მთავრობის აპარატი
ახალი ამბები
ბათუმში, თამარის დასახლებაში, აფხაზეთიდან დევნილი მოსახლეობისთვის უფასო სამედიცინო გამოკვლევები ჩატარდა. ღონისძიება აფხაზეთის ჯანმრთელობისა და სოციალური დაცვის სამინისტროს ორგანიზებით განხორციელდა, რომელშიც თბილისის წამყვანი კლინიკების ექიმ-სპეციალისტები მონაწილეობდნენ.
სამედიცინო აქციის ფარგლებში აფხაზეთიდან დევნილ ბენეფიციარებს შესაძლებლობა ეძლევათ, უფასოდ ჩაიტარონ მრავალპროფილური გამოკვლევები, ექიმის დანიშნულების შესაბამისად კი მათ უფასო მედიკამენტები გადაეცემათ.
გამოკვლევების მიმდინარეობის პროცესს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ჯანმრთელობისა და სოციალური დაცვის მინისტრი ბესიკ კუსიდი და აჭარის ჯანმრთელობისა და სოციალური დაცვის მინისტრი ნინო ნიჟარაძე გაეცნენ.
მთავრობის თავმჯდომარე ასევე დევნილ ბენეფიციარებს შეხვდა და იმ პროგრამების შესახებ ისაუბრა, რომლებსაც აფხაზეთის მთავრობა დევნილთა საჭიროების გათვალისწინებით 2026 წელს განახორციელებს.
სამედიცინო გამოკვლევების პროგრამის მიზანია დევნილი მოსახლეობის ჯანმრთელობის მდგომარეობის გაუმჯობესება, დაავადებების ადრეული დიაგნოსტიკის ხელშეწყობა და ჯანდაცვის მომსახურებებზე ხელმისაწვდომობის ზრდა.
აფხაზეთიდან დევნილი ვეტერანებისთვის ფსიქოსოციალური და ფიზიკური რეაბილიტაციის მხარდამჭერი საპილოტე პროგრამა დაიწყო, რომელიც აფხაზეთის ჯანმრთელობისა და სოციალური დაცვის სამინისტროს მიერ ხორციელდება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ჯანმრთელობისა და სოციალური დაცვის მინისტრ ბესიკ კუსიდისთან ერთად, წყალტუბოში იმყოფებოდა, სადაც პროგრამის მიმდინარეობას პირადად გაეცნო და პირველ ბენეფიციარებს შეხვდა.
გიორგი ჯინჭარაძის განცხადებით, ვეტერანების მხარდაჭერა აფხაზეთის მთავრობის ერთ-ერთი პრიორიტეტული მიმართულებაა და ყველაფერი კეთდება მათი კეთილდღეობისთვის.
„აფხაზეთის ჯანდაცვის სამინისტროში ამოქმედდა ვეტერანთა რეაბილიტაციის პროგრამა, რომელთა ბენეფიციარები დღეს მოვინახულე. მიხარია, რომ ასეთი კარგი საპილოტე პროგრამა გამოვიდა და სამომავლოდ, აფხაზეთის მთავრობა ყველა იმ პროგრამას, რომელიც ახალი წლიდან განახორციელებს მორგებული იქნება ჩვენი დევნილი მოსახლეობის საჭიროებასა და კეთილდღეობაზე“, - განაცხადა გიორგი ჯინჭარაძემ.
ვეტერანთა რეაბილიტაციის ხელშეწყობის პროგრამის ფარგლებში, წყალტუბოში ოკუპირებული აფხაზეთის ტერიტორიიდან დევნილი, საქართველოს ტერიტორიული მთლიანობის, თავისუფლებისა და დამოუკიდებლობისათვის საბრძოლო მოქმედებების მონაწილე, მკვეთრად, მნიშვნელოვნად და ზომიერად გამოხატული შეზღუდული შესაძლებლობის სტატუსის მქონე ვეტერანები იმყოფებიან.
პროექტის ფარგლებში დაგეგმილია როგორც ინდივიდუალური, ისე ჯგუფური თერაპიის სესიები, ფიზიკური რეაბილიტაცია და პროფესიული კონსულტაციები.
აფხაზეთის ავტონომიური რესპუბლიკის მთავრობის თავმჯდომარის გიორგი ჯინჭარაძის გადაწყვეტილებით, კომპაქტურ ჩასახლებებში ინფრასტრუქტურული საჭიროებების მოგვარების მიზნით, აფხაზეთის ავტონომიური რესპუბლიკის ბიუჯეტიდან 1 500 000 ლარი გამოიყო.
პროექტის ფარგლებში, დევნილთა კომპაქტურ ჩასახლებებში ძირითადად სახურავების გადახურვის, ფასადების რეაბილიტაციის, კომუნიკაციების მოწესრიგების და საერთო სარგებლობის სივრცეების კეთილმოწყობის სამუშაოები განხორციელდება.
მიღებული გადაწყვეტილებების შედეგად, ინფრასტრუქტურული სამუშაოები მიმდინარე წელს დაიწყება და 2026 წელსაც მოიცავს. საერთო ჯამში პროექტის ღირებულება 4 მილიონ ლარს მიაღწევს.
დევნილთა განსახლების ადგილებში არსებული საჭიროებების იდენტიფიცირება მიმდინარე წელს, უშუალოდ გიორგი ჯინჭარაძის და აფხაზეთის მთავრობის წევრების მიერ მოსახლეობასთან აქტიური კომუნიკაციის საფუძველზე განხორციელდა.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე თურქეთის რესპუბლიკის გამოცხადების 102-ე წლისთავისადმი მიძღვნილ საზეიმო მიღებას დაესწრო.
სტუმრებს საქართველოში თურქეთის რესპუბლიკის ელჩმა ალი ქაან ორბაიმ და საქართველოს პარლამენტის თავმჯდომარე შალვა პაპუაშვილმა მიმართეს.
საზეიმო მიღებას საქართველოს აღმასრულებელი და საკანონმდებლო ხელისუფლებისა და დიპლომატიური კორპუსის წარმომადგენლები, ასევე მიწვეული სტუმრები ესწრებოდნენ.
თბილისის ოპერისა და ბალეტის თეატრში მასწავლებლის ეროვნული პრემიის გამარჯვებულთა დაჯილდოების ცერემონია გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო.
ღონისძიებაზე დამსწრე საზოგადოებას სიტყვით საქართველოს პრეზიდენტმა მიხეილ ყაველაშვილმა, პრემიერ-მინისტრმა ირაკლი კობახიძემ, პარლამენტის თავმჯდომარე შალვა პაპუაშვილმა და განათლების, მეცნიერებისა და ახალგაზრდობის მინისტრმა გივი მიქანაძემ მიმართეს. მათ მასწავლებლებს პროფესიული დღე მიულოცეს და მრავალწლიანი შრომისთვის, პროფესიისადმი ერთგულებისთვისა და მომავალი თაობების აღზრდაში შეტანილი ფასდაუდებელი წვლილისთვის მადლობა გადაუხადეს.
განათლების სისტემისა და საზოგადოების განვითარებაში შეტანილი განსაკუთრებული წვლილისთვის 2025 წლის მასწავლებლის ეროვნული პრემია და ფულადი ჯილდო - 10 000 ლარი 10 პედაგოგს გადაეცა.
მასწავლებლის ეროვნული დღე ყოველ წელს ქართველი პედაგოგის, მეცნიერული პედაგოგიკის ფუძემდებლის, პუბლიცისტის, საბავშვო მწერლისა და საზოგადო მოღვაწის, იაკობ გოგებაშვილის დაბადების დღეს, 27 ოქტომბერს აღინიშნება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის განათლებისა და კულტურის მინისტრთან ერთად, აფხაზური ენის დღესთან დაკავშირებით სენაკში, თემურ ბოკუჩავას სახელობის აფხაზეთის №7 საჯარო სკოლაში აფხაზური ენის ინტეგრირებულ გაკვეთილს დაესწრო.
მთავრობის თავმჯდომარემ პედაგოგებსა და მოსწავლეებს მადლობა გადაუხადა იმ მნიშვნელოვანი საქმისთვის, რასაც ისინი აფხაზური ენის შენარჩუნებისა და პოპულარიზაციის მიმართულებით აკეთებენ.
„დღეს სენაკში აფხაზური ენის დღეს აღვნიშნავთ. აფხაზური ენა ჩვენი საერთო კულტურის და იდენტობის ნაწილია, რომლის შენარჩუნება, დაცვა და განვითარება მთავრობის ერთ-ერთი მნიშვნელოვანი ამოცანაა. განსაკუთრებით მნიშვნელოვანია, რომ ახალგაზრდებში გაიზარდოს ინტერესი აფხაზური ენის მიმართ, სწორედ ამიტომ ყველაფერს ვაკეთებთ, რომ სკოლებსა და საგანმანათლებლო სივრცეებში მისი სწავლება და პოპულარიზაცია უფრო გაძლიერდეს.“, - განაცხადა გიორგი ჯინჭარაძემ.
შეხვედრის ფარგლებში გიორგი ჯინჭარაძემ აფხაზური ენის პედაგოგები მადლობის სიგელებით დააჯილდოვა და შემოქმედებით საქმიანობაში წარმატებები უსურვა.
აფხაზური ენის დღე საქართველოში ყოველწლიურად აღინიშნება, რომლის მიზანს აფხაზური ენისა და კულტურის დაცვა, მისი განვითარება და ახალგაზრდა თაობებში პოპულარიზაცია წარმოადგენს.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, საქართველოში იტალიის რესპუბლიკის საგანგებო და სრულუფლებიან ელჩ მასიმილიანო დ’ანტუონოს შეხვდა.
მთავრობის თავმჯდომარემ ელჩს აფხაზეთის მთავრობის საქმიანობის ძირითადი პრიორიტეტები და სამომავლო ხედვები გააცნო.
ყურადღება გამახვილდა ოკუპირებულ აფხაზეთში არსებულ ამჟამინდელ მდგომარეობაზე, როგორც ჰუმანიტარული და საგანმანათლებლო, ასევე, ადამიანთა ფუნდამენტური უფლებების სისტემატური დარღვევის ფაქტებზე.
ელჩმა საქართველოს სუვერენიტეტის და ტერიტორიული მთლიანობის მიმართ იტალიის რესპუბლიკის მთავრობის მტკიცე მხარდაჭერა დაადასტურა.
მხარეებმა ასევე, სხვადასხვა მიმართულებით, ორმხრივი თანამშრომლობის სამომავლო შესაძლებლობები განიხილეს.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე საქართველოს სპორტის მინისტრ შალვა გოგოლაძეს შეხვდა.
სამუშაო შეხვედრაზე თანამედროვე სპორტული ინფრასტრუქტურის მშენებლობისა და აფხაზეთიდან დევნილი ახალგაზრდებისთვის სპორტთან დაკავშირებული შესაძლებლობების გაზრდის საკითხები განიხილეს.
განსაკუთრებული ყურადღება დაეთმო ახალ სპორტულ კომპლექსზე მუშაობას საკითხს, აღნიშნული ინფრასტრუქტურა ხელს შეუწყობს პროფესიული სპორტის განვითარებას და ახალგაზრდებში ჯანსაღი ცხოვრების წესის პოპულარიზაციას.
შეხვედრაზე ასევე სამომავლო ურთიერთთანამშრომლობის პერსპექტივები განიხილეს.
შეხვედრას საქართველოს სპორტის მინისტრის პირველი მოადგილე ირაკლი მეძმარიაშვილი და მინისტრის მოადგილე ირაკლი დოლაბერიძე ესწრებოდნენ.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე ვეტერანის დღისადმი მიძღვნილ ღონისძიებას დაესწრო.
ვეტერანებს სიტყვით მიმართეს და დღევანდელი დღე მიულოცეს საქართველოს პრეზიდენტმა, პრემიერ-მინისტრმა, პარლამენტის თავმჯდომარემ, თავდაცვის მინისტრმა და ვეტერანთა სახელმწიფო დეპარტამენტის ხელმძღვანელმა.
ღონისძიებაზე მიწვეულმა სტუმრებმა წუთიერი დუმილით პატივი მიაგეს საქართველოს ტერიტორიული მთლიანობისათვის დაღუპული გმირების ხსოვნას.
ვეტერანთა დღისადმი მიძღვნილი ღონისძიება ვეტერანების საქმეთა სახელმწიფო სამსახურის ორგანიზებით გაიმართა, რომელსაც საქართველოს აღმასრულებელი და საკანონმდებლო ხელისუფლების, საქართველოს შეიარაღებული ძალების გენერალური შტაბის და საქართველოში აკრედიტებული დიპლომატიური კორპუსის წარმომადგენლები, ომისა და თავდაცვის ძალების ვეტერანები ესწრებოდნენ.
საქართველოში ვეტერანის დღე, 2014 წელს დაარსდა და მას შემდეგ ყოველწლიურად 17 ოქტომბერს აღინიშნება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ჯანმრთელობისა და სოციალური დაცვის მინისტრ ბესიკ კუსიდისთან ერთად, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრ მიხეილ სარჯველაძეს შეხვდა.
სამუშაო შეხვედრაზე განიხილეს აფხაზეთიდან დევნილი მოსახლეობის ჯანმრთელობის დაცვისა და სოციალური უზრუნველყოფის საკითხები. განსაკუთრებული ყურადღება გამახვილდა სამედიცინო სერვისების ხელმისაწვდომობის კიდევ უფრო გაზრდაზე.
საუბარი შეეხო მიმდინარე და დაგეგმილ ინიციატივებს, რომლებიც მიზნად ისახავს აფხაზეთიდან დევნილი მოსახლეობის ჯანმრთელობისა და სოციალური მდგომარეობის გაუმჯობესებას.
მხარეებმა ასევე სამომავლო გეგმებსა და ურთიერთთანამშრომლობის გაღრმავების საკითხებზე ისაუბრეს.
აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ ჟენევის საერთაშორისო მოლაპარაკებების 65-ე რაუნდის მოსამზადებელ შეხვედრაში მიიღო მონაწილეობა.
ევროკავშირიდან, გაეროდან და ეუთოდან მოლაპარაკებების თანათავმჯდომარეებთან შეხვედრას ქართული მხრიდან საგარეო საქმეთა მინისტრის მოადგილე და ჟენევის საერთაშორისო მოლაპარაკებებში საქართველოს დელეგაციის ხელმძღვანელი ლაშა დარსალია ხელმძღვანელობდა.
შეხვედრაზე განსაკუთრებული ყურადღება დაეთმო მოლაპარაკებების ფორმატის ეფექტიანობის უზრუნველყოფის აუცილებლობას და ამ კონტექსტში, აქცენტი გაკეთდა ჟენევის საერთაშორისო მოლაპარაკებების დღის წესრიგის მთავარი საკითხების, რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულებისა და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნების მიმართულებით პროგრესის მიღწევის საჭიროებაზე.
ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენის და გალსა და ერგნეთში ხსენებული მექანიზმის რეგულარულად, ფუძემდებლური პრინციპების შესაბამისად გამართვის მნიშვნელობას.
შეხვედრაზე საქართველოს მხრიდან მწვავედ დაისვა ოკუპირებულ რეგიონებსა და საოკუპაციო ხაზის სიახლოვეს არსებული მწვავე უსაფრთხოების, ჰუმანიტარული და ადამიანის უფლებათა კუთხით არსებული ვითარების საკითხი. გარდა ამისა, ყურადღება გამახვილდა საოკუპაციო რეჟიმის მხრიდან აფხაზეთის რეგიონში ნდობის აღდგენისაკენ მიმართული პროექტების შეზღუდვისა და დაბლოკვის მცდელობებზე.
ჟენევის საერთაშორისო მოლაპარაკებების 65-ე რაუნდის გამართვა დაგეგმილია 2025 წლის 11-12 ნოემბერს.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, საქართველოს პრემიერ-მინისტრთან, პარლამენტის თავმჯდომარესთან, აღმასრულებელი და საკანონმდებლო ხელისუფლების წარმომადგენლებთან ერთად, მცხეთაში, სვეტიცხოვლის საპატრიარქო ტაძარში სადღესასწაულო წირვას დაესწრო.
წირვა სრულიად საქართველოს კათოლიკოს-პატრიარქის მოსაყდრემ, სენაკისა და ჩხოროწყუს მიტროპოლიტმა შიო მუჯირმა, წმინდა სინოდის წევრებთან და მღვდელმსახურებთან ერთად აღავლინა.
საქართველოს მართლმადიდებელი ეკლესია 14 ოქტომბერს სვეტიცხოვლობის დღესასწაულს აღნიშნავს.
აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით, მასწავლებლის საერთაშორისო დღესთან დაკავშირებით, აფხაზეთის ღვაწლმოსილი პედაგოგებისა და აფხაზეთის საჯარო სკოლების წლის საუკეთესო მასწავლებლების დაჯილდოება გაიმართა.
პედაგოგებს მასწავლებლის დღე მიულოცეს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილმა და აფხაზეთის განათლებისა და კულტურის მინისტრმა ბექა ღვაჩლიანმა.
ღონისძიებაზე აფხაზეთის ავტონომიური რესპუბლიკის ღვაწლმოსილი პედაგოგები ეთერი ლაშხია, გულნაზ ბაციაშვილი, მზიანა ბოკუჩავა, ზაირა გვაგვალია, მანანა გიორხელიძე, ნანული ჯახუა და თინათინ კალანდია ასევე, აფხაზეთის საჯარო სკოლების 2025 სასწავლო წლის საუკეთესო მასწავლებლები ირმა კილასონია, თეა კუხიანიძე და ნინო ფარულავა სამინისტროს სიგელებითა და საჩუქრებით დაჯილდოვდნენ.
ღონისძიების ფარგლებში, მომავალი თაობის აღზრდასა და განათლებაში შეტანილი განსაკუთრებული წვლილისთვის თეონა სართანიას, რიტა კეთილაძეს, მანანა ჯოლოგუას, ლონდა ღურწკაიას, მაყვალა მეფორიას და მადინა ცირდავას საქართველოს განათლების, მეცნიერებისა და ახალგაზრდობის სამინისტროსგან სპეციალური სერტიფიკატები გადაეცათ.
დაჯილდოებას აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარია, აფხაზეთის მთავრობის წევრები, უმაღლესი საბჭოს დეპუტატები, აფხაზეთის საჯარო სკოლების მასწავლებლები და დირექტორები ესწრებოდნენ.
აფხაზეთის ღვაწლმოსილი პედაგოგებისა და აფხაზეთის საჯარო სკოლების წლის საუკეთესო მასწავლებლების დაჯილდოება აფხაზეთის განათლებისა და კულტურის სამინისტროს ორგანიზებით ყოველწლიურად იმართება.