აფხაზეთის ავტონომიური რესპუბლიკის მთავრობა

ახალი ამბები

2022-12-28 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

მინისტრის აპარატში აფხაზეთიდან დევნილ წარმატებულ ახალგაზრდებთან შეხვედრა გაიმართა

აფხაზეთის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, არაფორმალური განათლების, სამოქალაქო ინტეგრაციისა და სამშვიდობო პოლიტიკის მიმართულებით მომუშავე წარმატებულ დევნილ ახალგაზრდებს შეხვდნენ, დამდეგი შობა-ახალი წელი მიულოცეს და გაწეული საქმიანობისთვის მადლობა გადაუხადეს.

ნანა გაბელიას განცხადებით, სწორედ ახალგაზრდები არიან ის მნიშვნელოვანი სამშვიდობო რესურსი, რომელთა მაქსიმალური ჩართულობით ბევრი მნიშვნელოვანი პროექტი განხორციელდა დევნილი და არადევნილი მოზარდების განვითარებისა და მხარდაჭერისთვის.

შეხვედრას მინისტრის აპარატის თანამშრომლები და მოწვეული სტუმრები ესწრებოდნენ.

2022-12-26 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

მინისტრის აპარატსა და საქველმოქმედო ჰუმანიტარულ ცენტრს "აფხაზეთი" შორის თანამშრომლობის მემორანდუმი გაფორმდა

შესაბამის დოკუმენტს ხელი იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ და ცენტრის აღმასრულებელმა დირექტორმა ნაპოლეონ მილორავამ მოაწერეს.

თანამშრომლობის მემორანდუმი ითვალისწინებს აფხაზეთის ოკუპირებულ ტერიტორიაზე მცხოვრები და იძულებით გადაადგილებული პირების ინტეგრაციასა და სამოქალაქო ცნობიერების ამაღლების ხელშეწყობას, ერთობლივი პროგრამების განხორციელებას და საერთო ინტერესების სფეროში შემავალ აქტუალურ საკითხებზე თანამშრომლობას.

2022-12-23 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ნანა გაბელია ზამთრის ბანაკის მონაწილე შშმ პირებს ესტუმრა და საახალწლო საჩუქრები გადასცა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია შშმ მოზარდებისა და ახალგაზრდების ინტეგრაციისა და ჩართულობის ბანაკის მონაწილეებს შეხვდნენ.

მინისტრის აპარატის ორგანიზებით, აფხაზეთიდან დევნილი შშმ მოზარდები ბაკურიანში ათი დღის განმავლობაში სხვადასხვა საგანმანათლებლო-შემეცნებით აქტივობებში იღებდნენ მონაწილეობას.

აღნიშნული პროგრამის ბენეფიციარები დარგის ექსპერტების ჩართულობით ინტეგრაციის, პიროვნული განვითარების, ადამიანის უფლებებისა და სხვა აქტუალური საკითხების მიმართულებით ორგანიზებულ ტრენინგებს ესწრებოდნენ.

შეხვედრის ბოლოს ბანაკის მონაწილეებს მინისტრმა დამდეგი შობა-ახალი წელი მიულოცა და სიმბოლური საახალწლო საჩუქრები გადასცა.

2022-12-21 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ნანა გაბელიამ პროექტის „ჩვენი დროის მშვიდობისმყოფელები“ ფარგლებში ქართველ და უკრაინელ დევნილ ბავშვებს უმასპინძლა

იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის, საქართველოს საპატრიარქოს წმინდა ნინოს სახელობის მართლმადიდებლური სკოლის ორგანიზებითა და საქართველოს ტექნიკური უნივერსიტეტის მხარდაჭერით გაიმართა ღონისძიება „ჩვენი დროის მშვიდობისმყოფელები“.

იუსტიციისა და სამოქალაქო ინტეგრაციის საკითხებში აფხაზეთის მინისტრის ნანა გაბელიას განცხადებით, აღნიშნული პროგრამა ითვალისწინებდა ქართველი და უკრაინელი დევნილი მოზარდების დამეგობრებას, კონფლიქტების შესახებ მათი ცნობიერების ამაღლებას, სამშვიდობო გზავნილების პოსტერებისა და ნახატების შექმნასა და გამოფენას.

შეხვედრას მინისტრის პირველი მოადგილე გიორგი გაბედავა, საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი ირაკლი გაბისონია, საპატრიარქოს წმინდა ნინოს სახელობის მართლმადიდებლური სკოლის პედაგოგი სოფიკო გორგილაძე, ამავე სკოლისა და სსიპ მიხეილ გრუშევსკის სახელობის ქ. თბილისის 41-ე საჯარო სკოლის პედაგოგები და მოსწავლეები ესწრებოდნენ.

ღონისძიების ბოლოს მოსწავლეებს სიმბოლური საახალწლო და სამახსოვრო საჩუქრები გადაეცათ.

2022-12-17 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ნანა გაბელია ესპანეთში მცხოვრებ დევნილ ემიგრანტებს შეხვდა

ქ. მადრიდში, სამუშაო ვიზიტის ფარგლებში, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, ქართული დიასპორის წარმომადგენლებს შეხვდნენ.

ნანა გაბელიამ დევნილ ემიგრანტენთან მინისტრის აპარატის საქმიანობასა და სამომავლო გეგმებზე ისაუბრა.

„ჩვენ განვიხილეთ ემიგრანტებთან კომუნიკაციის ყველა შესაძლო მეთოდი, მათ შორის, ვისაუბრეთ ქართული დიასპორებისათვის საკომუნიკაციო ონლაინ პლატფორმის შექმნის აუცილებლობასა და მნიშვნელობაზე. დავსახეთ მინისტრის აპარატის სამომავლო პროგრამებში ქართული დიასპორების ჩართულობის უზრუნველსაყოფად ყველა აუცილებელი ქმედება და აქტიურად ვიმუშავებთ ამ მიმართულებით“-განაცხადა მინისტრმა.

შეხვედრისას, მინისტრის პირველმა მოადგილემ გიორგი გაბედავამ აფხაზეთის ტერიტორიაზე ადამიანის უფლებათა დარღვევის ფაქტებსა და დეზინფორმაციის წინააღმდეგ ბრძოლის მექანიზმებზე ისაუბრა.

ღონისძიებას ,ასევე ,ესპანეთის სამეფოში საქართველოს საგანგებო და სრულუფლებიანი ელჩი ილია გიორგაძე ესწრებოდა.

შეხვედრის დასკვნით ნაწილში, საზოგადო მოღვაწის გიორგი აფხაზის ნამუშევრების ვირტუალური გამოფენა მოეწყო.

დევნილ ემიგრანტებთან შეხვედრა, პროგრამის „დიასპორა და დევნილ ემიგრანტთა მხარდაჭერა“ ფარგლებში, მინისტრის აპარატის ორგანიზებითა და საქართველოს საგარეო საქმეთა სამინისტროს მხარდაჭერით განხორციელდა.

2022-12-16 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ქ.მადრიდში დევნილი ახალგაზრდების კულტურულ-საგანმანათლებლო პროექტებში ჩართვის მიზნით თანამშრომლობის ხელშეკრულება გაფორმდა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია ოფიციალური ვიზიტით ქ. მადრიდში იმყოფებიან.

სამუშაო ვიზიტის ფარგლებში, ინტეგრაციისა და სოლიდარობის ფონდის „FINSOL“ შტაბ-ბინაში გაფორმდა თანამშრომლობის ხელშეკრულება, რომელიც ითვალისწინებს მოზარდებისა და ახალგაზრდების კულტურულ-საგანმანათლებლო პროექტებში ჩართვას ესპანეთში.

ხელშეკრულებას ხელი მოაწერეს აფხაზეთის ავტონომიური რესპუბლიკის მთავრობის სახელით, იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ და ესპანური მხარის სახელით, ესპანური ასოციაციის "TODOS SOMOS NIÑOS“ პრეზიდენტმა ანხელ მარუგან კალვომ.

პროექტის ფარგლებში მოზარდები შეირჩევიან წინასწარ განსაზღვრული კრიტერიუმებით, მათ შორის, პრიორიტეტი მიენიჭებათ აფხაზეთიდან იძულებით გადაადგილებულ პირებს, აფხაზეთის ოკუპირებული ტერიტორიის მაცხოვრებლებს, სოციალურად დაუცველი ოჯახების მონაცემთა ერთიან ბაზაში რეგისტრირებულ პირებს და სხვა.

2022-12-09 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

მინისტრის აპარატმა "იძულებით გადაადგილებულ პირთა სპეციფიკური ადამიანის უფლებების საჭიროებების სამართლებრივი გზამკვლევის" პრეზენტაცია გამართა

ღონისძიება მისასალმებელი სიტყვით აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა ნანა გაბელიამ გახსნეს.

აღნიშნული გზამკვლევის შექმნის მიზანია შერიგებაზე და ქართულ-აფხაზური საზოგადოების გაერთიანებაზე ორიენტირებული სამართლებრივი დახმარება, კონფლიქტით დაზარალებულ საზოგადოებებს შორის ობიექტური, რეალური ინფორმაციის გაცვლა და კონსტრუქციული ტიპის დიალოგის ხელშეწყობა.

შეხვედრისას, სახელმწიფო უწყებებისა და არასამთავრობო სექტორის წარმომადგენლები, დარგის სპეციალისტები და ექსპერტები გზამკვლევში მოცემულ ინფორმაციას გაეცნენ.

დისკუსიებისა და განხილვის შედეგად მიღებული დამატებითი შენიშვნები დოკუმენტის საბოლოო ვარიანტში აისახება.

ღონისძიება მინისტრის აპარატის პროგრამის ,,სამშვიდობო რესურსი-ქართულ-აფხაზური ურთიერთობების მხარდაჭერა“ ფარგლებში ჩატარდა.

2022-11-28 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

კონფლიქტის თემატიკაზე მომუშავე სამოქალაქო საზოგადოებისა და არასამთავრობო სექტორის წარმომადგენლებთან შეხვედრა გაიმართა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია აფხაზეთის კონფლიქტის თემატიკაზე მომუშავე სამოქალაქო საზოგადოებისა და არასამთავრობო სექტორის წარმომადგენლებს შეხვდნენ.

პანელური დისკუსიის ფარგლებში, მონაწილეებმა იმსჯელეს სამშვიდობო პოლიტიკის მიმართულებით რეგიონში არსებულ გამოწვევებსა და პერსპექტივებზე. საუბარი შეეხო ოკუპირებულ აფხაზეთში მცხოვრები მოსახლეობის უფლებრივ მდგომარეობას, დევნილთა წინაშე არსებულ საჭიროებებს და სხვა მნიშვნელოვან საკითხებს.

„დევნილთა პრობლემების მოგვარების, ნდობის მშენებლობისა და სამოქალაქო ინტეგრაციის ფარგლებში, ჩვენ აქტიურად ვახორციელებთ სხვადასხვა პროგრამებს. სამოქალაქო სექტორის, სამთავრობო და არასამთავრობო, ასევე საერთაშორისო ორგანიზაციების აქტიური ჩართულობით შევთანხმდით კონკრეტულ ქმედებებზე და პერიოდულად, საზოგადოებას მივაწვდით ინფორმაციას“-განაცხადა ნანა გაბელიამ.

ღონისძიება „სამშვიდობო რესურსი - ქართულ-აფხაზური ურთიერთობების მხარდაჭერა“ პროგრამის ფარგლებში, იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებით გაიმართა.

შეხვედრაში აფხაზეთის მთავრობის წევრები, მინისტრის აპარატის წარმომადგენლები და მოწვეული სპიკერები მონაწილეობდნენ.

2022-11-11 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ნანა გაბელიამ მინისტრის აპარატის საქმიანობის ანგარიში წარადგინა

მინისტრის საათის ფორმატში, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია აფხაზეთის ავტონომიური რესპუბლიკის უმაღლესი საბჭოს დეპუტატების წინაშე მოხსენებით წარსდგა.

გამოსვლისას ნანა გაბელიამ ისაუბრა მინისტრის აპარატის მიერ ბოლო ცხრა თვის განმავლობაში განხორციელებულ პროექტებზე, მათ შორის, წლის განმავლობაში მიღწეულ შედეგებსა და წარმატებულ პროგრამებზე. ასევე, მომავალში დაგეგმილ აქტივობებსა და ადამიანის უფლებათა დაცვის, სამოქალაქო ინტეგრაციისა და საარქივო საქმიანობის ფარგლებში არსებულ გამოწვევებზე.

მინისტრმა ყურადღება გაამახვილა იმ ძირითად ამოცანებსა და მიმართულებებზე, რომლებიც მინისტრის აპარატის გუნდის ერთობლივი მუშაობის შედეგად იქნა მიღებული.

„მინისტრის აპარატმა , ვფიქრობ, ნაყოფიერად და წარმატებულად იმუშავა ყველა იმ პრიორიტეტული მიმართულებით, რომელიც აფხაზეთიდან დევნილი მოსახლეობის, განსაკუთრებით ახალგაზრდების, ინტერესებისა და საჭიროებების იდენტიფიცირებას ემსახურება, მათი შემდგომი გადაჭრის გზების მოძიების პროცესში“-აღნიშნა მინისტრმა.

2022-11-07 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ზუგდიდში წარმატებით გრძელდება პროექტი ,,დევნილ მოზარდთა სამოქალაქო ჩართულობის სივრცე"

მინისტრის აპარატი აგრძელებს რეგიონებში, კომპაქტურად ჩასახლების ობიექტებში, ახალ პროექტს „დევნილ მოზარდთა სამოქალაქო ჩართულობის სივრცე“.

ამჯერად, ზუგდიდის მუნიციპალიტეტში, ყოველ შაბათ-კვირას დევნილი მოზარდები ესწრებიან საგანმანათლებლო-შემეცნებით ტრენინგებს, მონაწილეობენ საინტერესო და გუნდურ აქტივობებში, რაც ხელს უწყობს მნიშვნელოვანი უნარ-ჩვევების განვითარებას, უზრუნველყოფს აქტუალურ საკითხებზე მათ ინფორმირებულობას და მიმდინარე პროცესებში აქტიურ ჩართულობას.

ფოცხო-ეწერის, ფოთისა და რუსთავის შემდეგ, ეს რიგით მეოთხე, არაფორმალური განათლების სივრცეა, რომელიც იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებითა და ქალაქ ზუგდიდის მუნიციპალიტეტის მერიის მხარდაჭერით ხორციელდება.

2022-11-01 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

აფხაზეთიდან დევნილ სტუდენტებთან ევროინტეგრაციის საკითხებთან დაკავშირებით საინფორმაციო შეხვედრა გაიმართა

აფხაზეთის მთავრობის თავმჯდომარე რუსლან აბაშიძე, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია და საქართველოს საგარეო საქმეთა მინისტრის მოადგილე თეიმურაზ ჯანჯალია ევროინტეგრაციის საკითხებით დაინტერესებულ სტუდენტებს შეხვდნენ.

ახალგაზრდებმა მიიღეს ინფორმაცია ევროკავშირის ინსტიტუციონალურ მოწყობაზე, ევროკავშირის მიერ გადაწყვეტილების მიღების პროცედურებსა და საქართველოსთვის კანდიდატის სტატუსის მინიჭების მნიშვნელობაზე.

შეხვედრას ასევე ევროინტეგრაციის გენერალური დირექტორატის ხელმძღვანელი, გენერალური დირექტორი ირაკლი ყურაშვილი და ევროინტეგრაციის დეპარტამენტის დირექტორი ზურაბ ხამაშურიძე ესწრებოდნენ.

აღნიშნული ღონისძიება მინისტრის აპარატის ორგანიზებითა და აფხაზეთის განათლებისა და კულტურის სამინისტროს მხარდაჭერით გაიმართა.

2022-09-30 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

რუსლან აბაშიძემ და ნანა გაბელიამ არზაყან ემუხვარის მემორიალური დაფა ყვავილებით შეამკეს

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, მინისტრის პირველი მოადგილე გიორგი გაბედავა და ჩეხეთში საქართველოს საგანგებო და სრულუფლებიანი ელჩი მარიამ რაქვიაშვილი ემიგრაციაში მცხოვრები ცნობილი საზოგადო მოღვაწის არზაყან ემუხვარის მემორიალურ დაფასთან იმყოფებოდნენ.

აფხაზეთში დაბადებული არზაყან (დიმიტრი) ემუხვარის სახელს უკავშირდება არაერთი ცნობილი და ისტორიული მოვლენა აფხაზეთში, მათ შორის ის გახლდათ 1905-1907 წლების რევოლუციური მოძრაობის აქტიური წევრი, რევოლუციის შედეგად შექმნილი „სოხუმის რესპუბლიკის“ ხელმძღვანელი, 1919 წლის 12 მარტს აირჩიეს აფხაზეთის ეროვნული საბჭო, რომელმაც დაადგინა, რომ აფხაზეთი ავტონომიის სტატუსით შესულიყო საქართველოს შემადგენლობაში. არზაყან ემუხვარმა ყველა ღონე იხმარა ამ დადგენილების მისაღებად, სწორედ ის აირჩიეს აფხაზეთის მთავრობის თავმჯდომარედ.

1921 წელს რუსეთის მიერ საქართველოს ოკუპაციის შემდეგ, არზაყან ემუხვარი საქართველოს დემოკრატიული მთავრობის წევრებთან ერთად ემიგრაციაში წავიდა, რის შემდეგ სამშობლოში არ დაბრუნებულა.

ნანა გაბელია ჩეხეთში მცხოვრებ დევნილ ემიგრანტებთან შეხვედრებს განაგრძობს

ჩეხეთის რესპუბლიკაში საქართველოს საელჩოს ორგანიზებით, აფხაზეთის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია ქართველ ემიგრანტებს შეხვდნენ.

შეხვედრა , ჩეხეთში საქართველოს საგანგებო და სრულუფლებიანმა ელჩმა მარიამ რაქვიაშვილმა გახსნა.

,,აფხაზეთიდან დევნილი ემიგრანტების მხარდაჭერა, მათი პრობლემების იდენტიფიცირება და გადაჭრის გზების ძიება მინისტრის აპარატის მიერ შემუშავებული "დიასპორისა და დევნილ ემიგრანტთა მხარდაჭერის" პროექტის მნიშვნელოვანი საკითხია. ეს უკვე მესამე შეხვედრაა საზღვარგარეთ მცხოვრებ ჩვენს თანამემამულეებთან, რაც ემსახურება ქართული დიასპორების სამშვიდობო რესურსის გააქტიურების ხელშეწყობას’’-განაცხადა ნანა გაბელიამ ემიგრანტებთან შეხვედრისას.

ღონისძიების ფარგლებში ემიგრაციაში მცხოვრები, დიდი ქართველი მამულიშვილის გიორგი აფხაზის შემოქმედების ვირტუალური გამოფენა გაიმართა.

შეხვედრისას, მინისტრის პირველმა მოადგილემ გიორგი გაბედავამ გიორგი აფხაზის მოღვაწეობაზე ისაუბრა და ემიგრანტებს მისი შემოქმედება გააცნო.

2022-09-29 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

მინისტრი ნანა გაბელია პრაღაში გამართულ 2008 წლის რუსეთ-საქართველოს ომისადმი მიძღვნილი გამოფენის დახურვას დაესწრო

ჩეხეთში სამუშაო ვიზიტის ფარგლებში, აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ და იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ 2008 წლის რუსეთ-საქართველოს ომისადმი მიძღვნილი გამოფენა დაათვალიერეს და დახურვის ღონისძიებას დაესწრნენ.

აღნიშნული ფოტოგამოფენა მიმდინარე წლის 7 სექტემბერს ქალაქ პრაღაში, საქართველოს საელჩოსა და პრაღა 6-ის მერიის ორგანიზებით, ღია ცის ქვეშ გაიხსნა და მისი დათვალიერება ნებისმიერ მსურველს შეეძლო.

გამოფენის დახურვას მინისტრის პირველი მოადგილე გიორგი გაბედავა, პრაღა 6-ის მერი ონდრეი კოლარჟი, ჩეხეთის რესპუბლიკაში საქართველოს საგანგებო და სრულუფლებიანი ელჩი მარიამ რაქვიაშვილი და დიპლომატიური კორპუსის წარმომადგენლები ესწრებოდნენ.

2022-09-27 | იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი

ნანა გაბელიამ საქართველოს ეროვნული გმირის გურამ გაბესკირიას საფლავი ყვავილებით შეამკო

სოხუმის დაცემის 29 წლისთავთან დაკავშირებით იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ და აფხაზეთის ფინანსთა და ეკონომიკის მინისტრმა ლევან თევზაიამ საქართველოს ეროვნული გმირის გურამ გაბესკირიას ხსოვნას პატივი მიაგეს.

„დღეს ძალიან მძიმე დღეა, სოხუმის დაცემის დღე. აფხაზეთის ავტონომიური რესპუბლიკის ტერიტორიაზე განვითარებულმა შეიარაღებულმა მოქმედებებმა უამრავი ადამიანის სიცოცხლე შეიწირა, მათ შორის ერთ-ერთი გამორჩეული გახლავთ, საქართველოს ეროვნული გმირი გურამ გაბესკირია. ჩვენ, კიდევ ერთხელ, ქედს ვიხრით ჩვენი გმირების ხსოვნის წინაშე, რომლებმაც სიცოცხლე შესწირეს საქართველოს უკეთეს და მშვიდობიან მომავალს “-აღნიშნა ნანა გაბელიამ.