ბუხრაშვილი შეხვდნენ.

შეხვედრა დისკუსიის ფორმატში წარიმართა. ახალგაზრდებმა საკუთარი მოსაზრებები, გამოცდილება და ინიციატივები გააზიარეს, ხოლო სტუმრებმა მათთვის მნიშვნელოვან საკითხებზე ისაუბრეს და მონაწილეთა შეკითხვებს უპასუხეს.

ოთხდღიანი ბანაკი ახალგაზრდების გაძლიერების, არაფორმალური განათლების ხელშეწყობისა და მათი სამოქალაქო ჩართულობის მხარდაჭერის მიზნით განხორციელდა.

იუსტიციისა და სამოქალაქო ინტეგრაციის სამინისტრო

2026-06-10

აფხაზეთის ავტონომიური რესპუბლიკის უმაღლეს საბჭოში იუსტიციისა და სამოქალაქო ინტეგრაციის მინისტრის, ალიონა ჩხოტუას ინტერპელაცია გაიმართა.

სხდომაზე მინისტრმა უმაღლესი საბჭოს წევრების მიერ წინასწარ დასმულ შეკითხვებს უპასუხა.

ალიონა ჩხოტუამ სამინისტროს მიერ 2025 წელს განხორციელებულ პროგრამებზე, სამოქალაქო ინტეგრაციის მიმართულებით მიღწეულ შედეგებსა და ოკუპირებულ აფხაზეთში ადამიანის უფლებების დაცვის კუთხით არსებულ ვითარებაზე ისაუბრა.

განხილვის ფარგლებში ყურადღება გამახვილდა სახელმწიფო პროგრამების ეფექტიანობაზე, ახალგაზრდული, საგანმანათლებლო და სოციალური პროექტების განხორციელებაზე.

მინისტრმა და უმაღლესი საბჭოს წევრებმა ასევე იმსჯელეს ოკუპირებულ ტერიტორიაზე მცხოვრები მოსახლეობის წინაშე არსებულ გამოწვევებზე.

უმაღლესი საბჭოს თავმჯდომარემ ჯემალ გამახარიამ სამინისტროს საქმიანობა დადებითად შეაფასა და აღნიშნა, რომ უწყება აფხაზეთის საკითხების შესახებ ცნობადობის გაზრდის მიმართულებით მნიშვნელოვან საქმიანობას ახორციელებს.

იუსტიციისა და სამოქალაქო ინტეგრაციის სამინისტრო

2026-05-30

აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის სამინისტროს ორგანიზებით, კონკურსის „ჩემი თვალით დანახული აფხაზეთი“ გამარჯვებულთა დაჯილდოების ცერემონია გაიმართა.

კონკურსის ფარგლებში წარმოდგენილი 300-მდე ნამუშევრიდან ჟიურიმ 10 საუკეთესო ნამუშევარი გამოავლინა, მათ შორის გამარჯვებული სამეული და სპეციალური ნომინაციების მფლობელები. მათ სიგელები და სიმბოლური საჩუქრები გადაეცათ.

ღონისძიებაზე მისასალმებელი სიტყვით აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე წარდგა, რომელმაც გამარჯვებულებს წარმატება მიულოცა, აფხაზეთის თემაზე სხვადასხვა კონკურსების ჩატარების აუცილებლობაზე და ახალგაზრდების ჩართულობის მნიშვნელობაზე ისაუბრა. დამსწრე საზოგადოებას ასევე სიტყვით მიმართეს აფხაზეთის იუსტიციისა და სამოქალაქო ინტეგრაციის მინისტრმა ალიონა ჩხოტუამ, აფხაზეთის უმაღლესი საბჭოს თავმჯდომარემ ჯემალ გამახარიამ და თბილისის საკრებულოს განათლებისა და კულტურის კომისიის თავმჯდომარემ ბექა ოდიშარიამ.

კონკურსის ფარგლებში წარმოდგენილი ორი ნამუშევარი შეირჩა და შევა მასწავლებელთა პროფესიული განვითარების ეროვნული ცენტრის არაფორმალური განათლების პროგრამის ფარგლებში მომზადებულ ქართული ენის შემსწავლელ სახელმძღვანელოში, რომელიც ემიგრანტი მოზარდებისთვისაა განკუთვნილი.

კონკურსში მონაწილეობა 10-17 წლის მოზარდებმა მიიღეს საქართველოს სხვადასხვა რეგიონიდან. ნამუშევრები წარმოდგენილი იყო საზღვარგარეთიდანაც.

ღონისძიებას ცენტრალური ხელისუფლების წარმომადგენლები, აფხაზეთის მთავრობისა და უმაღლესი საბჭოს წევრები, მოწვეული სტუმრები და კონკურსის მონაწილეები ესწრებოდნენ.

ახალი ამბები