სიახლეები

აფხაზეთის ავტონომიური რესპუბლიკის №7 საჯარო სკოლაში, რომელიც სენაკში ფუნქციონირებს, ახალი სასწავლო წლიდან აფხაზური ენის სწავლება დაიწყო.

დღეს, აღნიშნულ სკოლაში აფხაზური ენისა და ლიტერატურის გაკვეთილს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ა/რ განათლებისა და კულტურის მინისტრი დიმიტრი ჯაიანი დაესწრნენ.

სასწავლო პროცესში გამოიყენება აფხაზური ენის შემსწავლელი პროგრამა, აფხაზური მხარის მიერ ქართულენოვანი სკოლებისათვის შექმნილი აფხაზური ენის სახელმძღვანელო, ლექსიკონი და სხვადასხვა თვალსაჩინოება, ფერადი ილუსტრაციები, რუკები, ფოტოები, ვიდეომასალა.

აფხაზური ენის დაცვისა და განვითარების მიზნით, აფხაზეთის ავტონომიური რესპუბლიკის მთავრობა წლების მანძილზე სხვადასხვა მიზნობრივ პროგრამასა და ღონისძიებას ახორციელებს. შეიქმნა აფხაზური ენის შესწავლის ელექტრონული პროგრამა, რომელიც მთავრობის ვებ-გვერდზეა განთავსებული. მისი გამოყენება ნებისმიერი ასაკის ადამიანს შეუძლია.

სკოლის მოსწავლეებმა აფხაზურ ენაზე წარმაოდგინეს მინიატურები, ლექსები და სიმღერები.

ვახტანგ ყოლბაიას განცხადებით, 2017 წლიდან, აფხაზური ენის სწავლება აფხაზეთის ავტონომიური რესპუბლიკის განათლების სამინისტროს დაქვემდებარებაში მყოფ ყველა საჯარო სკოლაში პირველი კლასიდან დაიწყება, შესაბამის პროგრამას და მეთოდოლოგიას საქართველოს განათლების სამინისტრო უკვე ამზადებს. მისივე თქმით, ეს აფხაზი ხალხისკენ გადადგმული კიდევ ერთი ნაბიჯია.

„საქართველოს კონსტიტუციაში წერია, რომ ქართული და აფხაზური სახელმწიფო ენებია. ამიტომ, ბუნებრივია, გადავწყვიტეთ, ენგურს გამოღმა აფხაზეთის განათლებისა და კულტურის სამინისტროს დაქვემდებარებაში მყოფ სკოლებში, შემოვიღოთ აფხაზური ენის სწავლება. რთული ენაა თავისთავად და როგორც ყველა ენას, მასაც სჭირდება სერიოზული მომზადება და მიდგომა. გადავწყვიტეთ, საწყის ეტაპზე სწავლება შემოვიღოთ მხოლოდ მეათე, მეთერთმეტე და მეთორმეტე კლასებში. იმ განზრახვით, რომ ამ ეტაპზე მოზრდილი ბავშვები უკეთ აითვისებენ სალაპარაკო ენას. 2017 წლიდან აფხაზური ენის სწავლებას პირველი კლასიდან დავიწყებთ. სწორედ ამ მიზნით, მთავრობის ხელშეწყობით, საქართველოს განათლების სამინისტრო ჩვენთვის შესაბამის პროგრამას და მეთოდოლოგიას ამზადებს. რა თქმა უნდა, ამას მოჰყვება მასწავლებელთა ტრენინგები, შესაბამისი ლიტერატურის დამუშავება-დასტამბვა. ნაყოფიერად უნდა გამოვიყენოთ დრო, რომ 2017 წლიდან მასობრივად შევუდგეთ აფხაზური ენის სწავლებას. ჩვენთვის, ეს ძალიან სერიოზული ამოცანა და განზრახვაა. უწინარესად, ამით ჩვენ შევძლებთ აფხაზური ენის დაცვასაც და განვითარებასაც, რაც ძალიან მნიშვნელოვანია. ალბათ დააკვირდებოდით, როგორი სიყვარულით ეპყრობიან აფხაზურ ენას ბავშვები - მინიატურებს დგამენ, ლექსებს წარმოთქვამენ, მღერიან. როგორც ხედავთ, აქ სათანადო განწყობაა. მოგეხსენებათ, ნებისმიერი ენის ცოდნა უდიდესი სიმდიდრეა ყოველი ჩვენგანისთვის. მომავალმა თაობებმა უნდა იცოდნენ აფხაზური, რომ გარდატეხა მოახდინონ ქართულ- აფხაზურ ურთიერთობებში, აღადგინონ ურთირთგაგება, ნდობა და სიყვარული. ვფიქრობ, რომ აფხაზური ენის შესწავლა იქცევა ერთ-ერთ მთავარ პატარა ბერკეტად ქართულ-აფხაზური ხიდის აღდგენაში, რომელსაც გულმოდგინედ აშენებს მთელი საქართველო". - განაცხადა ვახტანგ ყოლბაიამ.

დღეს, ქალაქ ჯვარში „ჯვარის სათემო განათლების ცენტრისა“ და აფხაზეთის ავტონომიური რესპუბლიკის განათლებისა და კულტურის სამინისტროს თანამშრომლობით სათემო ბიბლიოთეკა დაფუძნდა.

ბიბლიოთეკის გახსნის ცერემონიალს დაესწრნენ აფხაზეთის ავტონომიური რესპუბლიკის მთავრობის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, სამეგრელო-ზემო სვანეთში აფხაზეთის მთავრობის წარმომადგენლობის ხელმძღვანელი ოთარ გოგოხია და წალენჯიხის მუნიციპალიტეტის გამგებელი გოგა გულორდავა.

აფხაზეთის ავტონომიური რესპუბლიკის  განათლებისა და კულტურის სამინისტროსა და საქართველოს პარლამენტის ილია ჭავჭავაძის სახელობის ეროვნულ ბიბლიოთეკას შორის დადებული თანამშრომლობის მემორანდუმის საფუძველზე, ადგილობრივ სათემო ბიბლიოთეკას საბიბლიოთეკო ფონდის შესაქმნელად საქართველოს პარლამენტის ეროვნულმა ბიბლიოთეკამ სამასამდე, ხოლო აფხაზეთის განათლებისა და კულტურის სამინისტრომ ასამდე წიგნი გადასცა.

ბიბლიოთეკა აფხაზეთიდან დევნილი და ადგილობრივი მოსახლეობის მოთხოვნით შეიქმნა.  პროექტის მიზანია ქ. ჯვარის დასახლების, მიმდებარე სოფლების დევნილი და ადგილობრივი თემის წარმომადგენლების სოციალურ-ეკონომიკური ინტეგრაციის ხელშეწყობა, ახალგაზრდებისთვის ინფორმაციისა და განათლების ხელმისაწვდომობის გაზრდა.

გარდა ამისა, დღესვე, აფხაზეთის მთავრობის წარმომადგენლებმა აფხაზეთიდან დევნილ  და ადგილობრივ მოსახლეობასთან შეხვედრა გამართეს.

საქართველოს ტექნიკური უნივერსიტეტისა და შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატმა საქართველოს ტექნიკურ უნივერსიტეტში „კონფლიქტების დარეგულირების სამართლებრივი, პოლიტიკური და ეკონომიკური კვლევების ცენტრის" მიერ მომაზადებული ნაშრომის - „ჰონკონგი, ჩინეთი-1997" ერთობლივი პრეზენტაცია გამართა.

ნაშრომის შექმნის მოტივაცია განაპირობა საქართველოში არსებულმა მოუგვარებელმა კონფლიქტებმა. „კონფლიქტების დარეგულირების სამართლებრივი, პოლიტიკური და ეკონომიკური კვლევების ცენტრი" კონფლიქტების ჩიხიდან გამოსასვლელი გზების ძიების პროცესში ჰონგ-კონგის ფენომენმა დააინტერესა. 1997 წელი ჰონგ-კონგის ჩინეთის სახლემწიფოს შემადგენლობაში დაბრუნების ფაქტი უნიკალურ მოვლენად იქცა მსოფლიო პოლიტიკურ სვრცეში. ჰონგ-კონგზე ჩინეთის სახელმწიფო სუვერენიტეტის აღდგენამ საერთაშორისო სამართალში კონფლიქტების დარეგულირების მშვიდობიანად გადაწყვეტის პრეცედენტი შექმნა. წიგნის ავტორებმა პროფესორებმა ჯემალ გახოკიძემ და სოფო მიდელაშვილმა საქართველოს ოკუპირებული რეგიონების გათვალისწინებით, მნიშვნელოვნად მიიჩნიეს ამ ისტორიული ფაქტის კვლევა და წიგნის სახით წარდგენა. ის განკუთვნილია როგორც კონფლიქტებითა და საერთაშორისო პოლიტიკით დაინტერესებულ პირთათვის, ისე საზოგადოების ფართო წრისათვის.

პრეზენტაცია მიზნად ისახავს საქართველოში არსებული კონფლიქტების დარეგულირებისათვის ახალი გზების ძეიბას, რეალპოლიტიკის გათვალისწინებით.

პრეზენტაციას ესწრებოდნენ აფხაზეთის ავტონომიური რესპუბლიკის მთავრობის თავმჯდოამრის მოვალეობის შემსრულებელი ვახტანგ ყოლბაია, აფხაზეთის უმღლესი საბჭოსა და აფხაზეთის მთავრობის წარმომადგენლები, საქართველოს პარლამენტისა და მთავრობს წევრები, აღნიშნული პრობლემით დაინტერესებული მეცნიერები.

ვახტანგ ყოლბაიას განცხადებით, აფხაზეთის კონფლიქტის დარეგულირების საქმეში საზოგადოების ყველა ფენა უნდა ჩაერთოს და ეს ნაშრომიც სწორედ ამის მაგალითია.

„არაერთხელ მითქვამს და კვლავაც მინდა გავიმეორო, რომ აფხაზეთის თემას მეცნიერული კვლევა და მიდგომა სჭირდება. 22 წელი გავიდა მას შემდეგ, რაც ფიზიკურად დავშორდით აფხაზეთს. გალის მოსახლეობის საშუალო ასაკი 50 წელს უახლოვდება. დრო ჩვენ სასარგებლოდ არ მუშაობს და არც იმუშავებს თუ ჩვენ მხოლოდ მოლოდინით ვიცხოვრებთ. ასეთი მიდგომა საქართველოს შემადგენლობაში ვერ მოაქცევს აფხაზეთსა და სამაჩაბლოს. დღევანდელი პრეზენტაცია მაგალითია იმისა, რომ მეცნიერულ კვლევებს ალტერნატივა არ გააჩნია. საგულისხმოა წიგნიდან ერთი ამონარიდი, რომელიც ჩემ სათქმელს მთლიანად გამოხატავს. „რეალპოლიტიკა კონფლიქტების მხოლოდ მშვიდობიანად გადაწყვეტის უალტერნატივო და ერთადერთი სწორი გზაა. მიზნის მისაღწევად ომისა და ძალადობის გამოყენება უტოპიაა და მეტი არაფერი". - ჩვენ ერთი წუთითაც არ უნდა გავჩერდეთ. უწინარესად უნდა ვისარგებლოთ იმით, რომ საერთაშორისო თანამეგობრობა აფხაზეთს, როგორც სახელმწიფოს არ აღიარებს. ეს პოლიტიკური ავანსია, რომელსაც გამოყენება სჭირდება. მეცნიერული კვლევა ჰონგ-კონგი, ჩინეთი-1997, როდესაც 99 წლის შემდეგ ინგლისმა ჩინეთს ჰონგ-კონგი დაუბრუნა, შესაძლოა ასი პროცენტით არ ემთხვეოდეს ჩვენს პრობლემას, შესაძლოა ფანტაზიის ნაყოფი და კონტექსტიდან ამოვარდნილიც იყოს. მაგრამ, მთავარი ის გახლავთ, რომ თუნდაც ირიბი პარალელების ძიება, მოწინააღმდეგესთან პოლიტიკური ვაჭრობის საუკეთესო მაგალითების მოხმობა, დიპლომატიური ნიუანსების გამოყენება და მრავალი სხვა მიგვიყვანს პრობლემის სწორ გადაწყეტამდე. მამოძრავებელი ძალა ყოველთვის იყო და არის იდეა, რის ნაკლებობასაც ვუჩივით ჩვენ ყველანი. ეს კი ჩვენი საზოგადოებისთვის უმთავრესია. სწორი გზის ძიებაში მთელი საზოგადოება უნდა ჩაერთოს. მსჯელობა, კამათი, ძიება, კვლევა, აზრთა ჭიდილი, აი სად იბადება ჭეშმარიტება. ყველამ უნდა იცოდეს, რომ ხელებს არ ჩამოვყრით, არ დავიღლებით . საქართველო და აფხაზეთი ერთი სხეულია, რომლის დანაწევრებაც შეუძლებელია.

მინდა დიდი მადლობა გადავუხადო დღევანდელი პრეზენტაციის მესვეურებს, დამსწრე საზოგადოებას, წიგნის ავტორებს, პროფესორებს ჯემალ გახოკიძეს და სოფო მიდელლაშვილს ამ შესანიშნავი ნაშრომისთვის". - განაცხადა ვახტანგ ყოლბაიამ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ ღვაწლმოსილ პედაგოგს, წლების განმავლობაში ქ. სოხუმის №1 საშუალო სკოლის დირექტორს - ლევან ესათიას 70 წლის იუბილე მიულოცა.

სამსახურეობრივი მოვალეობის კეთილსინდისიერად შესრულებისა და წარმატებული საქმიანობისათვის  მადლობის სიგელი და სიმბოლური საჩუქარი  გადასცა. შეხვედრა აფხაზეთის ავტონომიური რესპუბლიკის მთავრობაში გაიმართა და მას აფხაზეთის მთავრობის წევრები ესწრებოდნენ.

ვალერი არქანიას „არტ-გალერეაში“ აფხაზეთის სულიერებისა და კულტურის ცენტრისა და აფხაზეთის შემოქმედ ბავშვთა და ახალგაზრდობის კავშირის „მომავლის ხმა“ ორგანიზებით აფხაზეთიდან დევნილი მოზარდების შემოქმედებითი ნამუშევრების გამოფენა „მშვიდობა უდრის მომავალს“ მოეწყო. პრეზენტაცია მისი უწმინდესობისა და უნეტარესობის, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის  ილია მეორის დაბადებიდან 82 და აღსაყდრებიდან 38 წლისთავს მიეძღვნა.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყობაია, აფხაზეთის უმაღლესი საბჭოს თავმჯდომარე ელგუჯა გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, უმაღლესი საბჭოს დეპუტატები,  აგარ-წალკის ეპარქიის ეპისკოპოსი გრიგოლ კაცია, აფხაზეთის სულიერებისა და კულტურის ცენტრის თავმჯდომარე სვეტლანა ქეცბა, საპატრიარქოს წამომადგენლები, აფხაზეთის მხატვართა კავშირის თავმჯდომარე ალექსანდრე ხუბუა, მხატვრები და პოეტები ესწრებოდნენ. მათ სიტყვით მიმართეს დამსწრე საზოგადოებას და  პროექტის მნიშვნელობაზე ისაუბრეს.

ღონისძიების მხატვრულ ნაწილში ფოლკლორის ეროვნული სკოლა, საპატრიარქოს ფოლკლორული ანსამბლი „შავლეგო“, ხელოვნების სკოლა „აფხაზეთი №1“ და აფხაზეთის შემოქმედ ბავშვთა კავშირი „ მომავლის ხმა“ მონაწილეობდნენ.

  აფხაზეთის ავტონომიური რესპუბლიკის მთავრობა აფხაზურ საზოგადოებას და სრულიად საქართველოს ულოცავს აფხაზური ენის დღეს, რომელიც 27 ოქტომბერს აღინიშნება. დღეს, საქართველო წარმოადგენს შემდგარ სახელმწიფოს, რომლის ფარგლებშიც აღიარებული და დაცულია ავტოქტონური მოსახლეობისა თუ მცირე ეთნიკური ჯგუფების ფუნდამენტური უფლებები. ხელისუფლების მხრიდან, ყველანაირად ხელი ეწყობა მათ პიროვნულ და კულტურულ განვითარებას. ეს კი საუკუნეების მანძილზე ჩამოყალიბებული მაღალი პოლიტიკური სტანდარტების შედეგია.

  საქართველოს კონსტიტუციის თანახმად აფხაზური ენა, ქართულ ენასთან ერთად, სახელმწიფო ენის სტატუსის მატარებელია. სახელმწიფო, მის დაცვასა და განვითარებაზე ისევე ზრუნავს, როგორც ქართულისა და სხვა ენების პატრონობაზე. ამ კონტექსტში, განსაკუთრებით აღსანიშნავია, რომ აფხაზეთის ავტონომიური რესპუბლიკის მთავრობის საგანმანათლებლო დაწესებულებებში ისწავლება აფხაზური ენა და სოხუმის სახელმწიფო უნივერსიტეტში ფუნქციონირებს აფხაზური ენის კათედრა. ამის ფონზე, გულსატკენია ის მდგომარეობა, რომელიც დღესდღეობით შექმნილია ქართულ ენასთან მიმართებაში აფხაზეთის ტერიტორიაზე. ვინაიდან ენა წარმოადგენს მსოფლიო კულტურის საგანძურს და თვითგამოხატვის ერთ-ერთ უმნიშვნელოვანეს ინსტრუმენტს, კონტრპროდუქტიულ შედეგებს იძლევა ადამიანებისთვის საკუთარ ენაზე სწავლების აკრძალვა.

  იმედს გამოვთქვამთ, რომ გათვალისწინებული იქნება აფხაზებისა და ქართველების ურთიერთობების საუკუნეების მანძილზე დაგროვილი გამოცდილება და ჩვენი ერთობლივი ძალისხმევით აღკვეთილი იქნება აფხაზური ენისა და ეთნოსის დაკნინების ნებისმიერი მცდელობა, რომლის უპირველესი დამცველი სწორედ რომ საქართველოს სახელმწიფოა.

  კიდევ ერთხელ, ვულოცავთ ჩვენს აფხაზ თანამოძმეებს და საქართველოს მოსახლეობას დღევანდელ დღეს.

აფხაზეთის ავტონომიური რესპუბლიკის მთავრობა

აფხაზური ენის დღესთან დაკავშირებით აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის განათლებისა და კულტურის მინისტრმა დიმიტრი ჯაიანმა, აფხაზეთის მთავრობის წარმომადგენლებმა და აფხაზეთის საჯარო სკოლის მოსწავლეებმა ცნობილი საზოგადო მოღვაწის, აფხაზური ლიტერატურისა და ისტორიოგრაფიის ფუძემდებლის დიმიტრი გულიას ძეგლი გვირგვინით შეამკეს და პატივი მიაგეს მის ხსოვნას.

აფხაზეთიდან დევნილმა მოზარდებმა ასევე თბილისის მასშტაბით ფლაერები დაარიგეს, სადაც თავმოყრილია ინფორმაცია დიმიტრი გულიას მოღვაწეობასა და აფხაზური დამწერლობის ისტორიაზე.

ღონისძიება აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით გაიმართა.

დღეს, ავჭალაში, დევნილთა კომპაქტურ  ჩასახლება „ბახტრიონის" მიმდებარე ტერიტორიაზე აფხაზეთის ავტონომიური რესპუბლიკის მთავრობის ინიციატივითა და გლდანის გამგეობის მხარდაჭერით ხელოვნურსაფარიანი სტადიონი გაიხსნა.

სტადიონის გახსნას აფხაზეთის ავტონომიური რესპუბლიკის მთავრობის თავმჯდომრის მოვალეობის შემსრულებელი ვახტანგ ყოლბაია, გლდანის რაიონის გამგებელი ბესიკ ქარცივაძე, გლდანის გამგეობისა და აფხაზეთის მთავრობის წარმომადგენლები დაესწრნენ.

მოედანზე ფეხბურთში „ბახტრიონის უბნის" გუნდსა და გლდანის რაიონის ჩემპიონ „ავჭალა" -ს შორის მეგობრული მატჩი გაიმართა.

ვახტანგ ყოლბაიამ  მხარდაჭერისა და გაწეული სამუშაოსათვის თბილისის მერიასა და გლდანის გამგეობას მადლობა გადაუხადა.

„როდესაც თავის დროზე ამ ჩასახლებაში დევნილებს თბილისის მერი დავით ნარმანია და გლდანის რაიონის გამგებელი ბესიკ ქარცივაძე შეხვდნენ, დაპირდნენ,რომაქ აშენდებოდა დიდი სტადიონი, სადაც ითამაშებენ არა მარტო დევნილები, რომელთა შორისაც დაახლოებით 300 ბავშვია, არამედ უბნის სხვა ახალგაზრდებიც. ძალიან მიხარია, რომ მერიამ და გამგეობამ გულთან ახლოს მიიტანეს ეს საკითხიდა ეს სტადიონი ააშენეს. ამ საქმეს უამრავი კარგი შედეგი ექნება.მადლობას ვუხდი მათ და მჯერა, რომ დევნილთათვის კიდევ მრავალი სასიკეთო საქმე გაკეთდება", - განაცხადა ვახტანგ ყოლბაიამ

ზუგდიდის რაიონის სოფელ რიყეში არსებულ მიწის ნაკვეთზე, რომელიც საქართველოს ეკონომიკის სამინისტრომ აფხაზეთის მთავრობას სარგებლობის უფლებით გადმოსცა სიმინდის მორიგი მოსავალი მოვიდა. მოსავლის აღებაში მონაწილეობა მიიღეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის დევნილთა საქმეების დეპარტამენტის თავმჯდომარემ კონსტანტინე კუჭუხიძემ, აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დეპარტამენტის თავმჯდომარე ვალერი ბასარიამ, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრმა დავით გვაძაბიამ, სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელმა ოთარ გოგოხიამ, ასევე აფხაზეთის მთავრობის აპარატისა და მთავრობის უწყებების თანამშრომლებმა.

თხუთმეტი ჰექტარი მიწის ფართობიდან მიღებული 15 ტონა მოსავალი დევნილ ოჯახებს დაურიგდებათ. პროექტი აფხაზეთის მთავრობის მხარდაჭერით 2 წელია ხორციელდება, რომლის ფარგლებშიც დასაქმებულია რამდენიმე ათეული დევნილი ოჯახი.

დღესვე აფხაზეთის მთავრობის წარმომადგენლებმა სოფელ რუხში არსებული სასათბურე მეუნეობაც მოინახულეს, რომელიც იაპონიის საელჩოს დაფინანსებით ხორციელდება.

საქართველოს მეცნიერთა ეროვნული აკადემიის საკონფერენციო დარბაზში სოხუმის ილია ვეკუას ფიზიკა-ტექნიკის ინსტიტუტის (სფტი) დაარსებიდან 70 წლისადმი მიძღვნილი საიუბილეო სხდომა გაიმართა. სხდომა გახსნა და კონფერენციის მონაწილეებს საქართველოს მეცნიერებათა ეროვნული აკადემიის პრეზიდენტი აკადემიკოსი გიორგი კვესიტაძე მიესალმა.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა დაესწრნენ. გია გვაზავამ სიტყვით მიმართა დამსწრე საზოგადოებას.

კონფერენციაში ბირთვული ფიზიკის სფეროში მოღვაწე ქართველი და უცხოელი მეცნიერები მონაწილეობდნენ. სხდომას სოხუმის ილია ვეკუას ფიზიკა-ტექნიკის ინსტიტუტის დირექტორი გურამ ბოკუჩავა უძღვებოდა. მან ინსტიტუტის დაფუძნებიდან დღემდე განვითარების ეტაპებზე ისაუბრა. თუ როგორ ყალიბდებოდა გამოჩენილი გერმანელი მეცნიერების მონაწილეობით, რაც განსაკუთრებულ მოვლენას წარმოადგენს ინსტიტუტის არსებობის ისტორიაში.

ინსტიტუტის საქმიანობის სფერო მოიცავდა როგორც ბირთვული და თერმობირთვული იარაღის შექმნის ტექნოლოგიებს, ასევე სამეცნიერო კვლევებს პლაზმის, მყარი ტანის ფიზიკაში, არატრადიციულ ენერგეტიკაში, ფიზიკურ ელექტრონიკაში და სხვა დარგებში.

მძიმე წლებისა და დევნილობის მიუხედავად, სოხუმის ილია ვეკუას ფიზიკა-ტექნიკის ინსტიტუტმა თბილისში საქართველოს მთავრობის, საქართველოს სამეცნიერო საზოგადოებისა და საერთაშორისო ორგანიზაციების დახმარებით შეძლო ფუნქციონირება.

აფხაზეთის ავტონომიური რესპუბლიკის განათლებისა და კულტურის სამინისტროს „ვალერი არქანიას სახელობის არტ-გალერეაში“ ლევან ესათიას იუბილესადმი მიძღვნილი საღამო გაიმართა. ღვაწლმოსილ პედაგოგს, წლების განმავლობაში ქ. სოხუმის №1 საშუალო სკოლის დირექტორს - ლევან ესათიას აფხაზეთის ავტონომიური რესპუბლიკის კულტურულ-საგანმანათლებლო დაწესებულებებში მუშაობის 45, ხოლო დაბადებიდან 70 წელი შეუსრულდა.

ლევან ესათია ხანგრძლივ პედაგოგიურ, საზოგადოებრივ და შემოქმედებით საქმიანობას ეწეოდა მოზარდი თაობების სწავლისა და აღზრდის, ქართულ-აფხაზურ ურთიერთობათა დარეგულირების, ქართული და აფხაზური სახელმწიფო ენების დაცვისა და შენარჩუნების თვალსაზრისით.

ლევან ესათიას იუბილესთან დაკავშირებით გამოიცა მისი წერილების, სტატიების, ნაშრომების კრებული - წიგნში გაანალიზებულია თანამედროვე აფხაზეთში არსებული ვითარება.

ღონისძიებას ესწრებოდნენ და იუბილარს მიულოცეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის ავტონომიური რესპუბლიკის განათლებისა და კულტურის მინისტრმა დიმიტრი ჯაინმა, აფხაზეთის ავტონომიური რესპუბლიკის უმაღლესი საბჭოს დეპუტატებმა, ლევან ესათიას კოლეგებმა და მეგობრებმა. აფხაზეთის ავტონომიური რესპუბლიკის უმაღლესმა საბჭომ ლევან ესათიას უმაღლესი საბჭოს საპატიო სიგელი გადასცა.

აფხაზეთის ავტონომიური რესპუბლიკის ოთხ საჯარო სკოლაში, რომლებიც თბილისში, ზუგდიდსა და სენაკში ფუნქციონირებს ახალი სასწავლო წლიდან აფხაზური ენის სწავლება დაიწყო.

დღეს აფხაზეთის №2 საჯარო სკოლაში აფხაზური ენისა და ლიტერატურის გაკვეთილს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია,  აფხაზეთის ა/რ განათლებისა და კულტურის მინისტრი დიმიტრი ჯაიანი და მინისტრის პირველი მოადგილე მანანა ქვაჩახია  დაესწრნენ.

სასწავლო პროცესში გამოიყენება აფხაზური ენის შემსწავლელი პროგრამა, აფხაზური მხარის მიერ ქართულენოვანი სკოლებისათვის შექმნილი აფხაზური ენის სახელმძღვანელო, ლექსიკონი და სხვადასხვა  თვალსაჩინოება, ფერადი  ილუსტრაციები, რუკები, ფოტოები, ვიდეომასალა.

საქართველოს კონსტიტუციის თანახმად, "საქართველოს სახელმწიფო ენა არის ქართული, ხოლო აფხაზეთის ავტონომიურ რესპუბლიკაში აგრეთვე - აფხაზური". საქართველოს მთავრობა და საქართველოს განათლებისა და მეცნიერების სამინისტრო აფხაზური ენის განვითარებაზე  განსაკუთრებულად ზრუნავენ. ამ კუთხით აფხაზეთის საჯარო სკოლებში აფხაზური ენის სწავლების შემოღება არის ერთ-ერთი ქმედითი ნაბიჯი აფხაზური ენისა და კულტურის პოპულარიზაციის  გზაზე.

აფხაზური ენის დაცვისა და განვითარებისა მიზნით აფხაზეთის ავტონომიური რესპუბლიკის მთავრობა წლებია სხვადასხვა მიზნობრივ პროგრამასა და ღონისძიებას ახორციელებს. შეიქმნა აფხაზური ენის შესწავლის ელექტრონული პროგრამა, რომელიც მთავრობის ვებ-გვერდზეა განთავსებული. მისი გამოყენება ნებისმიერი ასაკის ადამიანს შეუძლია.

აფხაზეთის ავტონომიური რესპუბლიკის მთავრობის ინიციატივითა და აფხაზეთის ჯანმრთელობისა და სოციალური დაცვის სამინისტროს ორგანიზებით, 17-18 ოქტომბერს, მარტვილში მცხოვრებ დევნილებს მაღალკვალიფიციური სამედიცინო გამოკვლევები ჩაუტარდათ. აქციაში მონაწილეობა თბილისის წამყვანი კლინიკების ექიმებმა, აგრეთვე აფხაზეთის სამედიცინო დაწესებულებების სპეციალისტებმა მიიღეს.

სამედიცინო ჯგუფის შემადგენლობაში იყვნენ: ოჯახის ექიმი, თერაპევტი, პედიატრი, კარდიოლოგი, ნევროლოგი, გინეკოლოგი, ქირურგი, ოფთალმოლოგი, ოტორინოლარინგოლოგი, ენდოკრინოლოგი, უროლოგი, ულტრასონოგრაფიის აპარატურით აღჭურვილი 2 სპეციალისტი, ექიმი-ლაბორანტი, დერმატოლოგი, კარდიოლოგი.

ჩატარდა ლაბორატორიული და ინსტრუმენტული გამოკვლევები.

ბენეფიციარებს საჭირო მედიკამენტები უსასყიდლოდ გადაეცათ.

ღონისძიებას მონიტორინგს აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი, ქეთევან ბაკარაძე პირადად უწევდა.

აფხაზეთის ავტონომიური რესპუბლიკის მთავრობის ორგანიზებითა და აფხაზეთის მეომართა კავშირის ხელშეწყობით, აფხაზეთის მთავრობაში აფხაზეთიდან დევნილ ვეტერანებთან შეხვედრა გაიმართა. ღონისძიებას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დეპარტამენტის თავმჯდომარე ვალერი ბასარია, აფხაზეთის მეომართა კავშირის თავმჯდომარის მოადგილე ზურაბ შამუგია, აფხაზეთის ვეტერანთა სახელმწიფო სამსახურის უფროსი დავით ღვინჯილია და უფროსის მოადგილე თამაზ ინალიშვილი, ასევე სხვა საპატიო სტუმრები დაესწრნენ.

ვახტანგ ყოლბაიამ საქართველოს ერთიანობისთვის ბრძოლაში შეტანილი წვლილისათვის ომის ვეტერანები სიგელებით დააჯილდოვა და მადლობა გადაუხადა საქართველოს ტერიტორიული მთლიანობისთვის გაწეული ღვაწილისათვის. 

ვეტერანებს, „ჩაისა და თაფლის ფესტივალის“ ფარგლებში აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დეპარტამენტმა სიმბოლური საჩუქრები გადასცა, ხოლო აფხაზეთის მეომართა კავშირმა მათ მიერ გამოცემული ჟურნალი „ვეტერანი“ გადასცა.

„თბილისობის“ დღესასწაულის ფარგლებში, ეროვნული მუზეუმის ეზოში „საპატიო თბილისელების“ დაჯილდოების ცერემონია გაიმართა.

„საპატიო თბილისელის“ წოდება სხვადასხვა სფეროში მოღვაწე თერთმეტ ადამიანს მიენიჭა. დედაქალაქის საპატიო მოქალაქის წოდება მიიღეს მწერალმა ლაშა თაბუკაშვილმა, მომღერალმა ფოლად ბიულ-ბიულ ოღლიმ, ექიმმა ბესიკ იაშვილმა, მეცნიერმა მზექალა შანიძემ, მხატვარმა გიორგი (გია) ჯაფარიძემ, არქიტექტორმა ომარ ნაფეტვარიძემ, მოცეკვავე ჯუმბერ ბერაძემ, მთარგმნელმა გივი შაჰნაზარმა, პიანისტმა ალექსანდრე კორსანტიამ, რეჟისორებმა ქეთევან დოლიძემ და გიორგი შენგელაიამ.

დედაქალაქის მერმა დავით ნარმანიამ „საპატიო თბილისელებს“ სიგელები და თბილისის სიმბოლური გასაღები გადასცა. სიმბოლური გასაღები საპატიო თბილისელებთან ერთად ქართველმა მორაგბეებმაც მიიღეს. ვიცე-მერმა ლაშა აბაშიძემ „ბორჯღალოსნებს“ „წლის წარმატებული სპორტსმენის“ სპეციალური სამკერდე ნიშნებიც გადასცა.

დაჯილდოების ცერემონიას თბილისის მერი დავით ნარმანია, საქართველოს კულტურისა და ძეგლთა დაცვის მინისტრი მიხეილ გიორგაძე, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, კულტურის მოღვაწეები და დედაქალაქის სტუმრები დაესწრნენ.