აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

ახალი ამბები
ევროპის ჩემპიონატის საკვალიფიკაციო მატჩს საქართველოსა და დანიის საფეხბურთო ნაკრებებს შორის აფხაზეთიდან დევნილი ახალგაზრდები დაესწრნენ

აფხაზეთის ავტონომიური რესპუბლიკის განათლებისა და კულტურის სამინისტროს, სპორტისა და ახალგაზრდული სამსახურის ორგანიზებითა და აფხაზეთის ფეხბურთის ფედერაციისა და საქართველოს ფეხბურთის ფედერაციის ინიციატივით 8 სექტემბერს, თბილისში ბორის პაიჭაძის სახელობის ეროვნულ სტადიონზე გამართულ ევროპის ჩემპიონატის საკვალიფიკაციო მატჩს საქართველოსა და დანიის საფეხბურთო ნაკრებებს შორის აფხაზეთიდან დევნილი კომპაქტურ ჩასახლებებში მცხოვრები ახალგაზრდები დაესწრნენ.

ქვეპროგრამის „თანაბარი შესაძლებლობები - თანაბარი მზრუნველობა“ ფარგლებში ტრენინგი გაიმართა

ქვეპროგრამის „თანაბარი შესაძლებლობები - თანაბარი მზრუნველობა“ ფარგლებში  აფხაზეთისა და ოკუპირებული გალის რაიონის საჯარო/საშუალო  სკოლების სპეციალური მასწავლებლების პროფესიული გადამზადების ტრენინგი გაიმართა.

აფხაზეთის ავტონომიური რესპუბლიკის განათლებისა და კულტურის სამინისტრომ, განათლების და საგანმანათლებლო პროგრამების სამსახურის ორგანიზებით გამართა გადამზადების ტრენინგი თემაზე - ზოგადი განათლების  დაწყებითი  საფეხურის (I-VI) კლასების დამხმარე სასწავლო ტექნოლოგიის თემატიკაზე.

ტრენინგს ესწრებოდნენ აფხაზეთის საჯარო სკოლებისა და ოკუპირებული გალის რაიონის საშუალო  სკოლების სპეციალური და დაწყებითი  საფეხურის პედაგოგები.

ტრენინგის ფარგლებში სპეციალურმა და დაწყებითი საფეხურის პედაგოგებმა მიიღეს ინფორმაცია  ნეირომეცნიერების უახლესი მიღწევებისა და კვლევების შესახებ. ტრენინგ-მოდული ასევე  ითვალისწინებდა სპეციალური საჭიროების მქონე ბავშვებისათვის ვიზუალური და აუდიო მეხსიერების განმავითარებელი სასწავლო სტრატეგიების შესწავლას.

პედაგოგები გაეცნენ ამ დარგში არსებულ ისეთ სტრატეგიებს, როგორიცაა წარმოსახვითი უნარების განვითარებისა და გაცნობიერების სტრატეგიები, რომელთა გამოყენებაც მოსწავლეთა სწავლის უნარების განვითარების კუთხით აუცილებელი და მნიშვნელოვანია.

ტრენინგის მსვლელობისას მონაწილეები უზრუნველყოფილნი იყვნენ შესაბამისი ვიდეო და სასწავლო მასალით. მონაწილეებს გადაეცათ კურსის გავლის დამადასტურებელი სერტიფიკატები.

სამუშაო პროცესს დაესწრო აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე მანანა ქვაჩახია.

აფხაზეთის ა/რ განათლებისა და კულტურის სამინისტრო აცხადებს კონკურს უცხო ქვეყნის უმაღლეს საგანმანათლებლო დაწესებულებაში სამაგისტრო პროგრამებზე სწავლის დაფინანსებაზე

აფხაზეთის ა/რ განათლებისა და კულტურის სამინისტრო 2019 წლის ,,წარმატებული  ახალგაზრდების მხარდაჭერის პროგრამის“  ფარგლებში აცხადებს კონკურს  უცხო ქვეყნის უმაღლეს საგანმანათლებლო დაწესებულებაში სამაგისტრო პროგრამებზე სწავლის დაფინანსებაზე.

კონკურსში მონაწილეობის მისაღებად კანდიდატი უნდა აკმაყოფილებდეს შემდეგ პირობებს:

ა) კონკურსანტი უნდა იყოს აფხაზეთიდან დევნილი საქართველოს მოქალაქე, პირადობის ნეიტრალური მოწმობისა და/ან  ნეიტრალური სამგზავრო  დოკუმენტის მფლობელი;
ბ) ასაკი არ აღემატება 35 წელს;
გ) მოპოვებული აქვს ბაკალავრის აკადემიური ხარისხი და ჩარიცხულია უცხო ქვეყნის კანონდებლობით აღიარებულ უმაღლეს საგანმანათლებლო დაწესებულებაში სამაგისტრო პროგრამაზე;
დ) სწავლობს უცხო ქვეყნის კანონდებლობით აღიარებულ უმაღლეს საგანმანათლებლო დაწესებულებაში სამაგისტრო პროგრამაზე და ითხოვს მომდევნო სასწავლო წლის დაფინანსებას.

დაფინანსების საფუძველია მაღალი აკადემიური მოსწრება - GPA-ს გამოთვლის წესის არსებობის შემთხვევაში მინიმუმ 3.0, ან 100 ქულიანი შეფასების სისტემის არსებობის შემთხვევაში მინიმუმ 81-90 ან (B), ან მინიმუმ ძალიან კარგი ან შესაბამისი ქულა განსხვავებული შეფასების სისტემის შემთხვევაში, ან ქულობრივი შეფასების სისტემის არარსებობის შემთხვევაში გასულ სასწავლო წელს დაგეგმილი აკადემიური სამუშაოს შესრულების ოფიციალური  შეფასება.

წარმოსადგენი დოკუმენტები:

ა) პირადობის დამადასტურებელი მოწმობის/პასპორტის/იძულებით გადაადგილებული პირის სტატუსის დამადასტურებელი დოკუმენტის, პირადობის ნეიტრალური მოწმობისა ან/და ნეიტრალური  სამგზავრო  დოკუმენტის  ასლები;
ბ) CV/რეზიუმე;
გ) სამოტივაციო წერილი (ფონტი - sylfaen; ფურცლის ზომა-A4; შრიფტის ზომა - 11; ინტერვალი - 1,5;  მოცულობა- არანაკლებ 200 და არაუმეტეს 300 სიტყვისა);
დ) უცხო ქვეყნის უმაღლეს საგანმანათლებლო დაწესებულებაში სამაგისტრო პროგრამაზე  უპირობო  ჩარიცხვის  წერილი;
ე) ბაკალავრის  აკადემიური  ხარისხის დიპლომი;
ვ) უცხოეთის უნივერსიტეტში სამაგისტრო პროგრამის მეორე ან მომდევნო კურსის დაფინანსების მოთხოვნის შემთხვევაში ცნობა სტუდენტის სტატუსის შესახებ და განვლილი სასწავლო წლის ან/და სემესტრის შეფასების ფურცელი.
ზ) ორი რეკომენდაცია დაწერილი ლექტორის მიერ (ბოლო ექვსი თვის ვადით გაცემული);
თ) დოკუმენტი  სემესტრულად/წლიურად სწავლის  საფასურის  შესახებ;
ი) ნაშრომების, კვლევებისა და პუბლიკაციების შესახებ ინფორმაცია, აგრეთვე სიგელების/სერტიფიკატების  ასლები (არსებობის  შემთხვევაში);

(უცხო ენაზე შედგენილი დოკუმენტები განიხილება მხოლოდ სანოტარო წესით დამოწმებულ თარგმანთან ერთად ქართულ ენაზე)

დაფინანსება გაიცემა ერთი აკადემიური წლისთვის სრულად ან ნაწილობრივ (სემესტრულად).

პროგრამა არ ითვალისწინებს სწავლება-სწავლის არასრული დატვირთვის რეჟიმის მქონე, ელექტრონული ფორმის (online), დისტანციური ან/და ე.წ. „Executive“სამაგისტრო პროგრამების დაფინანსებას.

მოქალაქეთა განცხადებების მიღება იწარმოებს 2019 წლის პირველი სექტემბრიდან 30 სექტემბრის ჩათვლით;

საკონკურსო ვადაში დაინტერესებული პირების მიერ განაცხადის და შესაბამისი დოკუმენტაციის წარმოდგენა იწარმოებს ელექტრონულ მისამართზე apkhazeti@mes.gov.ge ან/და აფხაზეთის ავტონომიური რესპუბლიკის განათლებისა და კულტურის სამინისტროში, მისამართი:  თბილისი, უზნაძის ქ. N 68.

განაცხადისა და შესაბამისი დოკუმენტაციის დროულად და სრულყოფილად წარმოდგენის კონტროლი კონკურსანტის ვალდებულებაა. არასრულყოფილად წარმოდგენილი განაცხადი არ განიხილება და დამატებითი დრო საბუთების წარმოდგენისათვის არ განისაზღვრება.

ტელევიზია „ერთსულოვნებაზე“ დოკუმენტური ფილმის - „დიმა ჯაიანის“ პრემიერა გაიმართება

აფხაზეთის ავტონომიური რესპუბლიკის განათლებისა და კულტურის სამინისტრომ კონსტანტინე გამსახურდიას სახელობის სოხუმის სახელმწიფო დრამატული თეატრის ინიციატივითა და აფხაზეთის ავტონომიური რესპუბლიკის მთავრობის მხარდაჭერით,  2018 წელს დიმიტრი ჯაიანის ცხოვრებისა და მოღვაწეობის ამსახველი დოკუმენტური ფილმი - „დიმა ჯაიანი“ შექმნა. ფილმის შექმნას ორგანიზებას უწევდა სამინისტროს ხელოვნების და მიმდინარე ღონისძიებების სამსახური.

ფილმის სცენარის ავტორი და რეჟისორია  თამარ ბართაია.

ფილმის შექმნაში თავიანთი წვლილი შეიტანეს ასევე: 

  • აფხაზეთის ა/რ საინფორმაციო უზრუნველყოფის ცენტრმა;
  • საქართველოს საპატრიარქოს ტელევიზია „ერთსულოვნებამ“;
  • საქართველოს საზოგადოებრივმა მაუწყებელმა;
  • საქართველოს შოთა რუსთაველის თეატრისა და კინოს სახელმწიფო უნივერსიტეტის არქივმა.

 

ფილმის პრემიერა შედგება 20 აგვისტოს, 21:30 საათზე, საქართველოს საპატრიარქოს ტელევიზია „ერთსულოვნებაზე,“ განმეორებითი ჩვენება კი 21 აგვისტოს, 11:00 საათზე გაიმართება.

აფხაზეთის ა/რ განათლებისა და კულტურის სამინისტრო,,წარმატებული ახალგაზრდების მხარდაჭერის პროგრამის“ 2019 წლის III ეტაპის განხორციელებას იწყებს

აფხაზეთის ა/რ განათლებისა და კულტურის სამინისტრო,,წარმატებული  ახალგაზრდების მხარდაჭერის პროგრამის“ 2019 წლის   III ეტაპის განხორციელებას იწყებს

სამიზნე ჯგუფებს წარმოადგენენ  აფხაზეთიდან იძულებით გადაადგილებული პირები, კერძოდ: ავტორიზებული პროფესიული საგანმანათლებლო დაწესებულებების პროფესიული სტუდენტები; ავტორიზებული უმაღლესი საგანმანათლებლო დაწესებულებების (ბაკალავრები, მაგისტრანტები) სტუდენტები; ავტორიზებული სამედიცინო/სტომატოლიგიური დაწესებულებების რეზიდენტები.

განმცხადებელს  მოეთხოვება შემდეგი დოკუმენტების წარმოდგენა:

  • განცხადება;
  • პირადობის დამადასტურებელი მოწმობის ასლი;
  • დევნილის მოწმობის ასლი;
  • ცნობა სასწავლებლიდან, რომ არის აქტიური სტატუსის მქონე სტუდენტი/რეზიდენტი;
  • რეკომენდაცია/დახასიათება სასწავლებლიდან;
  • სასწავლო ბარათი (კომისია იხელმძღვანელებს  ბოლო  სემესტრის  მონაცემებით);
  • წარმატებულობისა და განსაკუთრებული მიღწევების დამადასტურებელი სათანადო დოკუმენტაციის სერტიფიკატები, სიგელები (არსებობის შემთხვევაში);
  • ინვოისი (ცნობა პირის მიერ სასწავლებლისათვის გადასახდელი სწავლის წლიური საფასურის ოდენობის თაობაზე, სადაც მიეთითება განცხადების შემოტანის მომენტისათვის სასწავლებლისთვის დარჩენილი  გადასახდელი  თანხის  ოდენობა).

სრული სასწავლო პერიოდის განმავლობაში (სწავლების ყველა საფეხურის გათვალისწინებით) პროგრამის ფარგლებში ერთი და იგივე პიროვნება ფინანსდება მხოლოდ 2-ჯერ (აღნიშნული მოთხოვნა არ ვრცელდება რეზიდენტურის სტუდენტებზე. რეზიდენტურაში სწავლება ფინანსდება მხოლოდ ერთხელ მიუხედავად იმისა, რომ სტუდენტი პირველად სარგებლობს წარმოდგენილი პროგრამით). ასევე, ერთი და იგივე პიროვნება არ დაფინანსება 2-ჯერ ერთი კალენდარული წლის განმავლობაში.

მოქალაქეთა განცხადებები მიიღება 4 ეტაპად. მესამე ეტაპის საბუთების მიღება დაიწყება 15 აგვისტო და გაგრძელდება 15 სექტემბრის ჩათვლით.

თითოეულ ეტაპზე, შემოსული განცხადებების განხილვისას, დასაფინანსებლად პრიორიტეტი მიენიჭება უფრო მაღალი შეფასების (აკადემიური მოსწრების ფურცლის მიხედვით) მქონე სტუდენტებს, ხოლო თანაბარი შეფასების შემთხვევაში მათ, ვინც მეტად წარმატებულია, რაც დასტურდება სერთიფიკატების, სიგელებისა და დიპლომების წარდგენით. ინფორმაციისთვის დარეკეთ ნომრებზე:   595 34 33 20;   577 09 22 39.

განცხადებების  მიიღება აფხაზეთის ავტონომიური რესპუბლიკის განათლებისა და კულტურის სამინისტროში, მისამართი:  თბილისი, უზნაძის ქ. N 68.

დაწვრილებითი ინფორმაციისათვის იხ. 

წარმატებული  ახალგაზრდების მხარდაჭერის პროგრამა

აფხაზეთის ავტონომიური რესპუბლიკის ხელისუფლებამ გმირთა მემორიალი გვირგვინით შეამკო

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა რუსლან აბაშიძემ, აფხაზეთის ავტონომიური რესპუბლიკის უმაღლესი საბჭოს თავმჯდომარემ ჯემალ გამახარიამ, აფხაზეთის ავტონომიური რესპუბლიკის განათლებისა და კულტურის მინისტრმა როლანდ ნიჟარაძემ და აფხაზეთის ა/რ ხელისუფლების სხვა წარმომადგენლებმა, აფხაზეთში შეიარაღებული კონფლიქტის დაწყებასთან დაკავშირებით, გმირთა მემორიალი და ვაშლიჯვრის ძმათა სასაფლაო გვირგვინებით შეამკეს და დაღუპულთა ხსოვნას პატივი მიაგეს.

შეიარაღებული დაპირისპირება აფხაზეთში 27 წლის წინათ, 1992 წლის 14 აგვისტოს დაიწყო და მალე ის რუსეთის ღია აგრესიაში გადაიზარდა. ომმა, რომელიც 13 თვე და 13 დღე გაგრძელდა, სხვადასხვა მონაცემით, 10 ათასიდან 30 ათასამდე სამხედრო და სამოქალაქო პირის სიცოცხლე შეიწირა. დევნილად იქცა 300 ათასამდე ადამიანი, ხოლო აფხაზეთი რუსეთის მიერ ოკუპირებული გახდა.

აფხაზეთიდან დევნილმა მოზარდებმა ბორის პაიჭაძის სახელობის ეროვნული სტადიონი - დინამო არენა დაათვალიერეს

აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით და ბორის პაიჭაძის სახელობის ეროვნული სტადიონი - დინამო არენას ხელმძღვანელობის მხარდაჭერით, აფხაზეთიდან დევნილთა კომპაქტურ ჩასახლებებში მცხოვრები 30-მდე მოზარდი დინამო არენას ეწვია. მოზარდებმა დაათვალიერეს სტადიონი, მუზეუმი, ადმინისტრაციული შენობა, გასახდელები და ა. შ.

მოზარდებს ბორის პაიჭაძის სახელობის ეროვნული სტადიონის საკონფერენციო დარბაზში ადმინისტრაციის წარმომადგენელი ელგუჯა გელაშვილი შეხვდა და ესაუბრა ქართული ფეხბურთის ისტორიასა და მიღწევებზე, სახელგანთქმულ ფეხბურთელებზე. ასევე მოუთხრო, რომ თბილისის „დინამოს“ წარმატების ზენიტში ყოფნის დროს მისი ბევრი აღიარებული ფეხბურთელი - ვიტალი დარასელია, ვლადიმერ ბარქაია, გელა ინალიშვილი, გრიგოლ ცაავა, თემურ ქეცბაია, ახრიკ ცვეიბა და სხვ. - აფხაზეთის მკვიდრნი იყვნენ. ბოლოს მოზარდებს ქართული ფეხბურთის ისტორიის ამსახველი წიგნები დაურიგეს.

ღონისძიების მიზანი მოზრდებში ჯანსაღი ცხოვრების წესის დამკვიდრება და ფეხბურთისადი ინტერესის გაღვივებაა.

მოსწავლეებს ახლდნენ აფხაზეთის ავტონომიური რესპუბლიკის განათლებისა და კულტურის მინისტრის თანაშემწე მალხაზ კორძახია და სამინისტროს სპორტისა და ახალგაზრდულ საქმეთა სამსახურის უფროსი სპეციალისტი დათა კიკალიშვილი.

ქობულეთში „სამშვიდობო საზაფხულო ბანაკი“ დევნილი მოზარდებისათვის დასრულდა

აჭარაში, ქ. ქობულეთში აფხაზეთის ავტონომიური რესპუბლიკის განათლებისა და კულტურის სამინისტროს მიერ დევნილი მოზარდებისათვის მოწყობილი „სამშვიდობო საზაფხულო ბანაკი“ დასრულდა. ბანაკი აფხაზეთის საჯარო და ოკუპირებული სკოლების მოსწავლეების დასვენების, სწავლისა და გართობის საინტერესო პროგრამას ითვალისწინებს. ბანაკს ორგანიზებას უწევდა სამინისტროს განათლებისა და საგანმანათლებლო პროგრამების სამსახური.

„საზაფხულო სამშვიდობო ბანაკის“ ფარგლებში მოსწავლეები ჩართული იყვნენ საგანმანათლებლო, კულტურულ-შემეცნებით და სპორტულ-გამაჯანსაღებელ აქტივობებში. სამინისტროს პარტნიორობას კავკასიის გარემოსდაცვითი არასამთავრობო ორგანიზაცია CENN-ი უწევდა. ბანაკის მონაწილეებს ჩაუტარდათ ტრენინგები თემებზე: სამშვიდობო განათლების მთავარი პრინციპები და ღირებულებები, კონფლიქტოლოგია, ადამიანის უფლებები, ახალგაზრდული პოლიტიკა, ცხოვრების ჯანსაღი წესი და სხვ. ასევე იმართებოდა მინი-ლექციები და თემატური სავარჯიშოები გენდერული თანასწორობის, სტიგმასა და სტერეოტიპების, კომუნიკაციის, ტოლერანტობის, ეკო განათლების მიმართულებით.

„საზაფხულო სამშვიდობო ბანაკის“ ფარგლებში შედგა ვიზიტი საზოგადოებრივ კოლეჯში „ახალი ტალღა“. მოსწავლეები გაეცნენ პროფესიული სწავლების სპეციფიკას, კოლეჯის მატერიალურ-ტექნიკურ ბაზას, პროფესიული გადამზადების მიზნობრივ პროგრამებს, რამაც ახალგაზრდებში დიდი ინტერესი გამოიწვია.

ბანაკის მონაწილეები ეწვივნენ ქობულეთისა და კინტრიშის დაცული ტერიტორიების სააგენტოს, სადაც აჭარის რეგიონში არსებული დაცული ტერიტორიების შესახებ ინფორმაციას გაეცნენ.

ბანაკის პროგრამა არა მარტო სწავლების, არამედ გართობისა და დასვენების კომპონენტისგან შედგებოდა. იმართებოდა კულტურულ-შემეცნებითი და სპორტულ-გამაჯანსაღებელი აქტივობები (დილის ვარჯიში, სპორტული შეჯიბრებები, შემოქმედებითი საღამოები და სხვ).

ბანაკის დასასრულს დახურვის საზეიმო ცერემონია გაიმართა. საღამოს სტუმრობდა ქობულეთის მუნიციპალიტეტის საკრებულოს თავმჯდომარე. ბანაკის ყველა მონაწილეს ,,საზაფხულო სამშვიდობო ბანკი 2019“-ის მონაწილისა და ,,მწვანე ბანაკის“
სერტიფიკატები გადაეცა.

ვალერი არქანიას არტ-გალერეაში ძალისმიერი სამჭიდის მწვრთნელთა გადამზადების სემინარი ჩატარდა

აფხაზეთის ავტონომიური რესპუბლიკის განათლებისა და კულტურის სამინისტროსსპორტისა და ახალგაზრდულ საქმეთა სამსახურის ინიციატივით, ვალერი არქანიას არტ-გალერეაში ძალისმიერი სამჭიდის მწვრთნელთა გადამზადების სემინარი ჩატარდა.

პროექტი აფხაზეთის რეგიონალური ოლიმპიური ორგანიზაციისა და ძალისმიერი სპორტის საერთაშორისო გაერთიანების ორგანიზებით შედგა და მასში ქართველებთან ერთად უცხო ქვეყნის სპორტსმენები მონაწილეობდნენ.

სემინარის მიმდინარეობას აფხაზეთის ავტონომიური რესპუბლიკის განათლებისა და კულტურის მინისტრი როლანდ ნიჟარაძე დაესწრო.

აფხაზეთის ავტონომიური რესპუბლიკის ხელისუფლებამ 2008 წლის აგვისტოს ომში დაღუპულ გმირთა ხსოვნას პატივი მიაგო

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა რუსლან აბაშიძემ, აფხაზეთის ავტონომიური რესპუბლიკის მთავრობის წევრებმა და უმაღლესი საბჭოს დეპუტატებმა მუხათგვერდის ძმათა სასაფლაოზე, 2008 წლის აგვისტოს ომის დროს დაღუპულ გმირთა მემორიალი გვირგვინით შეამკეს და მათ ხსოვნას პატივი მიაგეს.

2008 წლის რუსეთ-საქართველოს აგვისტოს ომიდან 11 წელი გავიდა. ამ ომის ციფრებით გამოხატული ოფიციალური სტატისტიკა ასეთია: დაღუპული - 228 მშვიდობიანი მოქალაქე, 169 სამხედრო, 14 პოლიციელი და 3 ჟურნალისტი; დაჭრილი - 1 747 ადამიანი... 150 000 იძულებით გადაადგილებული ადამიანი, რომელთაგან 30 ათასი დღემდე დევნილია...

„8 აგვისტოს ომის შემდეგ 1992-1993 წლებში დაკარგულ ტერიტორიებს კოდორის ხეობა და შიდა ქართლის ათეულობით სოფელი მიემატა, რაც იმას ნიშნავს, რომ საბოლოოდ, საქართველოს ტერიტორიის 20 პროცენტი ოკუპირებულია. საქართველო ვერასოდეს დაივიწყებს ამ დღეს და ვერასოდეს შეეგუება არსებულ რეალობას, ვიდრე ამ ტერიტორიებს არ დაიბრუნებს“, - განაცხადა მუხათგვერდის ძმათა სასაფლაოზე ყოფნისას აფხაზეთის ავტონიმიური რესპუბლიკის განათლებისა და კულტურის მინისტრმა როლანდ ნიჟარაძემ.

აფხაზეთის ა/რ განათლებისა და კულტურის სამინისტრომ დევნილი მოზარდებისთვის „სამშვიდობო საზაფხულო ბანაკი“ გახსნა

2019 წლის 29 ივლისს აჭარაში, ქ. ქობულეთში აფხაზეთის ავტონომიური რესპუბლიკის განათლებისა და კულტურის სამინისტრომ, განათლებისა და საგანმანათლებლო პროგრამების სამსახურის ორგანიზებით, ტრადიციული „სამშვიდობო საზაფხულო ბანაკი“ გახსნა.

ბანაკი აფხაზეთის საჯარო და ოკუპირებული სკოლების მოსწავლეების დასვენების, სწავლისა და გართობის საინტერესო პროგრამას ითვალისწინებს.

8 დღის განმავლობაში ბანაკში მოზარდებისთვის საგანმანათლებლო, შემეცნებითი, კულტურული და სპორტული აქტივობები გაიმართება. მნიშვნელოვანი აქცენტი სამშვიდობო განათლების, კონფლიქტოლოგიის, ცხოვრების ჯანსაღი წესისა და გარემოსდაცვითი მიმართულების ტრენინგებს, თემატურ ვორკშოპებსა და თამაშებს დაეთმობა.

უკვე რამდენიმე წელია, რაც ამ პროექტის ფარგლებში, აფხაზეთის ავტონომიური რესპუბლიკის განათლებისა და კულტურის სამინისტროს პარტნიორობას უწევს კავკასიის გარემოსდაცვითი არასამთავრობო ორგანიზაციათა ქსელი SENN-ი. ბანაკის პერიოდში ასევე დაგეგმილია საინტერესო შეხვედრები და ვიზიტები.

 
გულრიფშის მუნიციპალიტეტში მდებარე 19 ისტორიულ ნაგებობას კულტურული მემკვიდრეობის უძრავი ძეგლის სტატუსი მიენიჭა

საქართველოს კულტურული მემკვიდრეობის დაცვის ეროვნულმა სააგენტომ, გენერალური დირექტორის ნიკოლოზ ანთიძის 2019 წლის 19 ივლისის ბრძანების საფუძველზე, აფხაზეთის ავტონომიური რესპუბლიკის გულრიფშის მუნიციპალიტეტში მდებარე 19 ისტორიულ ნაგებობას კულტურული მემკვიდრეობის უძრავი ძეგლის სტატუსი მიანიჭა.

ამ ნაგებობებს ეს სტატუსი აფხაზეთის ავტონომიური რესპუბლიკის განათლებისა და კულტურის სამინისტროს კულტურულ ფასეულობათა დაცვის სამსახურის მიერ საქართველოს კულტურული მემკვიდრეობის დაცვის ეროვნული სააგენტოს შესაბამისი საბჭოსადმი წერილობითი მიმართვისა და წინასწარ მომზადებული სააღრიცხვო ბარათის საფუძველზე მიენიჭა.

კვლევის შედეგად აღმოჩნდა, რომ გულირიფშის მუნიციპალიტეტში მდებარე ქვემოთ ჩამოთვლილი ისტორიული ნაგებობები ამ დრომდე არ იყო შეტანილი საქართველოს კულტურული მემკვიდრეობის ძეგლთა ნუსხაში.

ძეგლების სია:

1. ციხე-კოშკები - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ალექსანდროვკა, XVI-XVII სს.);
2. დოლმენი - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. აზანთა, ნეოლითის ხანის გვიანდელი პერიოდი, ძვ.წ. 4000 - ძვ.წ. 3000);
3. დოლმენი - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. აზანთა, ნეოლითის ხანის გვიანდელი პერიოდი, ძვ.წ. 4000 - ძვ.წ. 3000);
4. ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. აზანთა, XIX საუკუნის I ნახევარი);
5. ბაბუშერას კოშკი - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაბუშერა, XVI-XVII სს.);
6. დარბაზული ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაღმარანი, განვითარებული შუა საუკუნეები);
7. დარბაზული ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაღმარანი, გვიანი შუა საუკუნეები);
8. გუმბათიანი ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაღმარანი, 1898 წ.);
9. გალავანი - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაღმარანი, გვიანი შუა საუკუნეები);
10. ციხე-სიმაგრე - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაღმარანი, გვიანი შუა საუკუნეები);
11. დარბაზული ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ბაღმარანი, განვითარებული შუა საუკუნეები);
12. ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. დრანდა, გვიანი შუა საუკუნეები);
13. ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, დაბა გულრიფში, 1908 წ.);
14. კოშკი - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. კელასური, განვითარებული შუა საუკუნეები);
15. სასახლე - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. ლათა, განვითარებული შუა საუკუნეები)
16. ციხე-სიმაგრე - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. მერხეული, განვითარებული შუა საუკუნეები);
17. ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. აჭანდარა (პოლტავსკოე), XIX საუკუნის II ნახევარი);
18. ციხე-სიმაგრე - (აფხაზეთის ავტონომიური რესპუბლიკა, გულრიფშის მუნიციპალიტეტი, სოფ. წებელდა, განვითარებული შუა საუკუნეები);
19. მთავარანგელოზის სახელობის ეკლესია - (აფხაზეთის ავტონომიური რესპუბლიკა, გულრიფშის მუნიციპალიტეტი, ზემო ფშაფი, XIX საუკუნის II ნახევარი).

ამგვარი კვლევა კვლავაც გაგრძელდება და სავარაუდოდ, კულტურული მემკვიდრეობის ძეგლის სტატუსი აფხაზეთში მდებარე კიდევ არაერთ ძეგლს მიენიჭება.

იხ.ვრცლად: https://matsne.gov.ge/ka/document/view/4619886?publication=0

როლანდ ნიჟარაძე აფხაზეთიდან დევნილი მოზარდებისთვის მოწყობილ საზაფხულო-საველე ბანაკს სტუმრობდა

როლანდ ნიჟარაძე აფხაზეთიდან დევნილი მოზარდებისთვის მოწყობილ საზაფხულო-საველე ბანაკს სტუმრობდა

აფხაზეთის ავტონომიური რესპუბლიკის განათლებისა და კულტურის სამინისტრომ, კულტურულ ფასეულობათა დაცვის სამსახურის ორგანიზებით, ,,საზაფხულო-საველე ბანაკი აფხაზეთიდან დევნილი მოზარდებისათვის“ წლეულს უკვე მეხუთედ მოაწყო. ბანაკი ამჟამად ბორჯომის ხეობაში, ჩითახევის მიდამოებში გაიმართა.

წლეულს ბანაკი გაგრძელდა ორ ნაკადად, 5-5 დღის ხანგრძლივობით და მასში 90-მდე მოსწავლე მონაწილეობდა. მათ შორის იყვნენ: ქ. თბილისისა და აფხაზეთის საჯარო სკოლების, ოკუპირებული გალის რაიონის, კოდისა და თეთრიწყაროს დევნილთა ჩასახლებებისა და ცხინვალის რეგიონიდან დევნილი მოსწავლეები. თბილისის საჯარო სკოლების მოსწავლეებმა ქვეპროგრამის - ,,გავიღრმავოთ ცოდნა აფხაზეთის ისტორიის შესახებ“ სალექციო კურსი გაიარეს და აფხაზეთის თემისადმი მიძღვნილ ახალგაზრდულ კონფერენციაში მონაწილეობდნენ.

მათ ამ დღეებში, დასვენება-გართობასთან ერთად, კულტურული მემკვიდრეობის დაცვის, ეკოლოგიისა და სამოქალაქო განათლების საკითხებზე სემინარები ჩაუტარდათ. სემინარების ფარგლებში სკოლის მოსწავლეებს ტრენერობას უწევდნენ: კოდის სათემო-საგანმანათლებლო ცენტრის წარმომადგენელი ნინო ელიაური, ასოციაცია ,,სამხარეო განვითარება მომავალი საქართველოსთვის (RDFG)" თანამშრომელი ილო ბოცვაძე, აფხაზეთის ა/რ განათლებისა და კულტურის სამინისტროს კულტურულ ფასეულობათა დაცვის სამსახურის უფროსი ირაკლი გელენავა და მისი მოადგილე გიორგი პატაშური.

ბანაკის ფარგლებში მოეწყო ასევე ექკურსიები ისტორიულ ადგილებში, მოზარდებმა რაბათის ციხე, მწვანე მონასტერი და სხვ. ძეგლები დაათვალიერეს.

ბანაკის მონაწილეები მოინახულა აფხაზეთის ავტონომიური რესპუბლიკის განათლებისა და კულტურის მინისტრმა როლანდ ნიჟარაძემ თანაშემწესთან მალხაზ კორძახიასთან ერთად. როლანდ ნიჟარაძემ ბანაკში რამდენიმე საათი დაჰყო, ის მოზარდების გართობით-შემეცნებით აქტოვობებს დაესწრო და ბოლოს მათ აფხაზეთის ისტორიის საკითხებზე ესაუბრა.

ბანაკს ასევე სტუმრობდნენ სამცხე-ჯავახეთის გუბერნატორის მოადგილე ზურაბ ხაჩიძე და მოძრაობა ,,ძალა ერთობაშია“ ლიდერი დავით ქაცარავა.

„გამოყენებითი ხელოვნების სასწავლო პროგრამაში“ მონაწილე დევნილი ახალგაზრდების ნამუშევრების გამოფენამ წარმატებით ჩაიარა

ვალერი არქანიას არტ-გალერეაში აფხაზეთის ავტონომიური რესპუბლიკის მთავრობისა და აფხაზეთის ავტონომიური რესპუბლიკის განათლებისა და კულტურის სამინისტროს მიერ დევნილი ახალგაზრდებისთვის პირველად განხორციელებული „გამოყენებითი ხელოვნების სასწავლო პროგრამის“ მონაწილეთა ნამუშევრების გამოფენა გაიმართა.

შეგახსენებთ, რომ აფხაზეთის ავტონომიური რესპუბლიკის განათლებისა და კულტურის სამინისტროში, ხელოვნებისა და მიმდინარე ღონისძიებების სამსახურის ორგანიზებით, წლეულს, პირველად განხორციელდა „გამოყენებითი ხელოვნების სასწავლო პროგრამა დევნილი ახალგაზრდებისათვის“. პროგრამის ფარგლებში 10 ახალგაზრდა: ეკა ჯიტავა, ბერტა შონია, ანა გადილია, ლილე ღვინჯილია, ალექსანდრე კვანტალიანი, კესარია ღუღუნიშვილი, ნინო რიგვავა, ნინო ტყებუჩავა, ინგა მეგრელიშვილი, თამარ საბაური ორი თვის განმავლობაში ეუფლებოდნენ გამოყენებითი ხელოვნების შემდეგ მიმართულებებს: ტიხრული მინანქარი; ტექსტილი (ბატიკა, თექა, ქვილთი, გობელენი, შიბორი), მინის მხატვრული დამუშავება და ცივი ფაიფური. პროგრამის ხელმძღვანლად მოწვეული იყო მხატვარ-დიზაინერი ეკატერინე გეგუჩაძე.

გამოფენა გახსნა აფხაზეთის ავტონომიური რესპუბლიკის განათლებისა და კულტურის მინისტრის მოადგილემ ჯაბა ჯაიანმა, რომელმაც თქვა: „გამოფენილმა საინტერესო ნამუშევრებმა ცხადყო, რომ პროექტი შედგა, რასაც ვულოცავ თითოეულ მის მონაწილეს, პედაგოგებსა და პროექტის ორგანიზატორებს“. პროგრამის ხელმძღვანელმა მხატვარ-დიზაინერმა ეკატერინე გეგუჩაძემ აღნიშნა, რომ წარმოდგენილი თითოეული მიმართულების კომპოზიციაში ყველა ბავშვი მონაწილეობდა, ყველამ შეიტანა საკუთარი წვლილი. კომპოზიციის თემად კი მისივე თქმით არჩეული იყო კონკრეტული თემა - ლურჯი სუფრა, რომელიც ქართული ტრადიციული სუფრის ნიმუშად არის მიჩნეული და რომლის დამზადების ტრადიციულ ტექნოლოგიასა და კულტურას საქართველოს არამატერიალური კულტურული მემკვიდრეობის ძეგლის სტატუსი აქვს მინიჭებული. აფხაზეთის ავტონომიური რესპუბლიკის განათლებისა და კულტურის სამინისტროს ხელოვნებისა და მიმდინარე ღონისძიებების სამსახურის უფროსის კახაბერ ძაძამიას თქმით, „ეს იყო სატესტო პროგრამა, რომლის წარმატებულმა შედეგმა აჩვენა, რომ პროგრამა შეიძლება გაისადაც არა მხოლოდ გაგრძელდეს, არამედ კიდევ უფრო გაღრმავდეს“. დასასრულ, პროგრამის მონაწილეებს სერტიფიკატები გადაეცათ.

„გამოყენებითი ხელოვნების სასწავლო პროგრამა დევნილი ახალგაზრდებისათვის“, უპირველესად, იმით არის მნიშვნელოვანი, რომ ზოგიერთ მის მონაწილე დევნილ ახალგაზრდას, შესაძლოა, ამ მიმართულებით სათანადო ნიჭი აღმოაჩნდეს და საბოლოოდ, ის ამ პროფესიას გაჰყვეს. ამ მხრივ ეს პროექტი არის საკუთარი შესაძლებლობების (ან სულაც მთვლემარე ნიჭის) გამოვლენის საუკეთესო საშუალება.

 
 
 
სოხუმის დრამატული თეატრის დელეგაცია ოფიციალური ვიზიტით კიევში იმყოფებოდა

    ამას წინათ სოხუმის კონსტანტინე გამსახურდიას სახელობის სახელმწიფო დრამატული თეატრის დელეგაცია, უკრაინის კულტურის სამინისტროსა და ლესია უკრაინკას სახელობის რუსული დრამის თეატრის ოფიციალური მიწვევით,   ქ. კიევში იმყოფებოდა. 

 დელეგაციის შემადგენლობაში იყვნენ: სოხუმის კონსტანტინე გამსახურდიას სახელობის სახელმწიფო დრამატული თეატრის სამხატვრო ხელმძღვანელი დავით საყვარელიძე, აფხაზეთის ა/რ განათლებისა და კულტურის მინისტრის მოადგილე ჯაბა ჯაიანი, თეატრის დირექტორი კახაბერ შარაბიძე   და თეატრის პროდიუსერი ბესო ხელაშვილი. დელეგაციის წევრები უკრაინის კულტურის მინისტრის მოადგილეს იური რიბაჩუკს და ლესია უკრაინკას სახელობის რუსული დრამის თეატრის გენერალურ პროდიუსერს, არტ-დირექტორს მიხეილ რეზნიკოვიჩს შეხვდნენ. მასპინძლებმა ქართველ სტუმრებს  დიდი ტრადიციების მქონე ლესია უკრაინკას სახელობის თეატრის შენობა დაათვალიერებინეს და ერთ-ერთი სპექტაკლის პრემიერაზე მიიპატიჟეს

   .ვიზიტის დროს მხარეები შეთანხმდნენ, რომ 2020 წლის იანვრის ბოლოსთვის,  ლესია უკრაინკას სახელობის რუსული დრამის თეატრი საგასტროლოდ თბილისს ეწვევა და ქართველი მაყურებლის წინაშე ორ სპექტაკლს წარმოადგენს. მეორე ეტაპზე კი უკრაინაში გაიმართება აფხაზეთის კულტურის დღეები, რომლის ფარგლებშიც სოხუმის თეატრი უკრაინაში ასევე ორი სპექტაკლით გაემგზავრება. კულტურის დღეებში ასევე მიიღებენ მონაწილეობას  გურამ ყურაშვილის სახელობის აფხაზეთის სახელმწიფო საგუნდო კაპელა, აფხაზეთის სიმღერისა და ცეკვის სახელმწიფო აკადემიური ანსამბლი და აფხაზეთის შემოქმედებითი ინტელიგენციის წარმომადგენლები.

  სოხუმის კონსტანტინე გამსახურდიას სახელობის სახელმწიფო დრამატული თეატრის სამხატვრო ხელმძღვანლის დავით საყვარელიძის ინფორმაციით, ორმხრივი შეთანხმების საფუძველზე,  უკრაინელი და ქართველი მსახიობების მონაწილეობით დაიდგმება ერთობლივი სპექტაკლი, რომელსაც როგორც უკრაინაში, ისე საქართველოში წარმოადგენენ. გარდა ამისა, დაგეგმილია შემოქმედებით თანამშრომლობაში გერმანიის რომელიმე თეატრის ჩაბმა და ერთგვარი სამკუთხედის შექმნა,  რომელიც  ევროპარლამენტის თუ საერთაშორისო ფონდების დაფინანსების მოპოვების შესაძლებლობას მოგვცემს.

დავით საყვარელიძისავე აზრით, საქართველოსა და უკრაინის კულტურული ურთიერთობის გაღრმავება აუცილებელია,  რადგან  უკრაინას და საქართველოს, ბევრ სხვა რამესთან ერთად, უპირველესად ტერიტორიული მთლიანობის ხელყოფის პრობლემა აერთიანებთ.  საერთო სათქმელის გამოხატვა კი პოლიტიკის გარდა, კულტურის ენითაც მნიშვნელოვანია.