მთავრობის აპარატი
ახალი ამბები
თბილისის საკრებულოს თამარ მეფის სახელობის დარბაზში მშობლიური ენის საერთაშორისო დღისადმი მიძღვნილი ღონისძიება გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის განათლებისა და კულტურის მინისტრი ეკა ხოფერია და აფხაზეთის კულტურის, სპორტის და ახალგაზრდულ საქმეთა სააგენტოს დირექტორი ლიკა კვარაცხელია ესწრებოდნენ.
მშობლიური ენის საერთაშორისო დღისადმი მიძღვნილი საღამო თბილისის საკრებულოს თავმჯდომარე გიორგი ტყემალაძემ გახსნა, რომელმაც დამსწრე საზოგადოებას ენის საერთაშორისო დღე მიულოცა.
ღონისძიებაზე სიტყვით გამოვიდნენ საკრებულოს განათლებისა და კულტურის კომისიის თავმჯდომარე კახა ლაბუჩიძე, სახელმწიფო ენის დეპარტამენტის ხელმძღვანელი გიორგი ალიბეგაშვილი, აფხაზეთის ავტონომიური რესპუბლიკის მთავრობის, განათლებისა და მეცნიერების სამინისტროს, სახელმწიფო უნივერსიტეტების წარმომადგენლები, ენათმეცნიერები და ეროვნული უმცირესობების წარმომადგენლები.
თბილისის საკრებულოში წარმოდგენილი იყო უიშვიათესი მასალა ხელნაწერთა ეროვნული ცენტრიდან, ასევე ასოციაცია „ქართული შრიფტის“ მიერ წარმოდგენილი შრიფტების ნიმუშები (სხვადასხვა ეპოქის), ლექსიკონები, იშვიათი მხატვრული გამოცემები და თარგმანები.
ღონისძიების ფარგლებში, თბილისის მოსწავლე-ახალგაზრდობის ეროვნული სასახლის ქორეოგრაფიული ანსამბლების „ლაშქარის“ და „თამარიონის“ მიერ შესრულდა აფხაზური და ოსური საცეკვაო ნომრები. ასევე წარმოდგენილი იყო თოჯინების თეატრალური სანახაობაც.
სამი კალიგრაფის მიერ, ადგილზე შესრულდა ბანერი, წარწერით „მშობლიური ენის საერთაშორისო დღე“, რომელზეც საპატიო წევრებმა ღონისძიების ბოლოს ხელი მოაწერეს.
მშობლიური ენის საერთაშორისო დღე იუნესკომ ენობრივი და კულტურული მრავალფეროვნების შენარჩუნების, განვითარებისა და წარმოჩენის მიზნით, 1999 წელს დააწესა.
აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, შერიგებისა და სამოქალაქო თანასწორობის საკითხებში საქართველოს სახელმწიფო მინისტრი თეა ახვლედიანი და ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ზურაბ აზარაშვილი სამუშაო ვიზიტით, ზუგდიდის მუნიციპალიტეტში, სოფელ რუხში ენგურის ხიდსა და რუხის მრავალპროფილურ კლინიკაში იმყოფებოდნენ.
ვიზიტი, შერიგებისა და ჩართულობის სახელმწიფო სტრატეგიის გადახედვის ფარგლებში, ერთ-ერთი პრიორიტეტული მიმართულების - კონფლიქტის შედეგად დაზარალებული მოსახლეობის ხარისხიან ჯანდაცვაზე წვდომის შემდგომი განვითარებისა და გაუმჯობესების კუთხით, ადგილზე არსებული მდგომარეობის გაცნობას და სამომავლო ხედვებზე ერთობლივ მსჯელობას ისახავდა მიზნად.
მთავრობის წარმომადგენლებმა მოინახულეს რუხის მრავალპროფილური კლინიკა, რომელიც გამყოფი ხაზის ორივე მხარეს მცხოვრები კოვიდ-პაციენტებისა და ჯანდაცვის სახელმწიფო რეფერალური პროგრამის ფარგლებში ოკუპირებული აფხაზეთიდან გადმოსული პირების მკურნალობას ემსახურება.
შეხვედრა გაიმართა კლინიკის მედპერსონალთან, სადაც სამედიცინო დაწესებულების შემდგომი ფუნქციონირების დახვეწისა და კონფლიქტით დაზარალებული მოსახლეობისთვის შესაბამისი მომსახურებების გაუმჯობესების მიზნით, სამედიცინო მიმართულებით სამომავლო განვითარების გზები განიხილეს.
რუსლან აბაშიძე, თეა ახვლედიანი და ზურაბ აზარაშვილი ენგურის ხიდზე, საოკუპაციო ხაზთან მივიდნენ, სადაც ოკუპირებული აფხაზეთიდან გადმოსულ მოსახლეობას შეხვდნენ და ადგილზე გაეცნენ სხვადასხვა სახელმწიფო უწყების წარმომადგენლების მიერ მათთვის საჭირო სერვისების მიწოდების პროცესს. შეხვედრებში, ასევე, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ლევან ჩაკვეტაძე მონაწილეობდა.
ნდობის აღდგენისა და შერიგების საკითხებში საერთაშორისო გამოცდილების გაზიარებისა და სამშვიდობო პროცესებში საერთაშორისო თანამეგობრობის აქტიური ჩართულობის გაზრდის მიზნით საუზმის ფორმატში შეხვედრა გაიმართა.
შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის მთავრობის წევრები, საქართველოში აკრედიტებული დიპლომატიური კორპუსის წარმომადგენლები და საერთაშორისო ორგანიზაციები მონაწილეობდნენ. ღონისძიების ფარგლებში აფხაზეთის მთავრობისა და აფხაზეთის საინფორმაციო-ანალიტიკური ცენტრის მიერ განხორციელებული პროექტების პრეზენტაცია გაიმართა.
ღონისძიება სამშვიდობო პროცესების ხელშეწყობის მიზნით აფხაზეთის საინფორმაციო-ანალიტიკური ცენტრის ორგანიზებით და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მხარდაჭერით განხორციელდა.
აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძესა და საქართველოს პარლამენტის თავმჯდომარე შალვა პაპუაშვილს შორის სამუშაო შეხვედრა გაიმართა.
შეხვედრის მონაწილეებმა ისაუბრეს ოკუპირებულ აფხაზეთში არსებულ ვითარებასა და გამოწვევებზე როგორც პოლიტიკური კუთხით, ასევე უსაფრთხოების, ადამიანის უფლებებისა და ჰუმანიტარული მიმართულებით.
შეხვედრაზე საუბარი შეეხო იმ პრიორიტეტულ საკითხებს, რომლებსაც აფხაზეთის ავტონომიური რესპუბლიკის მთავრობა ჯანდაცვის, განათლებისა და დევნილთა სოციალურ-ეკონომიკური მდგომარეობის გაუმჯობესების მიმართულებებით ახორციელებს.
საქართველოს პარლამენტის თავმჯდომარემ დევნილთა საკითხების მიმართ სრული მხარდაჭერა და თანამშრომლობის მზადყოფნა გამოთქვა.
აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრ ზურაბ აზარაშვილს შეხვდა.
შეხვედრის მონაწილეებმა ოკუპირებული ტერიტორიებიდან იძულებით გადაადგილებული პირების საცხოვრებელი პირობებით უზრუნველყოფის მიზნით დაგეგმილი პროექტები განიხილეს. როგორც ჯანდაცვის მინისტრმა განაცხადა, აღნიშნული მიმართულებით უწყება აქტიურად მუშაობს და მიმდინარე წლის განმავლობაში იძულებით გადაადგილებულ პირთა ნაწილი, ახალ საცხოვრებელ ფართს მიიღებს.
შეხვედრას საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე ილია ღუდუშაური, აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა მინისტრი დავით ფაცაცია და აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ლევან ჩაკვეტაძე ესწრებოდნენ.
აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ აფხაზეთის კულტურის, სპორტის და ახალგაზრდულ საქმეთა სააგენტოს დირექტორ ლიკა კვარაცხელიასთან და აფხაზეთის სულიერების ცენტრის დირექტორ ბესიკ სილაგაძესთან ერთად, საქართველოს საპატრიარქოს პატრონაჟის ქვეშ მყოფი ბავშვთა თავშესაფარი მოინახულა, ბავშვებს ახალი წელი მიულოცა და საჩუქრები გადასცა.
თავშესაფრში ასევე იმყოფებოდნენ აფხაზეთის კულტურის, სპორტის და ახალგაზრდულ საქმეთა სააგენტოს მხარდაჭერილი პროექტის „ანბანით მოხატული ახალი წელი“ მონაწილე დევნილი ახალგაზრდები, რომლებმაც ბავშვთა სახლის აღსაზრდელებს სპეციალურად მათთვის შექმნილი საახალწლო ხელნაკეთი ნამუშევრები გადასცეს საჩუქრად.
ღონისძიების ფარგლებში ბავშვთა თავშესაფარს ნაძვის ხე და საახალწლო ნობათი გადაეცა. ბავშვების სადღესასწაულო განწყობაზე თოვლის ბაბუამ იზრუნა.
აფხაზეთის ავტონომიური რესპუბლიკის მთავრობის ინიციატივით დიმიტრი ცინცაძის სახელობის ფონდს, რომელიც ლეიკემიითა და სოლიდური სიმსივნეებით დაავადებულ ბავშვებს მკურნალობაში ეხმარება, აფხაზეთიდან დევნილი ბავშვებისთვის ერთჯერადი ფულადი დახმარება გადაეცა.
ასევე, ერთჯერადი ფინანსური დახმარება გადაეცა „მშობელთა ხიდის“ თბილისის 6-დან 18 წლამდე და 18 წლის ზემოთ ასაკის შშმ ბავშვთა/პირთა დღის ცენტრს, სადაც არიან მათ შორის აფხაზეთიდან დევნილი ბენეფიციარები.
აფხაზეთის ავტონომიური რესპუბლიკის მთავრობაში აფხაზეთის სპორტული ორგანიზაციების წარმომადგენლებთან შეხვედრა გაიმართა. შეხვედრაში აფხაზეთის მთავრობის თავმჯდომარე რუსლან აბაშიძე მონაწილეობდა.
შეხვედრაზე აფხაზეთის სპორტული საზოგადოებებისა და კლუბების წინაშე არსებულ გამოწვევებზე ისაუბრეს. განიხილეს თანამშრომლობისა და სამომავლო ერთობლივი პროექტების განხორციელების შესაძლებლობები. აფხაზეთის მთავრობის თავმჯდომარემ შეხვედრის მონაწილეებს სხვადასხვა ინიციატივების განხორციელებაში მხარდაჭერა აღუთქვა.
დღეს საქართველოს ტექნოლოგიურ პარკში აფხაზეთის ავტონომიური რესპუბლიკის განათლებისა და კულტურის სამინისტროს მიერ შექმნილი მობილური აპლიკაციის აფხაზეთის კულტურული მემკვიდრეობა/Abkhazia Heritage პრეზენტაცია გაიმართა.
პრეზენტაციაზე აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის განათლებისა და კულტურის მინისტრმა ეკა ხოფერიამ საზოგადოებას ახალი აპლიკაცია წარუდგინეს და მისი შექმნის მნიშვნელობაზე ისაუბრეს.
მობილურ აპლიკაციაში ქართულ, აფხაზურ და ინგლისურ ენებზე თავმოყრილია ინფორმაცია აფხაზეთის კულტურული მემკვიდრეობის შესახებ, წარმოჩენილია მისი კულტურულ-ისტორიული მნიშვნელობა და ამჟამინდელი მძიმე მდგომარეობა. აპლიკაციის ლოგოში გამოყენებულია ბედიის ოქროს ბარძიმის - ქართული ოქრომჭედლობის ძეგლის (X-XI სს.) გრაფიკული გამოსახულება.
აპლიკაცია აფხაზეთის ავტონომიური რესპუბლიკის საინფორმაციო-ანალიტიკური ცენტრის იდეის საფუძველზე შეიქმნა და მისი მიზანია აფხაზეთის კულტურული მემკვიდრეობის დაცვა, შენახვა და პოპულარიზაცია.
მობილური აპლიკაცია აფხაზეთის კულტურული მემკვიდრეობა/Abkhazia Heritage ხელმისაწვდომია Android და iOS პლატფორმებისთვის და დაინტერესებულ პირებს შეუძლიათ ჩამოტვირთონ Play Store-დან და App Store-დან.
შოთა რუსთაველის სახელობის აკადემიური თეატრის სცენაზე აფხაზეთის სიმღერისა და ცეკვის სახელმწიფო აკადემიურ ანსამბლ „აფხაზეთი“-ს კონცერტი „ქორეონიკონი“ გაიმართა. ანსამბლი მაყურებლის წინაშე განახლებული პროგრამით წარსდგა. ანსამბლის სამხატვრო ხელმძღვანელია ბაჩანა ჭანტურია, დირიჟორი თორნიკე მანწკავა, ხოლო კოსტიუმების მხატვარი ეკატერინე ჯავახიშვილი.
ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, საქართველოს აღმასრულებელი და საკანონმდებლო ხელისუფლების, თბილისის მერიის და საკრებულოს, საქართველოში აკრედიტებული დიპლომატიური მისიების წარმომადგენლები, აფხაზეთის მთავრობის წევრები და უმაღლესი საბჭოს დეპუტატები, აფხაზეთის საზოგადოება ესწრებოდნენ.
საპრემიერო კონცერტები რუსთაველის თეატრში 28-29 დეკემბერს გაგრძელდება.
საქართველოს საგარეო საქმეთა სამინისტროს ორგანიზებით, განსაკუთრებული ღვაწლის მქონე დიასპორის წარმომადგენლების დაჯილდოების ოფიციალური ცერემონია „დიასპორის დაჯილდოება 2021“ გაიმართა.
ცერემონია ვიცე-პრემიერმა, საგარეო საქმეთა მინისტრმა დავით ზალკალიანმა გახსნა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, საქართველოს საკანონმდებლო და აღმასრულებელი ხელისუფლების წარმომადგენლები და მოწვეული სტუმრები ესწრებოდნენ.
2021 წლის გამარჯვებულები გამოვლინდნენ შემდეგ ნომინაციებში: ქართული კულტურის პოპულარიზაციაში შეტანილი წვლილისათვის, მეცნიერების განვითარებაში შეტანილი წვლილისათვის, სპორტის განვითარებაში შეტანილი წვლილისათვის, სახალხო დიპლომატიაში შეტანილი წვლილისათვის, საქველმოქმედო საქმიანობაში შეტანილი წვლილისთვის, საქართველოს უცხოელი მეგობარი. ნომინაციაზე „საქველმოქმედო საქმიანობაში შეტანილი წვლილისათვის“ გამარჯვებულ ხატია ხაბულიანს ჯილდო აფხაზეთის მთავრობის თავმჯდომარე რუსლან აბაშიძემ გადასცა.
„დიასპორის დაჯილდოება 2021“-ის მიზანია საზღვარგარეთ მცხოვრები თანამემამულეების დამსახურების აღიარება, რომლებმაც პროფესიულ წარმატებებს მიაღწიეს ადგილსამყოფელ ქვეყნებში და ასევე, წვლილი შეიტანეს საქართველოს განვითარების საქმეში, საქართველოს იმიჯის, ქართული კულტურის, სპორტისა და მეცნიერების პოპულარიზაციაში.
დაჯილდოების ცერემონიაზე მუსიკალური ნომრები შეასრულეს ესპანეთიდან და სლოვენიიდან ჩამოსულმა ანსამბლებმა. ორივე ანსამბლი ქართულ კლასიკურ და ხალხურ მუსიკას ასრულებს და დაკომპლექტებულია პროფესიონალი ესპანელი და სლოვენიელი მომღერლებისგან.
ღონისძიება მიგრაციის პოლიტიკის განვითარების საერთაშორისო ცენტრთან (ICMPD) და ევროკავშირის მიერ დაფინანსებულ პროექტთან ENIGMMA (მიგრაციის მართვის გაძლიერება საქართველოში) თანამშრომლობით გაიმართა.
სენაკში, თემურ ბოკუჩავას სახელობის აფხაზეთის №7 საჯარო სკოლაში სპორტული დარბაზი საზეიმოდ გაიხსნა. ახალგარემონტებული დარბაზი აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის განათლებისა და კულტურის მინისტრმა ეკა ხოფერიამ გახსნეს.
ღონისძიებას სამეგრელო-ზემო სვანეთის რეგიონის სახელმწიფო რწმუნებულის მოადგილე დავით ვერავა და სენაკის მუნიციპალიტეტის მერი ვახტანგ გადელია ესწრებოდნენ.
აფხაზეთის №7 საჯარო სკოლაში თანამედროვე სტანდარტების შესაბამისი სპორტული დარბაზი მოეწყო, რომელიც აღჭურვილია ყველა საჭირო სპორტული ინვენტარით. აფხაზეთიდან დევნილ მოზარდებს სპორტის გაკვეთილები თანამედროვე და უსაფრთხო გარემოში ჩაუტარდებათ.
დარბაზის რეაბილიტაცია საქართველოში სლოვაკეთის რესპუბლიკის საელჩოს მიერ სლოვაკეთის ოფიციალური დახმარების (SLOVAKAID) ფარგლებში გამოცხადებულ მცირე საგრანტო კონკურსის ფარგლებში განხორციელდა.
„გარდენ ჰოლში“ აფხაზეთის კულტურის, სპორტის და ახალგაზრდულ საქმეთა სააგენტოსა და ჟურნალ „სითის“ ერთობლივი პროექტის „მე აფხაზეთისთვის“ მონაწილეთა დაჯილდოება გაიმართა. კონკურსის ნომინანტებს სპეციალური პრიზები აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და პროექტის ავტორებმა გადასცეს.
პროექტი „მე აფხაზეთისთვის“ უკვე მეორე წელია იმართება და მიზნად ისახავს გააცნოს საზოგადოებას სხვადასხვა სფეროში მოღვაწე, წარმატებული ადამიანები აფხაზეთიდან. კონკურსის შედეგად შეირჩა საუკეთესო და საინტერესო ისტორიის მქონე ათი გმირი, რომლებზეც მომზადდება სპეციალური ფოტოპროექტი, დაიწერება მცირე ისტორიები და შემდეგ გამოქვეყნდება ჟურნალ „სითი“-ში. მასალა ასევე განთავსდება გამომცემლობის ონლაინ პლატფორმასა და სააგენტოს ვებგვერდზე.
„გარდენ ჰოლში“ წიგნის „აფხაზეთის სპორტული ქრონიკები“ პრეზენტაცია გაიმართა. წიგნი აფხაზეთის განათლებისა და კულტურის სამინისტროს მხარდაჭერით გამოიცა და მასში თავმოყრილია 250-მდე ქართველი, აფხაზი, ბერძენი, რუსი, უკრაინელი და სომეხი სპორტსმენის ბიოგრაფია, რომელთაც სპორტის განვითარებაში ფასაუდებელი წვლილი მიუძღვით.
ღონისძიების ფარგლებში, ასევე აფხაზეთიდან დევნილი წარმატებული სპორტსმენების და დამსახურებული მწვრთნელების დაჯილდოება გაიმართა. სპეციალური კომისიის მიერ მიმდინარე წლის საუკეთესო სპორტსმენებად რუსლან დარსანია, მამუკა ბიძინაშვილი, სანდრო ლოლაძე, გიორგი ჯანაშია, ნიკოლოზ პერტაია, ნათია გადელია, მარიამ მურღვლიანი, გურამ ვეკუა, გოგიტა არქანია, ირმა ხეცურიანი, ირინა ხაბურძანია და საბა ადამია დასახელდნენ.
სპორტსმენებს საპატიო სიგელები და სიმბოლური საჩუქრები აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, სამხრეთ ოსეთის დროებითი ადმინისტრაციის ხელმძღვანელმა დიმიტრი სანაკოევმა, განათლებისა და კულტურის მინისტრმა ეკა ხოფერიამ და აფხაზეთის კულტურის, სპორტის და ახალგაზრდულ საქმეთა სააგენტოს დირექტორმა ლიკა კვარაცხელიამ გადასცეს. ღონისძიებას ცნობილი სპორტსმენები და აფხაზეთის საზოგადოების წარმომადგენლები ესწრებოდნენ.
წარმატებული სპორტსმენების დაჯილდოება აფხაზეთის ავტონომიური რესპუბლიკის განათლებისა და კულტურის სამინისტროს პროგრამის ფარგლებში ყოველწლიურად იმართება. ნომინანტების შერჩევა სპორტული ორგანიზაციების და ფედერაციების მიერ წარდგენილი კანდიდატების საფუძველზე, საგანგებოდ შექმნილი კომისიის მიერ ხორციელდება.
საქართველოს განათლებისა და მეცნიერების სამინისტროს და საქართველოს სავაჭრო-სამრეწველო პალატის ერთობლივი ინიციატივით, საჯარო-კერძო პარტნიორობის ფორმატში დაფუძნებული პროფესიული უნარების სააგენტოს წარდგენის ღონისძიება გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო.
დამსწრე საზოგადოებას სიტყვით მიმართა განათლებისა და მეცნიერების მინისტრმა მიხეილ ჩხენკელმა, რომელმაც პროფესიული განათლების განვითარების მიმართულებით გადადგმულ ნაბიჯებზე ისაუბრა და საერთაშორისო პარტნიორებს მხარდაჭერისა და ნაყოფიერი თანამშრომლობისთვის მადლობა გადაუხადა.
ღონისძიებაზე ასევე სიტყვით გამოვიდნენ საქართველოს ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, საქართველოს სავაჭრო-სამრეწველო პალატის პრეზიდენტი გიორგი პერტაია, საქართველოს ბიზნეს-ასოციაციის (BAG) აღმასრულებელი დირექტორი ლევან ვეფხვაძე, საქართველოში გაერო-ს განვითარების პროგრამის (UNDP) მუდმივი წარმომადგენელი ნიკ ბერესფორდი და საქართველოში ევროკავშირის წარმომადგენლობის თანამშრომლობის განყოფილების უფროსის მოადგილე კატალინ გერმანი.
პროფესიული უნარების სააგენტოს როლი და ფუნქცია იქნება საქართველოს პროფესიული განათლების მოქნილი სისტემის განვითარება საჯარო-კერძო პარტნიორობის გაძლიერებით, რაც უზრუნველყოფს ხარისხის გაუმჯობესებას, შრომის ბაზართან დაახლოებასა და ეფექტიან კოორდინაციას. სააგენტოს შექმნას წინ უსწრებდა კვლევები და ხანგრძლივი კონსულტაციები საქართველოში მოქმედ დამსაქმებელთა გაერთიანებებთან. სწორედ საჯარო და კერძო სექტორების ერთობლივი ინიციატივისა და ინოვაციურობის გამო, პროფესიული განათლების სისტემის მართვის ახალი მოდელი მსოფლიო ეკონომიკური ფორუმის მიერ აღიარებულია საუკეთესო პრაქტიკად.