მთავრობის აპარატი
ახალი ამბები
აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი აფხაზეთის საინფორმაციო-ანალიტიკური ცენტრის ჟურნალისტებს შეხვდა და პროფესიული დღე პირადად მიულოცა.
მთავრობის თავმჯდომარემ აფხაზეთის თემაზე მომუშავე ორ ჟურნალისტს - გულიადა ჭკადუას და ენემეო სიდიანს მრავალწლიანი და ნაყოფიერი საქმიანობისთვის აფხაზეთის მთავრობის სახელით მადლობის სიგელები გადასცა. გულიადა ჭკადუა მრავალი წელია, აფხაზეთის თემაზე ანალიტიკურ საქმიანობას ეწევა, ენემეო სიდიანი კი აფხაზეთის ქართულენოვან ტელევიზიაში ოპერატორად მუშაობდა და ომის ამსახველი არაერთი საინტერესო კადრის ავტორია.
„დღეს არის ქართული ჟურნალისტიკის დღე, სწორედ ამიტომ მივიღე გადაწყვეტილება, მოვსულიყავი აფხაზეთის საინფორმაციო ცენტრში და პირადად მიმელოცა პროფესიული დღე აქ მომუშავე პროფესიონალებისთვის. ეს ადამიანები ქმნიან ისტორიებს რეალურ ფაქტებზე და აცოცხლებენ აფხაზეთის ისტორიას.
განსაკუთრებულ მადლობას ვუხდი იმ ჟურნალისტებს აფხაზეთიდან, რომლებმაც თავისი საქმიანობა ქართულ ჟურნალისტიკას დაუკავშირეს, მოიპოვეს და შეინახეს ისტორიები აფხაზეთზე და ათწლეულების განმავლობაში ერთგულად ემსახურებიან ამ მეტად საპასუხისმგებლო საქმეს“, - განაცხადა ლევან მგალობლიშვილმა.
აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი გუმისთის ბრძოლების 32-ე წლისთავთან დაკავშირებით გმირთა მოედანზე იმყოფებოდა, სადაც საკანონმდებლო და აღმასრულებელი ხელისუფლების წარმომადგენლებთან და სხვა ოფიციალურ პირებთან ერთად, ქვეყნის ერთიანობისთვის ბრძოლაში დაღუპული გმირების ხსოვნას პატივი მიაგო და გმირთა მემორიალი გვირგვინით შეამკო.
„დღეს 32 წელი გავიდა გუმისთის შეტაკებიდან, სადაც ჩვენმა ქართულმა შეიარაღებულმა ძალებმა, საკუთარი სიცოცხლისა და ჯანმრთელობის ფასად, ამ უთანასწორო და სასტიკ ბრძოლაში ათასობით უდანაშაულო მოქალაქის სიცოცხლე გადაარჩინა.
ჩვენი ვალია, გვახსოვდეს ჩვენი გმირი არტილერისტები, პატივი მივაგოთ მათ ხსოვნას და მათდამი სიყვარული და პატივისცემა მომავალ თაობებს გადავცეთ“, - განაცხადა ლევან მგალობლიშვილმა.
მემორიალთან თავდაცვის მინისტრის მოადგილე გრიგოლ გიორგაძე, ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე, საქართველოს პარლამენტის თავდაცვისა და უშიშროების კომიტეტის თავმჯდომარე ალექსანდრე ტაბატაძე, საქართველოს თავდაცვის ძალების მეთაურის მოადგილე - გენერალური შტაბის უფროსი, ბრიგადის გენერალი ჯონი ტატუნაშვილი, აფხაზეთის ავტონომიური რესპუბლიკის მთავრობისა და საქართველოს პარლამენტის წევრები იმყოფებოდნენ.
1993 წლის 15-16 მარტს აფხაზეთში სეპარატისტებმა, დაქირავებულმა "ბოევიკებმა" და სადესანტო შენაერთებმა მდინარე გუმისთის გასწვრივ არსებულ 8 კმ-იან ფრონტის ხაზზე ფართომასშტაბიანი შეტევა დაიწყეს. ქართულმა შეიარაღებულმა ძალებმა და არტილერიამ სოხუმისკენ წამოსულ მოწინააღმდეგეს გამანადგურებელი დარტყმა მიაყენა და იძულებული გახადა უკან დაეხია. უთანასწორო ბრძოლაში ქართველმა მებრძოლებმა საკუთარი სიცოცხლის და ჯანმრთელობის ფასად ათასობით მშვიდობიანი მოქალაქე გადაარჩინეს. ერთ-ერთი გადამწყვეტი როლი ქართული საბრძოლო შენაერთების გამარჯვებაში, ქართველმა არტილერისტებმა ითამაშეს.
აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი, აფხაზეთის მთავრობის მინისტრებთან ერთად, 90-იან წლებში განვითარებული ტრაგიკული მოვლენების დროს დაღუპული სამხედრო პირების სამოქალაქო პანაშვიდს დაესწრო.
სამოქალაქო პანაშვიდზე, სამების საკათედრო ტაძარში საქართველოს პრეზიდენტი, პრემიერ-მინისტრი, პარლამენტის თავმჯდომარე, შერიგებისა და სამოქალაქო თანასწორობის საკითხებში საქართველოს სახელმწიფო მინისტრი, საქართველოს საკანონმდებლო და აღმასრულებელი ხელისუფლების წარმომადგენლები იმყოფებოდნენ, რომლებმაც კიდევ ერთხელ მიუსამძიმრეს გადმოსვენებულთა ოჯახებს და დაღუპულთა ხსოვნას პატივი მიაგეს.
„დღეს პატივს მივაგებთ აფხაზეთიდან გადმოსვენებული უგზო-უკვლოდ დაკარგული პირების ხსოვნას. ისინი ემსახურებოდნენ ქვეყნის ინტერესებს და ყველაზე ძვირფასი, საკუთარი სიცოცხლე შესწირეს საქართველოს დამოუკიდებლობისა და ტერიტორიული მთლიანობის დაცვას.
სამძიმარსა და თანადგომას ვუცხადებ დაღუპულთა ოჯახის წევრებს - მათი მწუხარება ჩვენი საერთო ტკივილია. ჩვენი ვალია არასოდეს დავივიწყოთ ამ ადამიანების ღვაწლი, გავაგრძელოთ სწორი სამშვიდობო პოლიტიკის გატარება და მომავალ თაობებს თავისუფალი და გაერთიანებული საქართველო დავუტოვოთ.
მინდა მადლობა გადავუხადო პროცესში ჩართულ ყველა უწყებას და ორგანიზაციას, რომლებიც დაღუპულთა მოძიების, იდენტიფიცირებისა და გადმოსვენების პროცესში იყვნენ ჩართული“, - განაცხადა ლევან მგალობლიშვილმა.
90-იან წლებში აფხაზეთში განვითარებული ტრაგიკული მოვლენების დროს დაღუპული 6 იდენტიფიცირებული პირის ნეშტის (5 სამხედრო და 1 სამოქალაქო პირი) გადმოსვენება ქართულ-აფხაზური საკოორდინაციო მექანიზმის ფარგლებში გახდა შესაძლებელი.
გადმოსვენებული 2 მებრძოლის ნეშტი დღეს დიღმის ძმათა სასაფლაოზე სამხედრო პატივით დაკრძალეს.
აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი აფხაზეთის მთავრობის წევრებთან ერთად, სამების საკათედრო ტაძარში აფხაზეთიდან გადმოსვენებულთა სამოქალაქო პანაშვიდს დაესწრო.
მთავრობის თავმჯდომარემ პატივი მიაგო საქართველოს ტერიტორიული მთლიანობისთვის დაღუპული გმირების ხსოვნას და გარდაცვლილთა ოჯახებს მიუსამძიმრა.
1990-იან წლებში აფხაზეთში განვითარებული ტრაგიკული მოვლენების დროს დაღუპული 6 იდენტიფიცირებული პირის ნეშტის (5 სამხედრო და 1 სამოქალაქო პირი) გადმოსვენება შერიგებისა და სამოქალაქო თანასწორობის საკითხებში სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი ძალისხმევით, ორმხრივი, ქართულ-აფხაზური საკოორდინაციო მექანიზმის ფარგლებში გახდა შესაძლებელი.
იდენტიფიცირებული 2 მებრძოლის ნეშტს დიღმის ძმათა სასაფლაოზე სამხედრო პატივით დაკრძალავენ.
აფხაზეთის ავტონომიური რესპუბლიკის მთავრობის შემადგენლობაში ცვლილება განხორციელდა. აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა აფხაზეთის განათლებისა და კულტურის მინისტრი დავით მორგოშია აფხაზეთის მთავრობის აპარატის უფროსად დანიშნა, განათლებისა და კულტურის მინისტრის თანამდებობაზე კი ბექა ღვაჩლიანი წარადგინა.
„აფხაზეთის განათლებისა და კულტურის მინისტრი დავით მორგოშია მთავრობის აპარატის უფროსის პოზიციაზე დაინიშნა, ხოლო განათლებისა და კულტურის მინისტრის პოსტზე წარდგენილი იქნება ბექა ღვაჩლიანი. აღნიშნული ცვლილება განპირობებულია მთავრობის საქმიანობის ეფექტიანობის გასაზრდელად.
დავით მორგოშიამ მოკლე პერიოდში განახორციელა მნიშვნელოვანი პროექტები აფხაზეთის განათლებისა და კულტურის სამინისტროში და ურთიერთობა გააღრმავა პარტნიორ ორგანიზაციებთან ადგილობრივ და საერთაშორისო დონეზე, რისთვისაც მას მადლობას ვუხდი. მთავრობის აპარატიდან ის კიდევ უფრო მეტს შეძლებს, რომ ამ და სხვა სამინისტროების მიმართულებებით გააძლიეროს მუშაობა და მინდა წარმატება ვუსურვო მას ამ მეტად მნიშვნელოვან პოზიციაზე", - განაცხადა ლევან მგალობლიშვილმა.
ბექა ღვაჩლიანმა, მთავრობის თავმჯდომარეს გამოცხადებული ნდობისთვის მადლობა გადაუხადა, სამომავლო გეგმებზე და საქმიანობის პრიორიტეტულ მიმართულებებზე ისაუბრა.
„დიდი პატივია აფხაზეთის განათლებისა და კულტურის მინისტრის პოსტის დაკავება. ვაცნობიერებ ამ პასუხისმგებლობას და პირველ რიგში, მადლობას ვუხდი აფხაზეთის მთავრობის თავმჯდომარეს, ბატონ ლევან მგალობლიშვილს გამოცხადებული ნდობისთვის.
ჩვენი პრიორიტეტი იქნება დროებით ოკუპირებულ აფხაზეთში მცხოვრები პედაგოგებისა და ახალგაზრდების მხარდაჭერა ასევე დროებით დევნილი ახალგაზრდების - მათი განათლების, კულტურული თვითგამოხატვისა და პროფესიული განვითარების ხელშეწყობა“, - განაცხადა ბექა ღვაჩლიანმა.
მთავრობის თავმჯდომარემ აფხაზეთის განათლებისა და კულტურის ახლად დანიშნულ მინისტრსა და მთავრობის აპარატის ახალ უფროსს და საქმიანობაში წარმატებები უსურვა.
აფხაზეთის ავტონომიური რესპუბლიკის მთავრობის და აფხაზეთის კულტურის, სპორტის და ახალგაზრდულ საქმეთა სააგენტოს ორგანიზებით, მრავალშვილიანი დედების მხარდასაჭერად, ღონისძიება „ქალი XXI საუკუნეში“ გაიმართა.
ღონისძიების ფარგლებში აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა, აფხაზეთის კულტურის, სპორტის და ახალგაზრდულ საქმეთა სააგენტოს დირექტორ ანი კიტიასთან და აფხაზეთის განათლებისა და კუტურის მინისტრ ბექა ღვაჩლიანთან ერთად, აფხაზეთიდან დროებით დევნილი, მრავალშვილიანი, სხვადასხვა სფეროში მოღვაწე წარმატებული ქალბატონები დააჯილდოვა.
მთავრობის თავმჯდომარემ, სიტყვით გამოსვლისას, საზოგადოებაში ქალთა როლის გაძლიერების აუცილებლობაზე გაამახვილა ყურადღება და ძლიერი, წარმატებული მრავალშვილიანი დედების მხარდაჭერის მნიშვნელობაზე ისაუბრა.
„ჩემთვის ძალიან კარგად არის ნაცნობი ის გამოწვევები, რაც დღეს მრავალშვილიან ოჯახებშია, რადგან მე თავად მრავალშვილიანი მამა ვარ.
უდიდესი პატივისცემა მინდა გამოვხატო მრავალშვილიანი ოჯახების, განსაკუთრებით კი დედების მიმართ. მათ ხელშია ჩვენი მომავალი თაობის აღზრდა და ღირსეულ ადამიანებად ჩამოყალიბება. მრავალშვილიან ოჯახებში გაზრდილი ბავშვები ხშირად მაღალი საზოგადოებრივი პასუხისმგებლობის გრძნობით გამოირჩევიან.
განათლება არის ის ფუნდამენტი, რომელზეც უნდა აშენდეს ჩვენი ძლიერი სახელმწიფო, ხოლო განათლებული თაობა არის ჩვენი იმედი იმისა, რომ უახლოეს პერიოდში, მოძმე აფხაზებთან ერთად, აღვადგინოთ ჩვენი ქვეყნის ტერიტორიული მთლიანობა“, - აღნიშნა ლევან მგალობლიშვილმა.
საქართველოს ეროვნული გმირის, გენერალ-მაიორ გენო ადამიას დაბადების დღესთან დაკავშირებით, აფხაზეთის ავტონომიური რესპუბლიკის მთავრობის თავმჯდომარემ ლევან მგალობლიშვილმა, აფხაზეთის მთავრობის წევრებთან ერთად, გმირთა მოედანზე, გენო ადამიას ბიუსტი ყვავილებით შეამკო და საქართველოს ტერიტორიული მთლიანობისთვის დაღუპული გმირების ხსოვნას პატივი მიაგო.
„დღეს ჩვენ კიდევ ერთხელ პატივს მივაგებთ ჩვენი ქვეყნისთვის თავდადებულ მამულიშვილებს, რომელთა შორის იყო საქართველოს ეროვნული გმირი, გენერალ-მაიორი გენო ადამია.
გენო ადამია იყო პიროვნება, რომელიც სიცოცხლის უკანასკნელ წუთამდე განაგრძობდა საქართველოს ტერიტორიული მთლიანობის დაცვას და ჩვენთვის და ჩვენი მომავალი თაობებისთვის გმირობისა და პატრიოტიზმის შეუფასებელ მაგალითად იქცა.
ჩვენი ვალია, მუდამ გვახსოვდეს ჩვენი ქვეყნის გმირები და ყველაფერი გავაკეთოთ მათი სახელების უკვდავსაყოფად“, - განაცხადა ლევან მგალობლიშვილმა.
გმირთა მოედანზე თბილისის ილორის წმინდა გიორგის სახელობის ტაძრის მეტოქიონის წინამძღვარმა, მამა ლევან ჯანაშიამ დაღუპულთა სულის მოსახსენებელი პანაშვიდი გადაიხადა.
მემორიალთან აფხაზეთის ავტონომიური რესპუბლიკის უმაღლესი საბჭოს დეპუტატები და გენო ადამიას ოჯახის წევრები იმყოფებოდნენ.
გენერალ-მაიორი გენო ადამია საქართველოს შეიარაღებული ძალების 23-ე მექანიზებული ბრიგადის მეთაური იყო. 1993 წლის 27 სექტემბერს, სოხუმის დაცემის შემდეგ, მან უარი თქვა დანებებაზე და მცირე ძალებით განაგრძობდა სეპარატისტებისთვის წინააღმდეგობის ბრძოლას. 28 სექტემბერს ის კელასურის ხიდთან ბრძოლაში დაიღუპა.
გენო ადამიას ცხედარი 1993 წლის ნოემბერში, მისმა თანამებრძოლებმა თბილისში გადმოასვენეს და საბურთალოს სასაფლაოზე დაკრძალეს.
2020 წელს გენო ადამიას საქართველოს ეროვნული გმირის წოდება მიენიჭა.
საქართველოს ეროვნული გმირს ჟიული შარტავას 81 წელი შეუსრულდებოდა. ამ დღესთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა, საქართველოს პარლამენტის წევრ ლიკა შარტავასთან და აფხაზეთის მთავრობის წევრებთან ერთად, ვაკის პანთეონში, ჟიული შარტავას საფლავი ყვავილებით შეამკო და მის ხსოვნას პატივი მიაგო.
„დღეს პატივი მივაგე საქართველოს პირველი ეროვნული გმირის, ჟიული შარტავას ხსოვნას. ჟიული შარტავა თავისი საქმით და იდეებით იყო პიროვნება, რომელიც დაიბადა გმირობისთვის.
ჩემთვის, როგორც აფხაზეთის მთავრობის თავმჯდომარისთვის, ძალიან საამაყოა და ამავე დროს უდიდესი პასუხისმგებლობაც ვიყო მისი თანამდებობრივი მემკვიდრე.
მისმა სიმამაცემ, თავდადებამ და სამშობლოსადმი უანგარო სიყვარულმა, მტკიცე საფუძველი ჩაუყარა საქართველოს დამოუკიდებლობას და სამუდამოდ უკვდავყო ჟიული შარტავას სახელი. რაც მან თავისი სიცოცხლით გაიღო, ამას ჩვენ, ქართველები და აფხაზები, მშვიდობისა და ხალხის ერთობის გზით მივაღწევთ და აღვადგენთ საქართველოს ტერიტორიული მთლიანობას“, - განაცხადა ლევან მგალობლიშვილმა.
ეროვნული გმირის საფლავზე აფხაზეთის უმაღლესი საბჭოს თავმჯდომარე ჯემალ გამახარია, უმაღლესი საბჭოს დეპუტატები და ჟიული შარტავას ოჯახის წევრები იმყოფებოდნენ.
2025 წლის 4-5 მარტს ჟენევის საერთაშორისო მოლაპარაკებების 63-ე რაუნდი გაიმართა. საქართველოს დელეგაციას საგარეო საქმეთა მინისტრის მოადგილე ლაშა დარსალია ხელმძღვანელობდა. სამუშაო ჯგუფის შეხვედრებში აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი მონაწილეობდა.
შეხვედრაზე ქართულმა დელეგაციამ ძირითადი აქცენტი გააკეთა ჟენევის საერთაშორისო მოლაპარაკებების დღის წესრიგის მთავარ საკითხებზე, როგორიცაა რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების სრულად შესრულების აუცილებლობა და ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლში უსაფრთხო და ღირსეული დაბრუნება.
ასევე, ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენის და გალსა და ერგნეთში ხსენებული მექანიზმის რეგულარულად, ფუძემდებლური პრინციპების შესაბამისად გამართვის მნიშვნელობას.
63-ე რაუნდის ფარგლებში საქართველოს დელეგაციამ შეშფოთება გამოხატა ოკუპირებულ რეგიონებში უსაფრთხოების, ჰუმანიტარული და ადამიანის უფლებების კუთხით შექმნილ უმძიმეს ვითარებაზე, მიმდინარე უკანონო მილიტარიზაციაზე, და ამ კონტექსტში, ოჩამჩირეში რუსეთის უკანონო საზღვაო ბაზის მშენებლობისა და სოხუმის აეროპორტის ამოქმედების ფაქტებზე. ქართულმა მხარემ ასევე დაგმო საქართველოს ოკუპირებულ აფხაზეთის რეგიონში ე.წ. საპრეზიდენტო არჩევნების ჩატარება და საოკუპაციო რეჟიმის ლიდერთან რუსეთის პრეზიდენტის დღევანდელი შეხვედრა, რაც წარმოადგენს ანექსიისკენ გადადგმულ მორიგ ნაბიჯებს და უხეშად არღვევს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში.
რუსეთისა და საოკუპაციო რეჟიმების წარმომადგენლებმა, ჩვეული პრაქტიკის მსგავსად, მოლაპარაკებების მაგიდა დატოვეს დღის წესრიგის ერთ-ერთ უმთავრეს საკითხზე, რომელიც ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლში დაბრუნებას შეეხებოდა.
ჟენევის საერთაშორისო მოლაპარაკებები შექმნილია ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე და მის მთავარ განსახილველ საკითხებს ცეცხლის შეწყვეტის შეთანხმების შესრულება, იძულებით გადაადგილებულ პირთა და ლტოლვილთა საკუთარ სახლში უსაფრთხო და ღირსეულ დაბრუნება, რუსეთის ოკუპაციის შედეგად შექმნილი უსაფრთხოებისა და ჰუმანიტარული პრობლემები წარმოადგენს.
მოლაპარაკებები იმართება ევროკავშირის, გაეროს და ეუთოს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე აფხაზეთის ავტონომიური რესპუბლიკის მთავრობის თავმჯდომარე და ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაციის ხელმძღვანელი, ისევე, როგორც ცხინვალსა და სოხუმში რუსეთის საოკუპაციო რეჟიმის წარმომადგენლები.
ჟენევის საერთაშორისო მოლაპარაკებების მორიგი რაუნდი იმართება. ქართული დელეგაციის შემადგენლობაში აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი იმყოფება.
ლევან მგალობლიშვილის განცხადებით, მოლაპარაკებების 63-ე რაუნდის ძირითადი თემები იქნება 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულება და იძულებით გადაადგილებულ პირთა უსაფრთხო და ღირსეული დაბრუნების საკითხები.
„ჟენევაში მოლაპარაკებების 63-ე რაუნდი იწყება, სადაც ქართული მხარე ძირითად ყურადღებას 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობასა და ოკუპირებული ტერიტორიებიდან დროებით დევნილი მოსახლეობის საკუთარ სახლებში უპირობოდ დაბრუნების საკითხებზე გაამახვილებს.
საუბარი ასევე შეეხება ჰუმანიტარული მნიშვნელობის საკითხებს, მათ შორის, თავისუფალი გადაადგილების უფლების შეზღუდვის, მშობლიურ ენაზე განათლების მიღების აკრძალვის და უკანონო დაკავებების ფაქტებს.
განვიხილავთ, ოკუპირებულ ტერიტორიაზე ბოლო პერიოდში განვითარებულ მოვლენებს, მათ შორის, ე.წ. არჩევნების შედეგად არსებულ მდგომარეობას, სოხუმის აეროპორტის გახსნის მიუღებლობას და საოკუპაციო რეჟიმის სხვა დესტრუქციულ ქმედებებს.
გვაქვს მოლოდინი, რომ ჟენევის საერთაშორისო მოლაპარაკებების 63-ე რაუნდი გარკვეულწილად პოზიტიური შედეგების მომტანი იქნება“, - განაცხადა ლევან მგალობლიშვილმა.
დღეს ჟენევაში თანათავმჯდომარეებთან ტექნიკური შეხვედრები იმართება, ხვალიდან კი მოლაპარაკებათა 63-ე რაუნდი ოფიციალურად დაიწყება.
აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი ოკუპირებულ აფხაზეთში მიმდინარე ე.წ. არჩევნების მეორე ტურს ეხმაურება.
მთავრობის თავმჯდომარის განცხადებით, ე.წ. არჩევნები არის არალეგიტიმური პროცესი, რომელიც საქართველოს სუვერენიტეტისა და ტერიტორიული მთლიანობის წინააღმდეგ არის მიმართული.
„საოკუპაციო რეჟიმის პირობებში ჩატარებული ე.წ. არჩევნები არის არალეგიტიმური პროცესი, რომელიც საქართველოს სუვერენიტეტისა და ტერიტორიული მთლიანობის წინააღმდეგ მიმართულ უკანონო ქმედებას წარმოადგენს.
მნიშვნელოვანია, რომ საერთაშორისო თანამეგობრობა და პარტნიორი ქვეყნები ოკუპაციის შედეგად შექმნილ რეალობას ობიექტურად აფასებენ და აგრძელებენ საქართველოს სუვერენიტეტისა და ტერიტორიული მთლიანობის მტკიცე მხარდაჭერას.
აღნიშნული საკითხი იქნება ერთ-ერთი მთავარი თემა ჟენევის საერთაშორისო მოლაპარაკებების 63-ე რაუნდზეც“, - განაცხადა ლევან მგალობლიშვილმა.
ოკუპირებულ აფხაზეთში ე.წ. საპრეზიდენტო არჩევნების მეორე ტური იმართება.