დღეს, აფხაზეთის ჯანდაცვის სამინისტრომ, კლინიკა „ლანცეტის" ხელმძღვანელობა და სამედიცინო პერსონალი წლის განმავლობაში გაწეული თანამშრომლობისათვის მადლობის სიგელებით დააჯილდოვა.

სერტიფიკატები სამედიცინო ცენტრის თანამშრომლებს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ და აფხაზეთის ჯანდაცვის მინისტრმა ქეთევან ბაკარაძემ გადასცეს და თანაგდომისათვის მადლობა გადაუხადეს.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრომ სამედიცინო ცენტრ „ლანცეტთან" ურთიერთთანამშრომლობის მემორანდუმი 2014 წლის აგვისტოში გააფორმა, რომელსც ხელი მოაწერეს ცენტრის გენერალურმა დირექტორმა ფარმან ჯეირანლიმ და აფხაზეთის ჯანდაცვის მინისტრმა ქეთევან ბაკარაძემ.

მემორანდუმის ფარგლებში, აფხაზეთის ჯანდაცვის სამინისტროს მიერ დაგეგმილ სამედიცინო აქციებში, „ლანცეტის" სპეციალისტების მონაწილეობით დევნილი მოსახლეობისთვის არაერთი სამედიცინო-პროფილაქტიკური გამოკვლევა ჩატარდა. დღესვე, კლინიკა „ლანცეტის" გენერალურმა დირექტორმა, ფარმან ჯეირანლიმ გაახმოვანა თავისი გადაწყვეტილება, რომლის თანახმადაც, აფხაზეთის ჯანდაცვის სამინისტროს სამედიცინო პერსონალს საშუალება ეძლევა, მთელი წლის მანძილზე „ლანცეტში" უფასოდ გაიაროს კვალიფიკაციის ასამაღლებელი კურსები, სტაჟირება, დაესწრონ ოპერაციებს. მისივე თქმით, დევნილ პაციენტებს „ლანცეტში" უფასო სამედიცინო კონსულტაციების გავლაც შეეძლებათ.

აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ კლინიკა „ლანცეტის" მესვეურებს დევნილი საზოგადოების მხარდაჭერისა და თანადგომისათვის მადლობა გადაუხადა და აღნიშნა, რომ ამ კლინიკასთან მჭიდრო ურთიერთობა მომავალ წელსაც აუცილებლად გაგრძელდება.

28 დეკემბერს, სასტუმრო ,,თბილისი მერიოტ''-ში მათემატიკის ოლიმპიადა ,,ევერესტის'' გამარჯვებულ მოსწავლეთა დაჯილდოება გაიმართა.

,,ევერესტის''ოლიმპიადის შემოდგომა-ზამთრის სეზონში, პირველ სასკოლო ტურში მონაწილეობა პირველად მიიღო გალის რაიონის სკოლების III-VI კლასების 200-მდე მოსწავლემ. მეორე ტურში, რომელიც ჩატარდა ქალაქ ზუგდიდის სასულიერო გიმნაზიის ბაზაზე, 125 ბავშვი მონაწილეობდა. ,,ვერცხლის ათეულში'' აფხაზეთის მასშტაბით გამარჯვებულმ მესამე კლასელმა მიხეილ შარიამ მათემატიკის ოლიმპიადა ,,ევერესტის'' სიგელი და ფასიანი საჩუქრები მიიღო. აფხაზეთის ავტონომიური რესპუბლიკის მთავრობამ გამარჯვებულ მოსწავლეს საჩუქრად პლანშეტი გადასცა და წარმატებები უსურვა.

ღონისძიებას ესწრებოდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს წარმომადგენელი გია გვასალია და გალის რაიონის საგანმანათლებლო რესურსცენტრის უფროსი ნონა შონია.

აფხაზეთის ავტონომიური რესპუბლიკის მთავრობის „სოლიდარობის ფონდმა" და მოძრაობამ „ვიზრუნოთ ერთმანეთზე" 27 დეკემბერს დევნილი მოსახლეობისათვის მასშტაბური აქცია გამართა. აქციის ფარგლებში 700-მდე დევნილმა ოჯახმა წინასაახალწლოდ საშობაო ნობათი მიიღო.

საქველმოქმედო აქციის ორგანიზებაში ჩართული იყო კავკასიის ახალგაზრდული ალიანსი, აფხაზეთის ავტონომიური რესპუბლიკის მთავრობა, აფხაზეთის უმაღლესი საბჭო, საერთაშორისო და ადგილობრივი ბიზნეს-ორგანიზაციები, არასამთავრობო ორგანიზაციები, კერძო პირები და სასწავლო დაწესებულებები.

მოძრაობის ფარგლებში, 5 დეკემბრიდან მიმდინარეობდა სურსათ-სანოვაგისა და აუცილებელი პირველადი საშუალებების შეგროვება. აქციის ფარგლებში შემოსული პროდუქტები დაურიგდათ II მსოფლიო ომის ინვალიდებსა და ვეტერანებს, აფხაზეთის ომის I ჯგუფის ინვალიდებს, არასრულწლოვან შეზღუდული შესაძლებლობის მქონე მოზარდებს, მარტოხელა დედებსა და აფხაზეთის ომში დაღუპულთა მშობლებს.

მოძრაობის ფარგლებში მოხალისეებად მუშაობენ აფხაზეთის მთავრობისა და უმაღლესი საბჭოს წარმომადგენლები და სტუდენტები.

მოსახლეობისთვის საშობაო ნობათის გაცემა აფხაზეთის განათლებისა და კულტურის სამინისტროს შენობაში გაიმართა.

აქციის შემდეგ, მოძრაობაში „ვიზრუნოთ ერთმანეთზე" აქტიური ჩართულობისათვის აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ ყველა ორგანიზაცია და ინდივიდუალური მონაწილე დააჯილდოვა. კავკასიის ახალგაზრდულმა ალიანსმა კი პროექტში ჩართულ ყველა მოხალისეს სერთიფიკატები გადასცა.

მოძრაობის მიზანი იყო, საზოგადოებაში სამოქალაქო ცნობიერების ამაღლება, ადამიანებისადმი თანადგომა და მოხალისეობის კულტურის დანერგვა საქართველოში.

პროექტის ინიციატორი იყო ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის აპარატი. პროექტში აქტიურად იყო ჩართული აფხაზეთის ავტონომიური რესპუბლიკის ყველა უწყების თანამშრომელი.

დღეს, აფხაზეთის ავტონომიური რესპუბლიკის განათლებისა და კულტურის სამინისტრომ ვალერი არქანიას არტ-გალერეაში ეროვნულ-განმათავისუფლებელი მოძრაობის თვალსაჩინო წარმომადგენლის ვლადიმერ (ვოვა) ვეკუას 65 წლის იუბილესადმი მიძღვნილი საღამო გამართა. ვლადიმერ (ვოვა) ვეკუას ხსოვნას მიეძღვნა აფხაზეთის მხატვართა კავშირის მიერ სპეციალურად ამ დღისთვის ორგანიზებული მხატვართა ნამუშევრების გამოფენა სახელწოდებით "მხატვარი და მიწა". ღონისძიებაში მონაწილეობა მიიღო აფხაზეთის სახელმწიფო კაპელამ.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის  შემსულებელი ვახტანგ ყოლბაია, აფხაზეთის უმაღლესი საბჭოს თავმჯდომარე გია გვაზავა, აფხაზეთის უმაღლესი საბჭოს თავმჯდომარის მოადგილე ჯემალ გამახარია,  აფხაზეის ა/რ მთავრობის სხვა წევრები,  ვლადიმერ ვეკუას მეგობრები და ოჯახის წევრები დასწრნენ.

 ვლადიმერ (ვოვა) ვეკუა ამბობდა: ,,ჩვენ აუცილებლად ვიპოვით გზას აფხაზი ხალხის გულებისაკენ... და ჩვენ ამ გზას უსათუოდ გავივლით. ჩვენი ვალია, ჩვენი გონების, გულის და თავისუფალი ნების თვალსაწიერიდან, აფხაზ ხალხთან ერთად ავმაღლდეთ ურღვევ სულიერ კონსოლიდაციამდე. მხოლოდ ამ შემთხვევაში ვიხილავთ ჩვენ ქრისტიანობის, თავისუფლების, დამოუკიდებლობის გარდაუვალ ტრიუმფს..."

სწორედ ამ სიტყვების დადასტურებაა ვლადიმერ (ვოვა) ვეკუას მიერ განვლილი ცხოვრებისეული გზა და მოწამეობრივი აღსასრული. მომავალი თაობებისათვის მუდამ იქნება სამშობლოსთვის თავგანწირვისა და უკვდავებით დათრგუნული სიკვდილის მაგალითი.

გალის რაიონის რესურსცენტრის ორგანიზებით პროექტის პრეზენტაცია „იცნობდეთ ჩემი კუთხის კულტურულ მემკვიდრეობას" გაიმართა. ღონისძიება აფხაზეთის ა/რ განათლებისა და კულტურის სამინისტროს საგამოფენო დარბაზში მოეწყო.

პროექტის ფარგლებში გამოიფინა თემატური ბანერები და გალიდან გადმოტანილი სიძველეები, ფოტო ალბომები. ასევე, მხატვრის დავით ბაძაღუას ნამუშევრები - აფხაზეთის სხვადასხვა ეკლესიების ტილოები. ნაჩვენები იქნა დოკუმენტური ფილმი ისტორიული სამურზაყანოს - გალის რაიონის კულტურული ფასეულობისა და მისი დღევანდელი მდგომარეობის შესახებ. რესურსცენტრმა კულტურული მემკვიდრეობის შესახებ გალის რაიონიდან მიღებულ მასალები აფხაზეთის ა/რ განათლებისა და კულტურის სამინისტროში შექმნილ კულტურულ ფასეულობათა სამსახურს გადასცა.

პროექტის განხორციელებაში მონაწილეობა მიიღო გალის რაიონის 17-ზე მეტმა სკოლამ. საუკეთესო ნამუშევრების წარმომდგენი სკოლები დაჯილდოვდნენ დიპლომებით, სიგელებითა და ფასიანი საჩუქრებით.

ღონისძიებას აფხაზეთის განათლებისა და კულტურის მინისტრი დიმიტრი ჯაიანი, აფხაზეთის იუსტიციის დეპარტამენტის ხელმძღვანელი იგორ კოპალიანი, პროექტში ჩართული მოსწავლეები, კოორდინატორი მასწავლებლები და აფხაზეთის სტრუქტურის თანამშრომლები, საქართველოს პარლამენტის დიასპორებისა და კავკასიის საკითხთა კომიტეტის, საქართველოს პარლამენტის ტერიტორიული მთლიანობის აღდგენის დროებითი კომისიის აპარატის, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის, საქართველოს ახალგაზრდული პარლამენტის, აფხაზეთის ავტონომიური რესპუბლიკის უმაღლესი საბჭოსა და მთავრობის, აფხაზეთის ა/რ განათლებისა და კულტურის სამინისტროს წარმოამდგენლები, პროფესორ-მასწავლებლები და სტუდენტები დაესწრნენ.

პროექტის მხარდამჭერი იყო საქართველოს საპატრიარქოს ტელევიზია „ერთსულოვნება", რომლის ფარგლებშიც ნაჩვენები იქნა დოკუმენტური ფილმი ისტორიული სამურზაყანოს კულტურული მემკვიდრეობის შესახებ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, სლოვაკეთში მოღვაწე ქართველ ბიზნესმენთან და ქველმოქმედთან, კომპანია „EUROCOM INVESTMENT"-ისა და „GINO-Paradise"-ის დამფუძნებელთან ნოდარ გიორგაძეს შეხვდა, რომლის მიწვევით მიმდინარე წლის ოქტომბერში, აფხაზეთიდან და ცხინვალის რეგიონიდან დევნილი 40 ბავშვი სლოვაკეთის ქალაქ ბეშენოვაში დასასვენებლად გაემგზავრა.

ვახტანგ ყოლბაიამ ქართველ ბიზნესმენ თანადგომისათვის მადლობა გადაუხადა და აფხაზეთის მთავრობის სახელით სამახსოვრო საჩუქრები გადასცა. აფხაზეთის უმაღლესი საბჭოს თავმჯდომარემ გია გვაზავამ კი ნოდარ გიორგაძე საპატიო სიგელით დააჯილდოვა. შეხვედრას ბიზნესმენის ოჯახის წევრები, მთავრობის აპარატის თანამშრომლები და „მშვიდობის მარათონის" პროექტში მონაწილე ბავშვები დაესწრნენ. ბიზნესმენ ნოდარ გიორგაძის ინიციატივით, აღნიშნულ პროქტში მონაწილე ფრიადოსან ბავშვებს დაენიშნათ სტიპენდიები, აგრეთვე ამ პროექტში მონაწილე ყველა ბავშვს საჩუქრად გადაეცათ სპორტულ-სარელაქსაციო კომპლექსი „GINO-Paradise"-ის ბარათი, თვეში ერთხელ სარგებლობის უფლებით. ბავშვები ერთი კვირის განმავლობაში მონაწილეობდნენ კულტურულ-საგანმანათლებლო და სპორტულ-სარელაქსაციო ღონისძიებებში.

პროექტი აფხაზეთის მთავრობის ორგანიზებით, ქ. ბათუმისა და გორის მუნიციპალიტეტების, აგრეთვე თბილისის ვაკის გამგეობისა და ფონდ ,,სარაჯიშვილის" მხარდაჭერით განხორციელდა.

29 დეკემბერს ბიზნესმენის მოწვევით აფხაზეთის საჯარო სკოლის მოსწავლეები და სამხრეთ ოსეთიდან დევნილი ბავშვები საქველმოქმედო აქციის ფარგლებში „ჯინო ფერედაის" ესტუმრებიან. ასევე, მთელი წლის განმავლობაში აფხაზეთის სკოლის მოსწავლეები თვეში ერთხელ სერიოზული საშეღავათო პაკეტით ისარგებლებენ.

23 დეკემბერს ,,ლიდერთა კლუბის ოფისში'', ახალგაზრდა სტუდენტების დავით ჩაკაბერიას და თამარ ბასარიას მიერ გალში გადაღებული 15 წუთიანი ფილმის ,,3 ოქროს'' პრეზენტაცია გაიმართა. ფილმის ჩვენება არასამთავრობო ორგანიზაცია ,,მრავალეროვანი საქართველო დემოკრატიული ღირებულებების განმტკიცებისათვის''- ხელშეწყობით მოეწყო. ფილმის პრეზენტაციას დაესწრნენ აფხაზეთის ავტონომიური რესპუბლიკის დევნილთა საქმეების დეპარტამენტის თავმჯდომარე კონსტანტინე კუჭუხიძე, თავმჯდომარის მოადგილე ვახტანგ ცანავა და დეპარტამენტის თანამშრომლები.

აფხაზეთის ავტონომიური რესპუბლიკის მთავრობის ინიციატივითა და არასამთავრობო ორგანიზაცია ,,მრავალეროვანი საქართველო დემოკრატიული ღირებულებების განმტკიცებისათვის" მხარდაჭერით, სასტუმრო ,,აკადემიურში'' მცხოვრებ დევნილ ბავშვებისათვის საქველმოქმედო აქცია მოეწყო. დევნილთა საქმეების დეპარტამენტის თავმჯდომერემ კონსტანტინე კუჭუხიძემ ბავშვებს ახალი წლის დადგომა მიულოცა და საჩუქრები გადასცა. საქველმოქმედო აქცია აფხაზეთის დევნილთა საქმეების დეპარტამენტის ორგანიზებით მოეწყო.

23 დეკემბერს აფხაზეთის ავტონომიური რესპუბლიკის მთავრობის დევნილთა საქმეების დეპარტამენტის ორგანიზებითა და აღმოსავლეთ საქართველოში აფხაზეთის ავტონომიური რესპუბლიკის მთავრობის წარმომადგენლობის დახმარებით კინოთეატრ "ამირანში" აფხაზეთიდან დევნილი 30 ბავშვისთვის 3Dფორმატში ფილმის ჩვენება გაიმართა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ დღეს ზუგდიდში, იძულებით გადაადგილებულ პირთათვის პოლიკლინიკის გახსნის პრეზენტაცია გამართა. 

კლინიკა აფხაზეთის ავტონომიური რესპუბლიკის მთავრობის დაფინანსებით, საქართველოს შრომის, ჯანმრთელობისა და სოციალური დაცვის სამინისტროსა და ადგილობრივი მუნიციპალიტეტის მხარდაჭერით აშენდა. გახსნის ცერემონიალს ესწრებოდნენ საქართველოს ჯანდაცვის მინისტრის მოადგილე ვალერი კვარაცხელია, აფხაზეთის ჯანდაცვის მინისტრი ქეთევან ბაკარაძე და ადგილობრივი მუნიციპალიტეტის  და გამგეობის ხელმძღვანელები.

პოლიკლინიკაში დასაქმდა 55 აფხაზეთიდან დევნილი ადამიანი.

დევნილთა ორსართულიანი პოლიკლინიკა აღჭურვილია მატერიალურ-ტექნიკური საშუალებებით, სადაც იფუნქციონირებს ამბულატორიული ქირურგიის, ლაბორატორიის, რენტგენისა და ულტრასონოგრაფიის კაბინეტები. იძულებით გადაადგილებულ მოსახლეობას პოლიკლინიკაში ყველა მიმართულების დარგობრივი სპეციალისტი მოემსახურება.

ვახტანგ ყოლბაიას განცხადებით, აფხაზეთის მთავრობამ პოლიკლინიკის აშენება, ბიუჯეტში ეკონომიის ხარჯზე მიღებული სახსრებით შეძლო. მისივე თქმით, მომავალი წლისთვის, აფხაზეთის მთავრობა ახალი კლინიკის ტერიტორიაზე კიდევ ერთი ორსართულიანი, მაღალტექნოლოგიური დიაგნოსტიკური ცენტრის აშენებას გეგმავს.

„ძალიან მახარებს, რომ 2014 წელს, დევნილთა ჯანმრთელობის მოწესრიგების გზაზე, კიდევ ერთი ნაბიჯით წინ წავიწიეთ. მწყობრში ჩადგა პოლიკლინიკა, რომელიც უამრავ დევნილს შეუმსუბუქებს ჯანმრთელობასთან დაკავშირებულ პრობლემებს. ახლა საკუთარი ჭერი გვაქვს, რომელიც პირადად მე, ძალიან დიდ შვებას მგვრის. 21 წელი ხომ ზუგდიდის ცენტრალურ საავადმყოფოს ვიყავით შეკედლებული, როსთვისაც უდიდესი მადლობა მინდა გადავუხადო ზუგდიდის რესპუბლიკური საავადმყოფოს მთელ საექიმო პერსონალს და, რა თქმა უნდა, მთავარ ექიმს, რომეთავ არაფერი დაუშურებიათ და დღე და ღამ ჩვენი დევნილების ჯანმრთელობის სადარაჯოზე იდგნენ.

ახალი კლინიკის ბაზაზე ჩვენი დევნილებისთვის 55 სამუშაო ადგილი შეიქმნა. რა თქმა უნდა, ამას პატარა საქმეს ვერ ვუწოდებ. ვერ დაგიმალავთ და ისიც მეამაყება, რომ პოლიკლინიკა აფხაზეთის მთავრობის მიერ ეკონომიის ხარჯზე მიღებული სახსრებით აშენდა. ეს ჩვენი მთავრობის საახალწლო საჩუქარია ჩვენი მოსახლეობისთვის. ახალი კლინიკა მრავალი ადამიანის შრომის, შემართებისა და თანამშრომლობის შედეგია. მადლობა მინდა გადავუხადო ყველა მათგანს, ვინც არაფერი დაიშურა, რომ დევნილებს საკუთარი ჯანმრთელობის კერა ჰქონოდათ ზუგდიდში. დარწმუნებული ვარ, დასავლეთ საქართველოს მასშტაბით ეს პოლიკლინიკა უამრავ ადამიანს გაუწევს მომსახურებას. მით უმეტეს, რომ მომავალ წელს, აფხაზეთის მთავრობა ახალი კლინიკის ტერიტორიაზე კიდევ ერთი ორსართულიანი, მაღალტექნოლოგიური დიაგნოსტიკური ცენტრის აშენებას გეგმავს. აქვე მინდა გაცნობოთ ისიც, რომ საქართელოს მთავრობა 2015 წელს მრავალპროფილიანი, მულტიკულტურული სამედიცინო, საუნივერსიტეტო კომპლექსის მშენებლობას გეგმავს.

კიდევ ერთხელ მადლობა მინდა გადავუხადო ზუგდიდელებს, იმ ექიმებს, რომელთაც ფასდაუდებელი დახმარება გაგვიწიეს. იმედი მაქვს, პოლიკლინიკის მთავარი ექიმი ბატონი თამაზ ჯანაშია, რომელმაც უკვე ძალიან დიდი შრომა გასწია კლინიკისთვის, თავის გუნდთან ერთად, წარმატებულად გაუძღვება საექიმო და ადმინისტრაციულ საქმიანობას.

განსაკუთრებული მადლობა მინდა გადავუხადო ჯანდაცვის სამინისტროს, ადგილობრივ გამგეობას, ადმინისტრაციას გაწეული სამუშაოსთვის და მხარში ამოდგომისთვის. ყოველ მათგანს ჩვენს დევნილებთან ერთად მინდა მივულოცო დამდეგი შობა-ახალი წელი.

ჯანმრთელობა, ბედნიერება, სიკეთე, ბარაქა, არასოდეს მოკლებოდეს თქვენ და თქვენი ახლობლების ოჯახებს“, – განაცხადა ვახტანგ ყოლბაიამ.

აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია დღეს 14:00 საათზე, იძულებით გადაადგილებულ პირთა ზუგდიდის პოლიკლინიკას გახსნის, რომელიც აფხაზეთის ავტონომიური რესპუბლიკის მთავრობის ფინანსებით, საქართველოს შრომის, ჯანმრთელობისა და სოციალური დაცვის სამინისტროსა და ადგილობრივი მუნიციპალიტეტის მხარდაჭერით აშენდა. გახსნის ცერემონიალს აფხაზეთის შრომისა და ჯამრთელობის მინისტრი ქეთევან ბაკარაძე დაესწრება.

ორსართულიანი დევნილთა პოლიკლინიკა აღჭურვილია მატერიალურ-ტექნიკური საშუალებებით, სადაც იფუნქციონირებს ამბულატორიული ქირურგია, ლაბორატორია, რედგენისა და ულტრასონოგრაფიის კაბინეტები. იძულებით გადაადგილებულ მოსახლეობას პოლიკლინიკაში ყველა მიმართულების დარგობრივი სპეციალისტი მოემსახურება. ღონისძიებაზე მიწვეულნი არიან საქართველოს აღმასრულებელი ხელისუფლებისა და ადგილობრივი მუნიციპალიტეტის წარმომადგენლები.

აფხაზეთის ავტონომიური რესპუბლიკის ფინანსთა და ეკონომიკის სამინისტროს ეკონომიკის დეპარტამენტის ინიციატივით ბორჯომის ხეობაში არსებულ დევნილთა კომპაქტურ ჩასახლებაში მცხოვრები 20-მდე იძულებით გადაადგილებული პირი დასაქმდა. ისინი ბორჯომ-ხარაგაულის ხე-ტყის განაშენიანების პროექტში ჩაერთვებიან.

აღნიშნული პროექტის ფარგლებში, დევნილი მოსახლეობის დასაქმება საქართველოს გარემოსა და ბუნებრივი რესურების დაცვის სამინისტროს სატყეო დეპარტამენტის ხელშეყობითა და ძალისხმევით გახდა შესაძლებელი.

მიმდინარეობს მუშაობა, რათა დევნილები მომავალშიც ჩაერთონ ხე-ტყის მოვლის პროცესში როგორც ბორჯომ-ხარაგაულის რაიონში, ისე მთელი საქართველოს მასშტაბით.

დღეს, 22 დეკემბერს, 11:00 საათზე, საქართველოს პარლამენტში გაიმართა ტერიტორიული მთლიანობის აღდგენის საკითხთა დროებითი კომისიის, ჯანმრთელობის დაცვისა და სოციალურ საკითხთა და საგარეო ურთიერთობათა კომიტეტების ერთობლივი სხდომა, რომელზეც განიხილეს აფხაზეთის მოსახლეობის დემოგრაფიული მდგომარეობა.

შეხვედრას უძღვებოდნენ საპარლამენტო ფრაქცია „ქართული ოცნებისა" და საქართველოს პარლამენტის ტერიტორიული მთლიანობის აღდგენის საკითხთა დროებითი კომისიის თავმჯდომარე გიორგი ვოლსკი და ჯნმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძე. დიმიტრი ხუნდაძემ მოკლედ მიმიოხილა საქართველოს დემოგრაფიული მდგომარეობა და იმ ინიციატივებზე ისაუბრა, რომლებიც უკვე ხორციელდება მოსახლეობის დემოგრაფიული მდგომარეობის გასაუმჯობესებლად.

სხდომაზე მოხსენებები წარმოადგინეს პროფესორმა, ექსპერტმა დემოგრაფიულ საკითხებში ანზორ თოთაძემ და აფხაზეთის ავტონომიური რესუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ. თოთაძემ ოკუპირებულ ტერიტორიაზე მცხოვრები აფხაზი მოსახლეობის დემოგრაფიული მონაცემები წარმოადგინა, ვახტანგ ყოლბაიამ კი განიხილა დევნილობაში მყოფი აფხაზეთის მოსახლეობის დემოგრაფიული მდგომარეობა.

„დღევანდელი შეხვედრა პარლამენტში აფხაზეთის დემოგრაფიული ვითარების საკითხებზე, მართლაც უაღრესად მნიშვნელოვანი თემაა.  აფხაზეთის დემოგრაფიული მდგომარეობა რომ  კატასტროფულია, ეს არაერთხელ გვითქვამს. ახალი კვლევების თანახმად, ხვალ და ზეგ აფხაზეთი და დანარჩენი საქართველო შესაძლოა დემოგრაფიული კატასტროფის წინაშე აღმოჩნდეს. ამიტომ, ეს საკითხი მუდმივად ყურადღების ცენტრში უნდა იყოს. მიუხედავად იმისა, რომ თბილისიდან მიწოდებული ნებისმიერი დახმარება აფხაზეთში პროვოვოკაციად აღიქმება, ჩვენ ყველაფერი უნდა გავაკეთოთ, რომ ჩვენი განგაშის ზარმა აფხაზეთშიც შეაღწიოს. თუ აფხაზი ეთნოსი დაიკარგება, ჩვენი ჯერიც მალე დადგება. ჩვენ ერთმანეთი უნდა გადავარჩინოთ და დახმარების ხელი გავუწოდოთ. 1991-1992 წლების ომი ჩვენთვის კატასტროფული იყო, მაგრამ მიუხედავად გაუცხოებისა, აფხაზურ-ქართული შერეული ოჯახების შექმნა, მაინც გრძელდება; ახლახან ვიყავი ბათუმში და რამდენიმე ასეთი ოჯახი პირადად მოვინახულე.

დღევანდელი მოსმენები პარლამენტში გია ვოლსკის ინიციატივით მოეწყო. სხვადასხვა კომიტეტების მხრიდან გამოითქვა მრავალი მოსაზრება, რომელთაც იმედი მაქვს, მალე კონკრეტული სახე მიეცემა და იმპლემენტაციაც არ დააყოვნებს. დოკუმენტი მხოლოდ დოკუმენტად არ უნდა დარჩეს, მისი მნიშვნელობიდან გამომდინარე, როგორც გია ვოლსკიმ აღნიშნა, ამ საკითხის ირგვლივ სწორი და ადეკვატური ნაბიჯების გადასადგმელად კოორდინაცია უნდა მოხდეს. საკითხი, რომელიც დღეს განვიხილეთ აფხაზეთთან მიმართებაში, ერთ-ერთი ყველაზე უმნიშვნელოვანესია", -  განაცხადა ვახტანგ ყოლბაიამ.

სხდომის მუშაობაში მონაწილეობა ასევე მიიღეს გაეროს ბავშვთა ფონდის, გაეროს მოსახლეობის ფონდის, წითელი ჯვრის ადგილობრივი ორგანიზაციის, საპატრიარქოს, არასამთავრბო ორგანიზაციებისა და აფხაზე ეროვნების წარმომადგენლებმა.

სხდომის ბოლოს, ოთხმა კომიტეტმა მიიღო გადაწყვეტილება აფხაზეთის მოსახლეობის დემოგრაფიული მდგომარეობის გაუმჯობესების მიზნით კონკრეტული წინადადებების შესამუშავებლად.

სხდომის მთავარი გზავნილი საზოგადოებისთვის კი გახლდათ „ერთად გადავარჩინოთ ქართულ-აფხაზური გენოფონდი".

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით 20 დეკემბერს ქ.ხობში შ.პ.ს. „მკურნალის" ბაზაზე ჩატარდა დევნილთა უფასო სამედიცინო გამოკვლევები.

აქციის ფარგლებში დევნილებმა უფასოდ მიიღეს თერაპევტის, ნევროლოგის, კარდიოლოგის, ენდოკრინოლოგის, ოფთალმოლოგის, ოტო-რინო-ლარინგოლოგისა და ქირურგის კონსულტაციები, პაციენტებს ასევე ჩაუტარდათ უფასო ულტრა ბგერითი გამოკვლევები, მიეცათ შესაბამისი რეკომენდაციები და დაურიგდათ გარკვეული სახის მედიკამენტები.

აქციას ესწრებოდნენ აფხაზეთის ჯანმრთელობისა და სოციალური დაცვის მინისტრი ქეთევან ბაკარაძე, აფხაზეთის მთავრობის წევრები, ხობის მუნიციპალიტეტის საკრებულოსა და გამგეობის წევრები.

აფხახზეთის მთავრობის თავმჯდომარის მოვალეობის შემსრულებელი ვახტანგ ყოლბაია ბათუმში გამართულ "ქართველთა და აფხაზთა მეორე ფორუმს"დაესწრო. შეხვედრა ბათუმის ილია ჭავჭავაძის სახელობის სახელმწიფო დრამატულ თეატრში გაიმართა.

,,ქართველთა და აფხაზთა ფორუმზე'' დაამტკიცდა რეზოლუცია და საზოგადოებას წარუდგინეს აფხაზებისადმი მიმართვა. ფორუმის მიზანი იყო მოწვეულ საზოგადოებას გაცნობოდა პროგრამის „ქართულ-აფხაზრუი საგას" ორგანიზატორების მიერ ხუთი წლის განმავლობაში გაწეული მუშაობის შედეგს.

ღონისძიებას აჭარის ა/რ მთავრობის თავმჯდომარე არჩილ ხაბაძე, აფხაზეთის უმაღლესი საბჭოს თავმჯდომარე გია გვაზავა, ქ. ბათუმის მერი გიორგი ერმაკოვი, აფხაზეთისა და აჭარის ავტონომიური რესპუბლიკის მთავრობის წევრები და სხვა საპატიო სტუმრები დაესწრნენ. ფორუმზე სიტყვით გამოვიდნენ ვახტანგ ყოლბაია და გია გვაზავა.

ქ.ბათუმის მერმა გიორგი ერმაკოვმა ნუნუ ჩაუშბას, მარინა ხანთაძეს და რენა სარიშვილს საპატიო ბათუმელის წოდება მიანიჭა.

ღონისძიება ქალთა საერთაშორისო ორგანიზაცია ,,სოროპტიმის-ინტერნაციონალის ბათუმის ორგანიზაციის", აფხაზეთისა და აჭარის ეროვნული მეცნიერებათა აკადემიების ორგანიზებით მოეწყო.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, ზუგდიდში სამუშაო ვიზიტის ფარგლებში დევნილი მოსახლეობას შეხვდა, რომლებიც იძულებით გადაადგილებულ პირთათვის დევნილის სტატუსის დამდგენ კომისიასთან გასაუბრებას გადიან. ვახტანგ ყოლბაია დევნილებს გაესაუბრა და მათი პრობლემები მოისმინა.

დევნილ მოსახლეობასთან შეხვედრის შემდეგ, ვახტანგ ყოლბაიამ სამეგრელო ზემო-სვანეთის მხარეში აფხაზეთის მთავრობის წარმომადგენლობის ხელმძღვანელთან ოთარ გოგოხიასთან და შპს. ზუგდიდის დევნილთა პოლიკლინიკის ხელმძღვანელ თამაზ ჯანაშიასთან ერთად ახალი დევნილთა პოლიკლინიკის მშენებლობის მიმდინარე სამუშაოები დაათვალიერა, რომელიც აფხაზეთის ავტონომიური რესპუბლიკის მთავრობის ფინანსებით შენდება და რამდენიმე დღეში დაიწყებს ფუნქციონირებას.