აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

სიახლეები

დავით ფაცაცია როდოსის მერს- ანტონის კამბურაკისს შეხვდა

საბერძნეთში სამუშაო ვიზიტის ფარგლებში, აფხაზეთის ავტონომიური რესპუბლიკის იძულებით გადაადგილებულ პირთა მინისტრი - დავით ფაცაცია და აფხაზეთის ავტონომიური რესპუბლიკის მთავრობის თავმჯდომარის მოადგილე - ანზორ მარგიანი საბერძნეთის ქალაქ როდოსის მერს - ანტონის კამბურაკისს შეხვდნენ.

შეხვედრაზე მხარეებმა პრიორიტეტულ მიმართულებებზე, უკვე არსებულ პარტნიორობასა და შემდგომი თანამშრომლობის განვითარების საკითხებზე ისაუბრეს. მხარეებმა მზადყოფნა გამოთქვეს აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი მოსახლეობის საჭიროებებზე ორიენტირებული ღონისძიებების ერთობლივად განხორციელების მიზნით თანამშრომლობის კიდევ უფრო გაღრმავების თაობაზე.

აფხაზეთის ავტონომიური რესპუბლიკის მთავრობის წარმომადგენლებმა ქალაქ როდოსის მერს - ანტონის კამბურაკისს თანადგომისა და აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი მოზარდებისთვის საერთაშორისო ბანაკის განხორციელების მხარდაჭერისთვის მადლობა გადაუხადეს.

შეხვედრას, ასევე, ესწრებოდნენ აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე - გურამ მისაბიშვილი და სსიპ - აფხაზეთიდან იძულებით გადაადგილებულ პირთა-დევნილთა მომსახურების სააგენტოს დირექტორი - სალომე დოლიძე.

შეხვედრის დასასრულს, მხარეებმა ერთმანეთს სიმბოლური საჩუქრები გადასცეს.

 

 

ლევან თევზაია ზუგდიდში ჩირის ახალი საწარმოს გახსნის სამზადისს გაეცნო

აფხაზეთის ფინანსთა და ეკონომიკის მინისტრი ლევან თევზაია, მოადგილესთან გიორგი ჯინჭარაძესთან და ორგანიზაცია ,,საერთაშორისო ინიციატივა განვითარებისა და თანადგომისთვის" ხელმძღვანელთან, ვახტანგ ფოჩხუასთან ერთად,ზუგდიდში ჩირის გადამამუშავებელი საწარმოს სარეაბილიტაციო სამუშაოებს გაეცნო, რომელიც მიმდინარე წლის სექტემბერში გაიხსნება.
ლევან თევზაიას განცხადებით, საწარმოს ფუნქციონირება ხელს შეუწყობს დევნილი მოსახლეობის ეკონომიკურ გაძლიერებასა და რესურსებზე ხელმისაწვდომობის ზრდას.
,,სოციალური საწარმოს გახსნა მისცემს შესაძლებლობას დევნილებს მოახდინონ თავიანთი მოსავლის რეალიზაცია. პროექტის მიზანია შექმნას წარმატებული ბიზნეს მოდელი, რომელიც იფუნქციონირებს გარემოს დაცვის პრინციპით. გრძელვადიან პერსპექტივაში, აღნიშნული საწარმო გახდება მაგალითი წარმატებული, სოციუმზე ორიენტირებული საწარმოსი,"-განაცხადა აფხაზეთის ფინანსთა და ეკონომიკის მინისტრმა.
საწარმო ჩეხეთის განვითარების სააგენტოს და აფხაზეთის ა/ რ სახელმწიფო ბიუჯეტის დაფინანსებით, სამინისტროს ,,საერთაშორისო ინიციატივა განვითარებისა და თანადგომისთვის" ახორციელებს.

ახალგაზრდული მრჩეველთა საბჭოს ახალი წევრების შესარჩევად კონკურსი ცხადდება

საბჭოს განახლების მიზნით, წევრები ღია კონკურსის წესით შეირჩევიან.

განაცხადის წარდგენის ბოლო ვადაა 30 აგვისტო.

მინისტრის აპარატის ბაზაზე შექმნილი ახალგაზრდული მრჩეველთა საბჭო ახალგაზრდული პროგრამების შემუშავებასა და განხორციელებაში აქტიურად ჩაერთვება.

დაინტერესებულმა პირებმა, გთხოვთ, შეავსოთ სარეგისტრაციო ფორმა ქვემოთ მითითებულ ბმულზე

https://forms.gle/nPqAoujtRGcM5sR79

გისურვებთ წარმატებებს!

აფხაზეთის ავტონომიური რესპუბლიკის მთავრობის წარმომადგენლები როდოსის მიტროპოლიტ კირილე II-ის მიწვევით ლიტურგიასა და ტრაპეზს დაესწრნენ

აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, აფხაზეთის ავტონომიური რესპუბლიკის მთავრობის თავმჯდომარის მოადგილე - ანზორ მარგიანთან, თავის პირველ მოადგილე - გურამ მისაბიშვილთან, სსიპ - აფხაზეთიდან იძულებით გადაადგილებულ პირთა-დევნილთა მომსახურების სააგენტოს დირექტორ - სალომე დოლიძესთან და როდოსის ადგილობრივი ხელისუფლების წარმომადგენლებთან ერთად, როდოსის მიტროპოლიტ კირილე II-ის მიწვევით ლიტურგიასა და ტრაპეზს დაესწრნენ.

აფხაზეთის ავტონომიური რესპუბლიკის მთავრობის წარმომადგენლებმა როდოსის ადგილობრივ ხელისუფლებასა და როდოსის მიტროპოლიტ კირილე II-ს აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი მოზარდებისთვის საერთაშორისო ბანაკის განხორციელების ხელშეწყობისა და მხარდაჭერისთვის მადლობა გადაუხადეს. მათ, ასევე, ისაუბრეს საქართველოსა და საბერძნეთის მრავალსაუკუნოვან ურთიერთობებზე და განიხილეს სამომავალო თანამშრომლობის გაძლიერების შესაძლებლობები.

როდოსის მიტროპოლიტმა კირილე II-ემ ისაუბრა საბერძნეთსა და საქართველოს შორის მჭიდრო კავშირებზე და განსაკუთრებული ყურადღება გაამახვილა სრულიად საქართველოს კათოლიკოს-პატრიარქის ილია II-ის ავტორიტეტსა და მრავალწლიან ღვაწლზე მართლმადიდებლურ სამყაროში.

დასასრულს, მხარეებმა ერთმანეთს სიმბოლური საჩუქრები გადასცეს.

 

აფხაზეთში შეიარაღებული კონფლიქტის დაწყებიდან 30 წელი შესრულდა

აფხაზეთში შეიარაღებული კონფლიქტის დაწყებიდან 30 წელი გავიდა - თარიღთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის მთავრობის წევრებთან ერთად, გმირთა მემორიალი გვირგვინით შეამკო და კიდევ ერთხელ პატივი მიაგო საქართველოს ტერიტორიული მთლიანობისათვის დაღუპული გმირების ხსოვნას.

„რუსეთი უკვე წლებია აგრძელებს საქართველოს განუყოფელი ტერიტორიების აფხაზეთისა და ცხინვალის რეგიონის უკანონო ოკუპაციას, საერთაშორისო სამართლისა და 2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების უგულებელყოფას.

მათი პროვოკაციული ნაბიჯების მიუხედავად, საქართველოს ხელისუფლება მტკიცედ მიუყვება კონფლიქტის მშვიდობიანი დარეგულირების პოლიტიკას. ჩვენ გონივრულად, სამშვიდობო პოლიტიკით, თანმიმდევრული ნაბიჯებით უნდა მივაღწიოთ ქვეყნის დეოკუპაციას“, - განაცხადა რუსლან აბაშიძემ.

აფხაზეთში შეიარაღებული დაპირისპირება 1992 წლის 14 აგვისტოს დაიწყო, პირველი შეტაკებები ოჩამჩირისა და გულრიფშის რაიონებში მოხდა. სამხედრო დაპირისპირება 403 დღე გაგრძელდა, რასაც ათიათასობით მშვიდობიანი მოქალაქე და ჯარისკაცი შეეწირა და 300 000 მეტი ადამიანი დევნილად იქცა.

ნანა გაბელიამ ქართული საკვირაო სკოლის წარმომადგენლებს აფხაზეთის თემატიკაზე გამოცემული წიგნები გადასცა
აფხაზეთის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია თესალონიკში მოქმედი ქართული საკვირაო სკოლის წარმომადგენლებს შეხვდნენ.
 
„მადლობა მინდა გადავუხადო თესალონიკში საქართველოს გენერალურ კონსულს, ნოდარ კომახიძეს მასპინძლობისთვის. ჩვენ გვქონდა არაერთი მნიშვნელოვანი შეხვედრა, მათ შორის ჩვენს დევნილ ემიგრანტებთან, მაღალი რანგის სასულიერო პირებთან. ასევე, ჩვენს თანამემამულეებს გადავეცით წიგნები აფხაზეთის თემატიკაზე და იმედი გვაქვს, ქართული საკვირაო სკოლის აღსაზრდელებისთვის ეს გამოცემები იქნება ქართულ-აფხაზური მრავალსაუკუნოვანი ურთიერთობების ერთ-ერთი საუკეთესო მაგალითი“-აღნიშნა მინისტრმა.
 
მხარეებმა სამომავლო გეგმები განიხილეს და აქტიურ თანამშრომლობაზე შეთანხმდნენ.
 
შეხვედრას, ასევე, მინისტრის მოადგილეები გიორგი გაბედავა და მარინე გითოლენდია ესწრებოდნენ.
საბერძნეთში აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი მოზარდებისთვის საერთაშორისო ბანაკი გაიმართა

როდოსის მერიამ საერთაშორისო ბანაკის მონაწილეებს უმასპინძლა და მოზარდებს სიმბოლური საჩუქრები გადასცა.

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი და აფხაზეთის იძულებით გადაადგილებულ პირთა მინისტრი დავით ფაცაცია საბერძნეთის ქალაქ როდოსის გუბერნატორსა და მიტროპოლიტს შეხვდნენ და გაწეული მხარდაჭერისთვის მადლობა გადაუხადეს.

საერთაშორისო ბანაკი საბერძნეთში, როდოსზე სსიპ - აფხაზეთიდან იძულებით გადაადგილებულ პირთა-დევნილთა მომსახურების სააგენტოს, ა(ა)იპ - სულიერების ცენტრისა და როდოსის მიტროპოლიის ერთობლივი ორგანიზებით ხორციელდება.

ბანაკის ბენეფიციარები ა(ა)იპ - სულიერების ცენტრის სხვადასხვა პროგრამებში წარმატებით მონაწილე აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი 12-დან 14 წლამდე მოზარდები არიან .

რუსლან აბაშიძე და ნანა გაბელია თესალონიკის მიტროპოლიტ ანთიმოზს შეხვდნენ
საბერძნეთში სამუშაო ვიზიტის ფარგლებში აფხაზეთის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია თესალონიკის მიტროპოლიტ ანთიმოზს შეხვდნენ.
 
შეხვედრის მონაწილეებმა საქართველოსა და საბერძნეთის მრავალსაუკუნოვანი ურთიერთობებისა და მჭიდრო რელიგიური კავშირების შესახებ ისაუბრეს და სამომავლო თანამშრომლობაზე შეთანხმდნენ.
 
რუსლან აბაშიძემ მიტროპოლიტ ანთიმოზს მადლობა გადაუხადა თესალონიკის ქართული დიასპორის მრავალწლიანი თანადგომისა და თესალონიკის ეპარქიის ფარგლებში არსებული, წმინდა ნიკოლოზის ქართული სამრევლოს დაარსების ხელშეწყობისთვის.
 
შეხვედრას, მინისტრის მოადგილეები გიორგი გაბედავა და მარინე გითოლენდია, თესალონიკში საქართველოს გენერალური კონსული ნოდარ კომახიძე და თესალონიკის ქართული სამრევლოს წინამძღვარი, პროტოპრესვიტერი გიორგი მათურელი ესწრებოდნენ.
რუსლან აბაშიძე საბერძნეთის ქართული დიასპორის წარმომადგენლებს შეხვდა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია საბერძნეთის რესპუბლიკის ქალაქ სალონიკში, სამუშაო ვიზიტის ფარგლებში, ქართული დიასპორის წარმომადგენლებს შეხვდნენ.

შეხვედრის მიმდინარეობისას ყურადღება გამახვილდა იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის მიერ შემუშავებულ, დიასპორისა და დევნილ ემიგრანტთა მხარდაჭერის პროგრამით გათვალისწინებულ პროექტებსა და სამომავლოდ დაგეგმილ ღონისძიებებზე.

აფხაზეთის მთავრობის თავმჯდომარის განცხადებით, ქართულ-აფხაზური კონფლიქტის მოგვარების გზების ძიების პროცესებში დევნილი ემიგრანტების ჩართულობა, ქართულ-აფხაზური კულტურის პოპულარიზაცია, დიალოგის ხელშეწყობა და შერიგების მხარდაჭერა მთავრობისა და მინისტრის აპარატის საქმიანობის ერთ-ერთი პრიორიტეტული მიმართულებაა.

აღსანიშნავია, რომ სალონიკში მცხოვრები დევნილი ემიგრანტებისთვის, ემიგრაციაში მოღვაწე დიდი ქართველი დიპლომატისა და ხელოვანის გიორგი აფხაზის შემოქმედების ვირტუალური გამოფენა გაიმართა.

შეხვედრას იუსტიციისა და სამოქალაქო ინტეგრაციის საკითხებში აფხაზეთის მინისტრის მოადგილეები გიორგი გაბედავა, მარინე გითოლენდია და სალონიკში საქართველოს გენერალური კონსული ნოდარ კომახიძე ესწრებოდნენ.

საბერძნეთში აფხაზეთიდან დევნილი მოზარდებისთვის საერთაშორისო ბანაკი გაიხსნა

 

სსიპ - აფხაზეთიდან იძულებით გადაადგილებულ პირთა-დევნილთა მომსახურების სააგენტოს, ა(ა)იპ - სულიერების ცენტრისა და როდოსის მიტროპოლიის ერთობლივი ორგანიზებით, ა(ა)იპ - სულიერების ცენტრის სხვადასხვა პროგრამებში წარმატებით მონაწილე აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი 12-დან 14 წლამდე მოზარდებისთვის საბერძნეთში, კუნძულ როდოსზე საერთაშორისო ბანაკი გაიხსნა.

პროექტის ფარგლებში, 40-მდე მოზარდი საბერძნეთში გაემგზავრა და კუნძულ როდოსზე არსებულ საერთაშორისო ბანაკში ორი კვირის განმავლობაში - ინტელექტუალურ, შემეცნებით, სახალისო, სპორტულ და გუნდურ აქტივობებში მიიღებს მონაწილეობას.

პროექტი მოზარდებს შესაძლებლობას მისცემს აიმაღლონ ცნობიერება სხვადასხვა საკითხებზე, მათ შორის დასავლურ ღირებულებებზე, გაეცნონ ბერძნულ კულტურასა და ტრადიციებს, განივითარონ საკომუნიკაციო და სხვა სახის უნარ-ჩვევები. ამასთან, პროექტით დაგეგმილი აქტივობები აფხაზეთის ოკუპირებულ ტერიტორიაზე მცხოვრებ და აფხაზეთიდან დევნილ მოზარდებს ხელს შეუწყობს ერთმანეთთან სოციალური ურთიერთობების დამყარებასა და გაღრმავებაში.

 

რუსლან აბაშიძემ 2008 წლის აგვისტოს ომის დროს დაღუპული გმირების ხსოვნას პატივი მიაგო

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის მთავრობის წევრებმა მუხათგვერდის ძმათა სასაფლაოზე 2008 წლის აგვისტოს ომის დროს დაღუპულთა მემორიალი გვირგვინით შეამკეს და კიდევ ერთხელ პატივი მიაგეს საქართველოს დამოუკიდებლობისა და ტერიტორიული მთლიანობისთვის ბრძოლაში დაღუპული გმირების ხსოვნას.

რუსლან აბაშიძე მუხათგვერდის სასაფლაოზე დაღუპული ჯარისკაცების ოჯახის წევრებს პირადად შეხვდა და მიუსამძიმრა.

მემორიალთან საქართველოს პრემიერ-მინისტრი ირაკლი ღარიბაშვილი, აღმასრულებელი და საკანონმდებლო ხელისუფლებისა და დიპლომატიური კორპუსის წარმომადგენლები იმყოფებოდნენ.

2008 წლის რუსეთ-საქართველოს ომიდან 14 წელი გავიდა - დაღუპულთა ხსოვნის პატივსაცემად, ქვეყნის მასშტაბით, სახელმწიფო დროშები დაეშვა - დროშები დაშვებულია საზღვარგარეთ საქართველოს დიპლომატიურ წარმომადგენლობებში.

რუსლან აბაშიძემ სენაკის მუნიციპალიტეტის ყოფილი სამხედრო ქალაქის დევნილთა დასახლებაში მიმდინარე ინფრასტრუქტურული პროექტი დაათვალიერა

სენაკის მუნიციპალიტეტის ყოფილი სამხედრო ქალაქის დევნილთა დასახლებაში, მრავალბინიანი კორპუსების ეზოების კეთილმოწყობის და შიდა გზების სარეაბილიტაციო სამუშაოების მეორე ეტაპი მიმდინარეობს.

სამუშაო პროცესს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, სახელმწიფო რწმუნებული სამეგრელო-ზემო სვანეთის მხარეში გიორგი გუგუჩია და საქართველოს პარლამენტის მაჟორიტარი დეპუტატი ირაკლი ხახუბია ერთობლივად გაეცნენ.

აღსანიშნავია, რომ დევნილთა დასახლებაში, საგზაო ინფრასტრუქტურის მოწყობასთან ერთად, რომელიც ამორტიზებული იყო და გადაადგილების პრობლემას ქმნიდა, მოწესრიგდა სანიაღვრე სისტემა, საბავშვო ბაღის - „ოცნება“ მიმდებარე ტერიტორიაზე კი სპორტული მოედანი მოეწყო.

ადგილზე, ინფრასტრუქტურული სამუშაოები, რეგიონში განსახორციელებელი პროექტების ფონდისა და ადგილობრივი ბიუჯეტის ერთობლივი დაფინანსებით ხორციელდება.

ინტეგრაციისა და ჩართულობის ახალგაზრდული საზაფხულო ბანაკი
 
იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის პროექტი „ინტეგრაციისა და ჩართულობის ახალგაზრდული საზაფხულო ბანაკი“ გულისხმობს აფხაზეთიდან დევნილი და არადევნილი, შშმ პირების დედმამიშვილებისა და სოციალურად დაუცველი ახალგაზრდების საზაფხულო ბანაკში განთავსებას.
 
მონაწილეებისთვის დაგეგმილია შემეცნებითი ტრენინგები, სახალისო, სპორტული და გუნდური აქტივობები.
 
მონაწილეობის მიღება შეუძლიათ აფხაზეთიდან დევნილ და არადევნილ, შშმ პირების დედმამიშვილებსა და სოციალურად დაუცველ ახალგაზრდებს 10 წლიდან 14 წლის ჩათვლით.
 
40 ახალგაზრდა შეირჩევა კონკურსის წესით.
 
პროექტი განხორციელდება ბაკურიანში 29 აგვისტოდან 5 სექტემბრის ჩათვლით.
 
განაცხადების მიღების ბოლო ვადაა 15 აგვისტო.
 
დაინტერესებულმა პირებმა გთხოვთ, შეავსოთ სარეგისტრაციო ფორმა ქვემოთ მითითებულ ბმულზე.
 
 
გისურვებთ წარმატებებს!
რუსლან აბაშიძე ქობულეთში სკოლა-ბანაკის დახურვის ღონისძიებას დაესწრო

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და აფხაზეთის განათლებისა და კულტურის მინისტრი ეკა ხოფერია, ქობულეთში, ონლაინ საკვირაო სკოლის საზაფხულო ბანაკის დახურვის ღონისძიებას დაესწრნენ.

აფხაზეთის სკოლა-ბანაკი მრავალფეროვანი გასართობი, ინტელექტუალური და შემეცნებითი აქტივობებით გამოირჩეოდა, რომელიც აფხაზეთის განათლებისა და კულტურის სამინისტროს „აფხაზეთის ონლაინ საკვირაო სკოლის“ ბაზაზე მასწავლებელთა პროფესიული განვითარების ეროვნულ ცენტრთან თანამშრომლობით შეიქმნა.

ონლაინ საკვირაო სკოლის ფარგლებში, საგნობრივი კომპეტენციების ამაღლების მიზნით, მოსწავლეებს სემინარებს ქართულ ენასა და ლიტერატურაში, ინგლისურ ენაში, ხელოვნებასა და სხვა საგნებში მასწავლებლის სახლის წამყვანი სპეციალისტები უტარებდნენ.

კურსის დასრულების შემდეგ, ახალგაზრდებისთვის მრავალფეროვანი და საინტერესო აქტივობები გაიმართა. მოეწყო საბუნებისმეტყველო STEM კლუბი „ჩხირკედელას“ მასტერკლასები.  მოსწავლეებმა შეკვეთილის დენდროლოგიური პარკი, პეტრას ციხე-ქალაქი და რეგიონის სხვა ისტორიული და ტურისტული ადგილები მოინახულეს - დაესწრნენ ფეხბურთის მატჩს და რამდენიმე სპორტული აქტივობა თავადაც გამართეს.

პროექტის შემაჯამებელ ღონისძიებაზე ახალგაზრდებმა, ბანაკში მიღებული გამოცდილების ფარგლებში, სხვადასხვა საინტერესო თემატიკაზე მომზადებული ვიდეორგოლები და ნამუშევრები წარმოადგინეს.

ბანაკის დახურვის ღონისძიებას საქართველოს განათლებისა და მეცნიერების მინისტრის პირველი მოადგილე თამარ მახარაშვილი, მასწავლებელთა პროფესიული განვითარების ეროვნული ცენტრის დირექტორი ბერიკა შუკაკიძე და ადგილობრივი ხელისუფლების წარმომადგენლები ესწრებოდნენ. 

„აფხაზეთის ონლაინ საკვირაო სკოლა“, საქართველოში ამერიკის შეერთებული შტატების საელჩოს მხარდაჭერით განხორციელდა და მასში აფხაზეთის საჯარო სკოლების წარმატებული და სოციალურად დაუცველი 80 მოსწავლე მონაწილეობდა.

რუსლან აბაშიძე გუდაურში ავიაკატასტროფის შედეგად დაღუპულთა სამოქალაქო პანაშვიდზე იმყოფებოდა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის მთავრობის წევრებთან ერთად, გუდაურში ავიაკატასტროფის შედეგად დაღუპულთა სამოქალაქო პანაშვიდზე იმყოფებოდა. რუსლან აბაშიძემ სამების საკათედრო ტაძარში პატივი მიაგო დაღუპულთა ხსოვნას და მათი ოჯახის წევრებს მიუსამძიმრა.

სასაზღვრო პოლიციის ვერტმფრენი, გუდაურთან, 29 ივლისს ჩამოვარდა. ვერტმფრენმა, რომლის დახმარებით ჩამოვარდნილი პარაპლანისტების სამაშველო ოპერაცია მიმდინარეობდა, მართვა დაკარგა და კატასტროფა განიცადა. ბორტზე 8 ადამიანი იმყოფებოდა. ტრაგედიას, მფრინავები - ზაზა ლორია, დიმიტრი ქააძე, ლევან ჩოხელი და ანდრო ქუჯოშვილი, მაშველები - კახა ტორჩინავა, გიორგი მარგიანი, ექიმები - ქეთევან გულაღაშვილი და გიორგი ვენეცკი შეეწირნენ.

მთავრობის განკარგულებით, რომელსაც ხელს პრემიერ-მინისტრი ირაკლი ღარიბაშვილი აწერს, 30 ივლისი საქართველოში გლოვის დღედ გამოცხადდა. სახელმწიფო დროშები დაეშვა ყველა ადმინისტრაციულ შენობაზე.

საქართველოს შინაგან საქმეთა სამინისტრო და ჯანდაცვის სამინისტრო თითოეულ ოჯახს 100 000 ლარს გამოუყოფს.