აფხაზეთის მთავრობის თავმჯდომარის, გიორგი ბარამიას ინიციატივით აფხაზეთიდან დევნილი ბავშვები მთაწმინდის პარკს ეწვივნენ. 7-დან 13 წლამდე ბავშვები ,,ბომბორას"  ატრაქციონებზე უფასაოდ გაერთნენ.

გიორგი ბარამიამ ბავშვებს შობა-ახალი წელი მიულოცა და საახალწლო საჩუქრები გადასცა.

აფხაზეთის მთავრობის თავმჯდომარის განცხადებით, მსგავსი ღონისძიება საქართველოს მასშტაბით მიმდინარებს. საახალწლო საჩუქრები საქართველოს სხვადასხვა რეგიონში 3000-მდე დევნილ ბავშვს დაურიგდა და თვის ბოლომდე საჩუქრებს კიდევ 2000 ბავშვი მიიღებს. 

პროექტში, რომელიც აფხაზეთის მთავრობისა და მთაწმინდის პარკის ადმინისტრაციის ორგანიზებით განხორციელდა, თბილისში კომპაქტურად ჩასახლების სხვადასხვა ობიექტში მცხოვრებმა დევნილმა ბავშვებმა მიიღეს მონაწილეობა.

აფხაზეთის მთავრობის თავმჯდომარის, გიორგი ბარამიას ინიციატივით თბილისში, ნუცუბიძის № 77-ში მცხოვრებ დევნილ ბავშვებს აფხაზეთის  დევნილთა საქმეების დეპარტამენტის წარმომადგენლებმა  საახალწლო საჩუქრები  მიუტანეს.

დევნილთა საქმეების დეპარტამენტის თავმჯდომარემ, გიორგი ბობოხიძემ დევნილ ბავშვებს საჩუქრები პირადად გადასცა და შობა - ახალი წელი მიულოცა.

აღნიშნულ ობიექტზე აფხაზეთიდან იძულებით გადაადგილებული 41 ოჯახი ცხოვრობს.

საახალწლო საჩუქრები, რომლებიც დევნილ  ბავშვებს დაურიგდათ, აფხაზეთის მთავრობას საქველმოქმედო ფონდმა „ კეთილი სამარინელი საქართველოში" გადასცა.

საჩუქრები უკვე  საქართველოს  სხვადასხვა რეგიონში მცხოვრებმა სამი ათასამდე დევნილმა ბავშვმა მიიღო.

აფხაზეთის მთავრობის თავმჯდომარე, გიორგი ბარამია ქ. თბილისში ჩაჩავას №6-ში მდებარე დევნილთა კომპაქტური ჩასახლების ობიექტს ეწვია. გიორგი ბარამიამ აფხაზეთიდან იძულებით გადაადგილებულ პირებს შობა-ახალი წელი მიულოცა და დევნილ ბავშვებს საახალწლო საჩუქრები გადასცა.

აფხაზეთის მთავრობა და ფონდი „კეთილი სამარინელი  საქართველოში" 200-მდე დევნილ  ბავშვს საჩუქრებს თბილისის მასშტაბით დღეს გადასცემენ.

„ჩვენ პატარებს ახალი წელი და დამდეგი შობის ბრწყინვალე დღესასწაული მივულოცეთ. მათ  საჩუქრები გადავეცით და იმედი მაქვს, რომ მოეწონებათ. პატარების გაბრწყინებული თვალები ჩვენთვის ბედნიერების მომტანია. აფხაზეთის მთავრობა ყოველთვის შეეცდება მათ გახარებას,"-განაცხადა გიორგი ბარამიამ.

დევნილმა ბავშვებმა, აფხაზეთის მთავრობის თავმჯდომარეს შობა-ახალი წლის მილოცვისა და საახალწლო საჩუქრებისათვის მადლობა გადაუხადეს.

აფხაზეთის მთავრობის თავმჯდომარე, გიორგი ბარამია დაბადების დღეს ულოცავს უწმინდესსა და უნეტარესს ილია მეორეს, საქართველოს კათალიკოს პატრიარქს, მთავარეპისკოპოსს მცხეთა-თბილისისა და მიტროპოლიტს ბიჭვინთისა და ცხუმ-აფხაზეთის. უსურვებს დიდხანს სიცოცხლესა და ჯანმრთელობას ერისა და ქვეყნის საკეთილდღეოდ.
,,ვულოცავ მის უწმინდესობას დაბადების დღეს, ვუსურვებ დიდხანს სიცოცხლესა და ჯანმრთლეობას ქართველი ერისა და ქვეყნის სანუგეშოდ. ადვილი არაა, ღვთისა და ერის წინაშე ვალის მოხდა. ბედნიერია ის, ვისაც ერთხელ მაინც უგრძვნია მისი უწმინდესობის მადლმოსილება. ბედნიერია ქართველი ერი, რომ ასეთი სულიერი წინამძღოლი ჰყავს. სწორედ რომ იმედის სხივად მოევლინა საქართველოს მისი უწმინდესობა. არაერთი განსაცდელის მიუხედავად, ქართველ ერს წამითაც არ დაუკარგავს განცდა იმისა, რომ ქვეყანას ჰყავს ჭეშმარიტად ღვთის სათნო ადამიანი, რომელიც, საკუთარ ჯვართან ერთად, მთელი ერის ჯვარს ეზიდება. ნიშანდობლივია, რომ თავისი აღსაყდრების 33-ე წლისთავზე მისი უწმინდესობა, წმინდა სინოდის გადაწყვეტილებით, ხდება წინამძღოლი იმ ეპარქიისა, სადაც მტკივნეულად ფეთქავს მთელი საქართველოს გული. თქვენო უწმინდესობავ, გილოცავთ დაბადების 78-ე წლისთავს."

აფხაზეთის მთავრობის თავმჯდომარე, გიორგი ბარამია აფხაზეთის ომის ვეტერანთა ოჯახებს ესტუმრა. მათ დამდეგი შობა-ახალი წელი მიულოცა და საახალწლო ნობათები გადასცა. მთავრობის თავმჯდომარემ, საახალწლო ნობათები გადასცა აფხაზეთის ომის ვეტერანს ანატოლი არაბინსკის რომელმაც, აფხაზეთის ომში ქვედა კიდური დაკარგა. "როცა მომხდური მტერი ჩვენს ქვეყანას უტევდა, ანატოლი ქართველებთან ერთად იცავდა საქართველოს. სამწუხაროდ, აფხაზეთის ომში ანატოლიმ ქვედა კიდური დაკარგა. ის დღეს პირველი ჯგუფის ინვალიდია. მე მინდა მას ვუსურვო, რომ დამდეგი ახალი წელი, საქართველოს გამთლიანების წელი ყოფილიყოს და ანატოლის ჩვენთვის მასპინძლობა მშობლიურ სოხუმში გაეწიოს,"- განაცხადა გიორგი ბარამიამ.

აფხაზეთის ომის ვეტერანმა, გიორგი ბარამიას გულისხმიერებისა და ყურადღებისათვის მადლობა გადაუხადა.

„მადლობას ვუხდი ბატონ გიორგი ბარამიას ომის ვეტერანების მიმართ გამოჩენილი გულისხმიერებისა და ყურადღებისათვის. მისი სტუმრობა ჩვენთვის დიდი იმედისა და სტიმულის მომცემია,"- აღნიშნა ანატოლი არაბინსკმა.

აფხაზეთის მთავრობის თავმჯდომარე, დღის განმავლობაში რამდენიმე ვეტერანის ოჯახს ესტუმრა. მათ დამდეგი შობა-ახალი წელი მიულოცა და საახალწლო საჩუქრები გადასცა.

აფხაზეთის ავტონომიური რესპუბლიკის მთავრობის თავმჯდომარემ, გიორგი ბარამიამ  აფხაზეთის მთავრობის მიერ 2010 წელს გაწეული  მუშაობის შედეგები შეაჯამა.

აფხაზეთის მთავრობის თავმჯდომარის განცხადებით, მიმდინარე წელს მთავრობა ორი ძირითადი, პოლიტიკური და სოციალურ-ეკონომიკური მიმართულებით მუშაობდა.   პოლიტიკური კუთხით აფხაზეთის მთავრობა ჩართული იყო ჟენევის მოლაპარაკებებში, ასევე თანამშრომლობდა საერთაშორისო ორგანიზაციებთან და საქართველოში აკრედიტებულ დიპლომატიურ კორპუსთან. სოციალურ-ეკონომიკური მიმართულებით კი, აფხაზეთის მთავრობა ორიენტირებული იყო დევნილთა საყოფაცხოვრებო პრობლემების გადაჭრაზე.

აფხაზეთის მთავრობის თავმჯდომარის განცხადებით,გასული წელი იმითაც იყო მნიშვნელოვანი, რომ ნატოს საპარალამენტო ასამბლეის მიერ მიღებულ რეზოლუციაში, რუსეთის დიდი წინააღმდეგობის მიუხედავად, ჩაიწერა და ოფიციალურად აღიარებულ იქნა ტერმინი „ოკუპაცია" და „ეთნიკური წმენდა".

2010 წლის შემაჯამებელ ბრიფინგზე,გიორგი ბარამიამ აფხაზეთის მთავრობის მთავარ პრიორიტეტებზე- განათლებისა და ჯანდაცვის სფეროში განხორციელებულ  პროექტებზე ისაუბრა, კერძოდ:

- აფხაზეთიდან დევნილი ბავშვების, საგანმანათლებლო პროგრამით, საზღვარგარეთ, საზაფხულო ბანაკებში დასასვენებლად გაგზავნა;

- აფხაზეთის მთავრობის ინიციატივით, დევნილი ბავშვებისათვის აჭარის რეგიონში სამშვიდობო ბანაკების მოწყობა;

- აფხაზეთის მთავრობამ 2010 წლის დეკემბერის თვეში განახორციელა პროექტი- აფხაზეთის განათლებისა და დასაქმების ფორუმი, რომელშიც მონაწილეობა მიიღო 60-მდე  დამსაქმებელმა  და 3000-ზე მეტმა განათლებისა და დასაქმების მაძიებელმა;

- დევნილმა მოზარდებმა უფასოდ გაიარეს საზაფხულო ინგლისური ენის ინტენსიური კურსები;

- აფხაზეთის მთავრობამ მნიშვნელოვანი ხელშეკრულება გააფორმა იაპონიის საელჩოსთან, რომლის თანახმადაც ქ. თბილისში, კალოუბნის 16-ში მდებარე აფხაზეთიდან იძულებით გადაადგილებულ პირთა  სამედიცინო დაწესებულების შენობის რეაბილიტაციისათვის გრანტის სახით 100 ათასი აშშ დოლარი გამოიყო .

- დევნილებთან მიმართებაში, ჯანდაცვის კუთხით მოქმედებდა14 პროგრამა, რომლის ფარგლებში სამედიცინო მომსახურება გაეწია 4 826 იძულებით გადაადგილებული პირს, ხოლო უფასო სამედიცინო გამოკვლევები 6000-მდე დევნილს ჩაუტარდა;

- აფხაზეთის მთავრობის საქმიანობის მნიშვნელოვან მიღწევად შეიძლება ჩაითვალოს ოკუპირებულ ტერიტორიებზე მცხოვრები მოსახლეობისათვის გაწეული სამედიცინო მომსახურება.

- აფხაზეთის მთავრობისა და საქართველოს იუსტიციის სამინისტროს ძალისხმევით, 500-ზე მეტ ეთნიკურად აფხაზს აღუდგათ საქართველოს მოქალაქეობა.

აფხაზეთის მთავრობის თავმჯდომარე ოკუპირებულ აფხაზეთში  მიმდინარე   მილიტარიზაციის პროცესებსაც შეეხო  და აღნიშნა, რომ საქართველოს პრეზიდენტის სამშვიდობო ინიციატივას ოკუპანტებმა ფიჩორში,  დამატებით  სამხედრო ბაზის  გახსნით უპასუხეს, რაც წლის ნეგატიურ მოვლენად შეიძლება შეფასდეს.

გიორგი ბარამიამ ილორის წმინდა გიორგის სახელობის მე-11 ს. ეკლესიის ხელყოფის ფაქტი კულტურულ გენოციდად შეაფასა და ხაზგასმით  განაცხადა, რომ ოკუპირებულ აფხაზეთში ისტორიულ ძეგლებთან დაკავშირებით სავალალო მდგომარეობაა შექმნილი, საოკუპაციო რეჟიმი  ყოველნაირად ცდილობს ქართული კვალის წაშლას.

გიორგი ბარამიამ აფხაზეთის მთავრობის 2011 წლის პრიორიტეტებზეც ისაუბრა.

„2011 წელს გაგრძელდება ყველა იმ პრიორიტეტული ღონისძიებების დაფინანსება, რაც გათვალისწინებული იყო 2010 წელს. ამასთანავე, 2011 წელს დაგეგმილია სოციალური პროგრამების დაფინანსების ზრდაც.  კიდევ უფრო გააქტიურდება დევნილთა დასაქმებისა და სოციალური პირობების გაუმჯობესების კუთხით მუშაობა,"-განუცხადა ჟურნალისტებს აფხაზეთის მთავრობის თავმჯდომარემ.

დღეს, აფხაზეთის მთავრობის ორგანიზებით,აფხაზეთის ომის ვეტერანებსა და მათი ოჯახის წევრებს სამედიცინო-პროფილაქტიკური გამოკვლევები უტარდებათ.

მაღალკვალიფიციური ექიმებით დაკომპლექტებული ჯგუფი, ომის ვეტერანებსა და მათი ოჯახის წევრებს მთელი დღის განმავლობაში, თბილისში, კალაუბნის №16-ში მდებარე, იძულებით გადაადგილებულ პირთა პოლიკლინიკაში მოემსახურება. საჭიროების შემთხვევაში მათ მედიკამენტებითაც უზრუნველყოფენ.  

სამედიცინო აქციას აფხაზეთის შრომის ჯანმრთელობისა და სოციალუირ დაცვის მინისტრი, ლექსო ლაგვილავა ესწრება.

აფხაზეთის მთავრობის თავმჯდომარის, გიორგი ბარამიას მეუღლე, ქეთევან კაჭარავა აფხაზეთიდან დევნილ, ცხრა ეთნიკურად აფხაზ მოზარდს  შეხვდა და მათ საახალწლო სურვილი აუსრულა: აფხაზმა ბავშვებმა  რადიო ,, აფხაზეთის ხმის " ეთერით  თანატოლებს დამდეგი შობა-ახალი წელი მიულოცეს.

"ბავშვებს  სურვილი ჰქონდათ, ენახათ რადიო ,,აფხაზეთის ხმა" საიდან ახორციელებს მაუწყებლობას. მათ ეს  სურვილი აუსრულდათ  და კიდევ ერთი უნიკალური შესაძლებლობა მიეცათ, თავიანთი თანატოლებისათვის მიელოცათ დამდეგი შობა-ახალი წელი და  ბედნიერ საქართველოში ცხოვრება ესურვათ,"- განუცხადა ჟურნალისტებს ქეთევან კაჭარავამ.

აფხაზ ბავშვებს დამდეგი ახალი წელი  ქართული შოუ-ბიზნესის წარმომადგენლებმაც მიულოცეს. საპატრიარქომ,  სათამაშოების მაღაზიათა ქსელმა  ,,ბაბილინამ" და კომპანია ,,ბარამბომ"  მათ საჩუქრები გადასცეს.

აფხაზეთის ავტონომიური რესპუბლიკის მთავრობის თავმჯდომარე, გიორგი ბარამია კავკასიის უნივერსიტეტს სტუმრობდა. გიორგი ბარამია უმაღლეს სასწავლებლის პროფესორ-მასწავლებლებსა და სტუდენტებს  შეხვდა. 

აფხაზეთის მთავრობის თავმჯდომარემ ოკუპირებულ ტერიტორიებზე მიმდინარე პროცესებზე, ქართული კულტურული მემკვიდრეობის ხელყოფის საკითხებზე, უსაფრთხოებისა და დევნილთა დაბრუნების თემატიკაზე ისაუბრა.

გიორგი ბარამიამ პროფესორ მასწავლებლებსა და სტუდენტებს აფხაზეთის ავტონომიური რესპუბლიკის მთავრობის სამომავლო გეგმები გააცნო.

,,სტუდენტებს ოკუპირებულ აფხაზეთში მიმდინარე პროცესები აინტერესებდათ. ჩვენ მოკლედ განვიხილეთ საკითხები, თუ საიდან იწყებოდა ეს კონფლიქტი, როგორ ღვივდებოდა აფხაზეთში სეპარატიზმი და ვინ იყო მისი ინსპირატორი. შეხვედრის ძირითადი თემა სწორედ ეს იყო,"- განაცხადა აფხაზეთის მთავრობის თავმჯდომარემ. 

კავკასიის უნივერსიტეტის რექტორის, კახა შენგელიას განცხადებით, ისინი აფხაზეთში მიმდინარე პროცესებით ძალიან არიან დაინტერესებულნი და შესაბამისი ინფორმაციის მოსმენა სწორედ აფხაზეთის ავტონომიური რესპუბლიკის მთავრობის თავმჯდომარისაგან მოისურვეს.

აფხაზეთის მთავრობის თავმჯდომარე კავკასიის უნივერსიტეტს, პროფესორ მასწავლებლებისა და სტუდენტების მიწვევით სტუმრობდა.

კავკასიის უნივერსიტეტი კავკასიის ბიზნესის სკოლის ბაზაზე 2004 წელს დაარსდა.

აფხაზეთის მთავრობის თავმჯდომარე, გიორგი ბარამია და საქართველოს პირველი ლედი, სანდრა ელისაბედ რულოვსი შვილთან, ნიკოლოზ სააკაშვილთან ერთად, დევნილი ბავშვებისათვის გამართულ საახალწლო ზეიმს დაესწრნენ.

ღონისძიება, აფხაზეთის მთავრობის ორგანიზებით, ნოდარ დუმბაძის სახელობის მოზარდ მაყურებელთა თეატრში, აფხაზეთიდან დევნილი 1000-მდე მოზარდისთვის გაიმართა.

აფხაზეთის მთავრობის თავმჯდომარემ და საქართველოს პირველმა ლედიმ ბავშვებს დამდეგი შობა-ახალი წელი მიულოცეს და  საჩუქრები გადასცეს. 

"დღევანდელი საღამო გიორგი ბარამიასა და მისი მეუღლის, ქეთევან კაჭარავას ინიციატივით ჩატარდა. მეც მომიწვიეს  ღონისძიებაზე ჩემს უმცროს შვილთან, ნიკუშასთან ერთად. აქ ათასამდე დევნილი ბავშვია შეკრებილი და ყველას  საჩუქრები ელოდება. მივესალმები ბავშვებს და  მათ  დამდეგ ახალ წელს ვულოცავ,"- განუცხადა ჟურნალისტებს სანდრა ელისაბედ რულოვსმა.

სოხუმის მოზარდ მაყურებელთა სახელმწიფო თეატრის „თეთრი ტალღა" მსახიობებმა  საახალწლო ზღაპარი „ახალი წელი მზიანეთში" წარმოადგინეს. საახალწლო ზეიმში ანსამბლი „აფხაზეთი" და აფხაზეთის სახელოვნებო სკოლებიც მონაწილეობდნენ.

28 დეკემბერს, 16:00 საათზე, აფხაზეთის მთავრობის ორგანიზებით, ნოდარ დუმბაძის სახელობის მოზარდ მაყურებელთა თეატრში, 4-დან 10-წლამდე აფხაზეთიდან დევნილი 1000-მდე მოზარდისთვის საახალწლო ზეიმი გაიმართება.

ღონისძიებას, აფხაზეთის მთავრობის თავმჯდომარე, გიორგი ბარამია და საქართველოს პირველი ლედი, სანდრა ელისაბედ რულოვსი შვილთან ერთად დაესწრება.

სოხუმის მოზარდ მაყურებელთა სახელმწიფო თეატრის „თეთრი ტალღა" მსახიობები კოსტუმირებულ საახალწლო ზღაპარს „ახალი წელი მზიანეთში" წარმოადგენენ. საახალწლო ზეიმში ასევე მონაწილეობას მიიღებენ ანსამბლი „აფხაზეთი" და აფხაზეთის სახელოვნებო სკოლები.

აფხაზეთის მთავრობა  ყველა ბავშვს სამახსოვრო საჩუქარსა და ტკბილეულს გადასცემს.

აფხაზეთის ავტონომიური რესპუბლიკის მთავრობის თავმჯდომარე, გიორგი ბარამია დევნილთა სამედიცინო-პროფილაქტიკურ გამოკვლევებს დაესწრო.

სამედიცინო აქცია თბილისში, რკინიგზის კოლეჯის საერთო საცხოვრებელში კომპაქტურად ჩასახლებულ აფხაზეთიდან დევნილ  70-მდე ოჯახს ჩაუტარდა.

„აქ არიან კომპაქტურად ჩასახლებული დევნილები,რომლებსაც სამედიცინო გამოკვლევები უტარდებათ. თუ ვინმეს რაიმე სახის პათოლოგია აღმოაჩნდა, ჩვენ მზად ვართ ისინი მედიკამენტებით უზრუნველვყოთ  და საჭიროების შემთხვევაში სტაციონარში გადავიყვანოთ,"-განაცხადა გიორგი ბარამიამ.

სამედიცინო გამოკვლევებს მთელი დღის განმავლობაში მაღალკვალიფიციური ექიმებით  დაკომპლექტებული ჯგუფი ჩაატარებს.

სამედიცინო აქცია, აფხაზეთის მთავრობის ორგანიზებით ხორციელდება.

აფხაზეთის ავტონომიური რესპუბლიკის მთავრობის თავმჯდომარემ, გიორგი ბარამიამ, წალენჯიხის რაიონის სოფელ ფოცხოეწერში მცხოვრებ დევნილებს დამდეგი ახალი წელი მიულოცა და დევნილ ბავშვებს საახალწლო საჩუქრები გადასცა.

გიორგი ბარამია  დევნილთა სოციალური მდგომარეობით დაინტერესდა და მათ საყოფაცხოვრებო პირობებს გაეცნო. რამდენიმე ოჯახს დავალიანების გამო ელექტროენერგია არ მიეწოდებოდა, რომელიც აფხაზეთის მთავრობის თავმჯდომარის დავალებით მოგვარდა. 

გიორგი ბარამია ქ. ზუგდიდში, აფხაზეთიდან დევნილი ბავშვებისათვის გამართულ საახალწლო ზეიმსაც დაესწრო. ღონისძიებას ოკუპირებული გალის რაიონიდან გადმოსული ბავშვებიც ესწრებოდნენ. აფხაზეთის მთავრობის თავმჯდომარემ პატარებს  საახალწლო საჩუქრები გადასცა.

აფხაზეთის ავტონომიური რესპუბლიკის მთავრობის თავმჯდომარემ, გიორგი ბარამიამ ბათუმში მიმდინარე აფხაზთა და ქართველთა პირველ სახალხო ფორუმს დროული მოვლენა უწოდა.

„ქართულ-აფხაზური დიალოგი აჭარიდან უნდა დაიწყოს,"- ეს განცხადება აფხაზეთის ავტონომიური რესპუბლიკის მთავრობის თავმჯდომარემ ფორუმის დასრულების შემდეგ გააკეთა.

გიორგი ბარამიას განცხადებით, აფხაზებისთვის ყველაზე მძიმე პერიოდში, როცა მათ ცარისტული რუსეთი დევნიდა, უამრავმა მუჰაჯირმა თავი სწორედ აჭარას შეაფარა.

„მაშინ, როდესაც აფხაზებს მეფის რუსეთმა გენოციდი მოუწყო და ოსმალეთის იმპერიაში გადაასახლა, მათ დახმარების ხელი აჭარაში მცხოვრებმა ქართველებმა გაუწოდეს. სწორედ ამიტომ, იმ აფხაზებს, რომლებიც დღემდე ჩვენი ქვეყნის ამ ერთ-ერთ ულამაზეს კუთხეში ცხოვრობენ, ქართულ-აფხაზური სახალხო დიალოგის დაწყებაში განსაკუთრებული როლი ენიჭებათ," - განაცხადა აფხაზეთის მთავრობის თავმჯდომარემ.

გიორგი ბარამიამ საქართველოს პრეზიდენტის მიერ სხვადასხვა საერთაშორისო ორგანიზაციაში გამოსვლისას გაჟღერებულ სამშვიდობო ინიციატივაზეც ისაუბრა და აღნიშნა, რომ აფხაზთა და ქართველთა პირველი სახალხო ფორუმი კიდევ ერთი დასტურია იმისა, რომ ქართველებს აფხაზებთან ერთად ერთ სახელმწიფოში მშვიდობიანი თანაცხოვრება სურთ და ამ სურვილს ასრულება უწერია.

აფხაზეთის ავტონომიური რესპუბლიკის მთავრობის თავმჯდომარემ, გიორგი ბარამიამ ბათუმში, ფერიას დასახლებაში მცხოვრებ აფხაზურ ოჯახებს დამდეგი ახალი წელი მიულოცა.

აფხაზეთის მთავრობის თავმჯდომარე ასლან შერვაშიძისა და ლიანა აგრბას ოჯახებს ეწვია და მათ საახალწლო საჩუქრები გადასცა.

გიორგი ბარამია აფხაზ ოჯახებს  კონფლიქტის დარეგულირების საქმეში მათ ჩართულობასა და ამ კუთხით სახალხო დიპლომატიის როლის გაზრდის აუცილებლობაზე ესაუბრა.