„აფხაზეთობის“ კვირეულის ფარგლებში, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე აფხაზეთიდან დევნილ, თბილისის სახელმწიფო უნივერსიტეტის სტუდენტებს შეხვდა. მონაწილეებმა აფხაზეთზე, დევნილი სტუდენტების საჭიროებებსა და კონფლიქტის მშვიდობიანი დარეგულირების საკითხებზე ისაუბრეს.

ღონისძიება „აფხაზეთობა თსუ-ში“ მუსიკალური ნომრით გახსნა თბილისის სახელმწიფო უნივერსიტეტის ანსამბლმა „უნივერსიტეტი“, ასევე მოეწყო აფხაზეთიდან დევნილი მხატვრების ნამუშევრების გამოფენა.

ღონისძიებაში აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, ივანე ჯავახიშვილის სახელობის თბილისის სახელმწიფო უნივერსიტეტის რექტორი ჯაბა სამუშია, საქართველოს პარლამენტის გენდერული თანასწორობის მუდმივმოქმედი საპარლამენტო საბჭოს თავმჯდომარე ნინო წილოსანი და აფხაზეთის მთავრობის წარმომადგენლები მონაწილეობდნენ.

სტუდენტებთან შეხვედრა აფხაზეთიდან იძულებით გადაადგილებულ პირთა-დევნილთა მომსახურების სააგენტოს და ივანე ჯავახიშვილის სახელობის თბილისის სახელმწიფო უნივერსიტეტის ორგანიზებით პირველი კორპუსის სააქტო დარბაზის ფოიეში გაიმართა.

აფხაზეთის დღისადმი მიძღვნილი კვირეულის ფარგლებში, დღეს გმირთა მოედანზე, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, საქართველოს თავდაცვის მინისტრმა ჯუანშერ ბურჭულაძემ, თბილისის მერმა კახა კალაძემ და ელგუჯა ადამიამ, საქართველოს ეროვნული გმირის, გენერალ-მაიორ გენო ადამიას ბიუსტი გახსნეს და პატივი მიაგეს საქართველოს ტერიტორიული მთლიანობისთვის დაღუპულთა ხსოვნას.

„ბატონი გენო ადამია არის შეუპოვრობის, სიმამაცის და გმირობის მაგალითი – ადამიანი, რომელმაც არ დატოვა თავისი ქალაქი და სიცოცხლის ბოლო წუთამდე იცავდა მას. ის ბოლომდე იბრძოდა ერთიანი და თავისუფალი საქართველოსთვის და გმირულად დაეცა ბრძოლის ველზე. ეს ბიუსტი ყველა იმ გმირის კოლექტიური ძეგლია, ვინც თავგანწირვით იბრძოდა 23–ე მექანიზირებული ბრიგადის შემადგენლობაში. აფხაზეთის ავტონომიური რესპუბლიკის მთავრობის სახელით, მინდა მადლობა გადავუხადო გენერალ–მაიორ გენო ადამიას თანამოაზრესა და თანამებრძოლს ბატონ ლევან ქეცბაიას, ვისი ინიციატივით და თანადგომით განხორციელდა დღევანდელი ღონისძიება. განსაკუთრებული მადლობა მინდა გადავუხადო ქალაქ თბილისის მერიას მხარდაჭერისთვის. ასევე, მადლობა ყველა იმ ადამიანს, ვინც თავისი წვლილი შეიტანა, რათა დღევანდელი დღე შემდგარიყო“, - განაცხადა რუსლან აბაშიძემ.

„გენერალი ადამია ნამდვილად იყო ჩვენი უახლესი ისტორიის სამაგალითო გმირი და მინდა, კიდევ ერთხელ მადლობა გადავუხადო ყველას, ქალაქის მერს და ყველა მონაწილეს, ვინც ამ ისტორიულ საქმეში მიიღო მონაწილეობა. ეს არის საქართველოს ისტორია და ეს არის თბილისის გულის ისტორია, სადაც დარჩება ჩვენი გმირის, ჩვენი გენერლის მარადიული ხსოვნა“, - განაცხადა საქართველოს თავდაცვის მინისტრმა ჯუანშერ ბურჭულაძემ.

გახსნის ცერემონიას საქართველოს საკანონმდებლო და აღმასრულებელი ხელისუფლების წარმომადგენლები, აფხაზეთის მთავრობის და უმაღლესი საბჭოს დეპუტატები ესწრებოდნენ. საქართველოს ერთიანობისთვის დაღუპულ გმირთა მემორიალთან ასევე იმყოფებოდნენ აფხაზეთის ომის ვეტერანები, გენო ადამიას ოჯახის წევრები და დევნილი საზოგადოება. ღონისძიებაზე აფხაზეთის სიმღერისა და ცეკვის სახელმწიფო აკადემიურ ანსამბლ "აფხაზეთის" მონაწილეობით რამდენიმე მუსიკალური ნომერი შესრულდა.

გენო ადამია აფხაზეთში ეროვნულ–განმათავისუფლებელი მოძრაობის აქტიური მონაწილე, აფხაზეთში შეიარაღებული კონფლიქტის დაწყების შემდეგ საქართველოს შეიარაღებული ძალების 23-ე მექანიზებული ბრიგადის მეთაური იყო. მან 1993 წლის 27 სექტემბერს, სოხუმის დაცემის შემდეგაც განაგრძო წინააღმდეგობის გაწევა და 28 სექტემბერს კელასურის ხიდზე ბრძოლის დროს დაიღუპა. ის დაჯილდოებულია ვახტანგ გორგასლის I და III ხარისხის ორდენებით. 2020 წლის 27 სექტემბერს გენერალ-მაიორ გენო ადამიას საქართველოს ეროვნული გმირის წოდება მიენიჭა.

„აფხაზეთის დღესთან“ დაკავშირებით, დღეს სამების საკათედრო ტაძრის ეზოში საფუძველი ჩაეყარა მოციქულ სვიმონ კანანელის სახელობის სამნავიანი ბაზილიკის ტაძრის მშენებლობას. ტაძრის საძირკვლის კურთხევის ცერემონიალს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, საქართველოს პარლამენტის თავმჯდომარის პირველი მოადგილე, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკი და შერიგებისა და სამოქალაქო თანასწორობის საკითხებში საქართველოს სახელმწიფო მინისტრი თეა ახვლედიანი ესწრებოდნენ.

ტაძარი სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმიდესის და უნეტარესის ილია II-ის ლოცვა-კურთხევით, აფხაზეთსა და შიდა ქართლში 1990-იან წლებში განვითარებულ საომარ მოქმედებებში დაღუპულ ქართველთა, აფხაზთა და ოსთა სულების მოსახსენებლად შენდება და წარმოადგენს მთელ მსოფლიოში ანალოგის არმქონე ერთადერთ საკულტო ნაგებობას.

ტაძარში აღევლინება ლოცვები დაპირისპირებაში მონაწილე ყველა მხარის წარმომადგენლის სულის მოსახსენებლად, შერიგებისა და საყოველთაო მშვიდობის დასამყარებლად. ტაძრის მშენებლობა ფონდ „კანანელის“ და აფხაზეთის ომის ვეტერანთა ინიციატივით ხორციელდება. რუსლან აბაშიძემ და ღონისძიების სტუმრებმა წმინდა ადგილებიდან მოტანილ ქვებზე წარწერები გააკეთეს, რომელიც ტაძრის საძირკველში განთავსდა.

დღესვე, მოციქულ სვიმონ კანანელის ხსენებისა და აფხაზეთის დღესთან დაკავშირებით, სამების საკათედრო ტაძარში საქართველოს სამოციქულო მართლმადიდებელი ეკლესიის წმინდა სინოდის მღვდელმთავარმა, წალკელმა ეპისკოპოსმა გრიგოლ კაციამ პარაკლისი გადაიხადა.

პარაკლისს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის მთავრობის თავმჯდომარის მოადგილე ანზორ მარგიანი, აფხაზეთის მთავრობის წევრები, უმაღლესი საბჭოს დეპუტატები და დევნილი საზოგადოება ესწრებოდნენ.

2014 წელს სრულიად საქართველოს კათოლიკოს-პატრიარქის, მცხეთა–თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია II-ს ლოცვა-კურთხევით 23 მაისი, სვიმონ კანანელის ხსენების დღე, აფხაზეთის დღედ დადგინდა.

აფხაზეთის ავტონომიური რესპუბლიკის მთავრობის ორგანიზებით სოხუმის სახელმწიფო დრამატულ თეატრში აფხაზეთის დღისადმი მიძღვნილი ღონისძიება გაიმართა, რომელიც მისასალმებელი სიტყვით აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის განათლებისა და კულტურის მინისტრმა ეკა ხოფერიამ გახსნეს. დამსწრე საზოგადოებას ასევე მიმართეს საქართველოს პარლამენტის თავმჯდომარის პირველმა მოადგილემ, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკიმ და შერიგებისა და სამოქალაქო თანასწორობის საკითხებში საქართველოს სახელმწიფო მინისტრის პირველმა მოადგილე ლია გიგაურმა.

ღონისძიების ფარგლებში, სოხუმის დრამატული თეატრის სცენაზე აფხაზეთის სიმღერისა და ცეკვის სახელმწიფო აკადემიური ანსამბლის ძველი და ახალი თაობის წარმომადგენელთა მონაწილეობით კონცერტი გაიმართა. მაყურებლის წინაშე განახლებული პროგრამით ასევე აფხაზეთის სახელმწიფო ანსამბლი „შავნაბადა“ წარსდგა.

აფხაზეთის დღისადმი მიძღვნილი კვირეულის ფარგლებში, არტ-გალერეაში გამოფენა სახელწოდებით „კადრები აფხაზეთიდან“ მოეწყო, სადაც წარმოდგენილი იყო აფხაზეთში გადაღებული, იქ დაბადებული და მცხოვრები ცნობილი ადამიანების დღემდე უცნობი და უნიკალური ფოტომასალა.

ღონისძიებაზე ცნობილი გახდა, რომ აფხაზეთის მთავრობის გადაწყვეტილებით, სოხუმის მოზარდმაყურებელთა სახელმწიფო თეატრ „თეთრ ტალღას“ მისი დამაარსებლის, საქართველოს და აფხაზეთის სახალხო არტისტის, გიორგი რატიანის სახელი მიენიჭა. აღნიშნული გადაწყვეტილება საზოგადოებას აფხაზეთის განათლებისა და კულტურის მინისტრმა გააცნო.

ღონისძიებას აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის მთავრობის თავმჯდომარის მოადგილე ანზორ მარგიანი, საქართველოს საკანონმდებლო და აღმასრულებელი ხელისუფლების, აფხაზეთის მთავრობისა და უმაღლესი საბჭოს, საქართველოში აკრედიტებული დიპლომატიური კორპუსის, საერთაშორისო და არასამთავრობო ორგანიზაციების, კულტურის სფეროს წარმომადგენლები და ვეტერანები ესწრებოდნენ.

აფხაზეთის დღისადმი მიძღვნილი კვირეულის ფარგლებში, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე ხელვაჩაურის მუნიციპალიტეტის სოფელ ფერიის საჯარო სკოლის პედაგოგებს და მოსწავლეებს შეხვდა.

მთავრობის თავმჯდომარემ სკოლის დირექტორს და პედაგოგებს მადლობა გადაუხადა აფხაზური ენის დაცვის, განვითარების, პოპულარიზაციისა და შენარჩუნების საქმეში შეტანილი განსაკუთრებული წვლილისთვის და აფხაზეთის მთავრობის სიგელები გადასცა.

ფერიის საჯარო სკოლაში 500 ბავშვი იღებს განათლებას, სადაც 70% ეთნიკურად აფხაზია. 2015 წლიდან აღნიშნულ სკოლაში აფხაზური ენა არჩევით საგნად ისწავლება.

გიგა ოთხოზორიას მკვლელობიდან 7 წელი გავიდა. აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, შერიგებისა და სამოქალაქო თანასწორობის საკითხებში სახელმწიფო მინისტრ თეა ახვლედიანთან და სამეგრელო-ზემო სვანეთის რეგიონის ადგილობრივი ხელისუფლების წარმომადგენლებთან ერთად, გიგა ოთხოზორიას საფლავი ყვავილებით შეამკო და პატივი მიაგო მის ხსოვნას. რუსლან აბაშიძემ ოჯახის წევრებს აფხაზეთის მთავრობის სახელით კიდევ ერთხელ მიუსამძიმრა და თანადგომა აღუთქვა.

„დღეს შვიდი წელი გავიდა გიგა ოთხოზორიას შემზარავი მკვლელობიდან. აფხაზეთის ავტონომიური რესპუბლიკის მთავრობის სახელით მინდა მივუსამძიმრო მისი ოჯახის წევრებსა და ახლობლებს. ეს ტრაგედია ნათლად წარმოაჩენს ოკუპაციის არაჰუმანურ და დამნაშავეობრივ სახეს.

ქვეყნის ხელისუფლება კვლავაც არ დაიშურებს ძალისხმევას ჩვენი მოქალაქის სიცოცხლის ხელყოფასთან დაკავშირებული პირების კანონის სრული სიმკაცრით დასასჯელად. მომავალშიც გამოიყენებს ხელთ არსებულ ყველა ბერკეტს, მათ შორის სამართლებრივ ინსტრუმენტებს და საერთაშორისო ფორმატებს, სამართლის აღსასრულებლად.

საქართველო არასოდეს შეეგუება იმ ისტორიულ უსამართლობას, რასაც ქვეყნის ოკუპაცია ჰქვია და სამშვიდობო პოლიტიკის გატარებით უზრუნველყოფს ჩვენი მოსახლეობის უსაფრთხო და ღირსეულ ცხოვრებას“, - განაცხადა რუსლან აბაშიძემ.

გიგა ოთხოზორია 2016 წლის 19 მაისს ცენტრალური ხელისუფლების მიერ კონტროლირებად ტერიტორიაზე, სოფელ ხურჩაში ცეცხლსასროლი იარაღიდან გასროლით მოკლეს.

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის ფინანსთა და ეკონომიკის მინისტრ ლევან თევზაიასთან ერთად, მეორე მსოფლიო ომის მონაწილეს, არტემ კოპალიანს ესტუმრა, რომელსაც 100 წელი შეუსრულდა.

მთავრობის წარმომადგენლებმა აფხაზეთიდან დევნილ, ხანდაზმულ ვეტერანს იუბილე მიულოცეს, ჯანმრთელობა უსურვეს და კომპანია ,,კარფურის’’ მხარდაჭერით საჩუქრები გადასცეს.

ღონისძიებაში აფხაზეთის მეომართა კავშირის წევრი ზურაბ შამუგია მონაწილეობდა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე სამეგრელო-ზემო სვანეთის რეგიონში, ქალაქ ჯვარში, პროფესიული კოლეჯის „ლაკადა“ კურსდამთავრებულებს შეხვდა. მთავრობის თავმჯდომარემ სასწავლებლის შენობა და ინფრასტრუქტურა დაათვალიერა, ასევე სტუდენტების სასწავლო და პრაქტიკულ სამუშაო გარემოს გაეცნო.

კოლეჯის ბაზაზე, ამ ეტაპზე, აფხაზეთის ოკუპირებული ტერიტორიიდან პროფესიული განათლება ექვსმა ახალგაზრდამ მიიღო. მათ „შიდა წყალმომარაგებისა და წყალარინების სპეციალისტის“ პროფესიულ პროგრამაზე ოთხთვიანი სასწავლო კურსი გაიარეს. პროგრამა გერმანიის ფედერალური საგარეო ოფისის, პროფესიული უნარების სააგენტოს მხარდაჭერით ხორციელდება.

დღესვე, სამეგრელო-ზემო სვანეთის რეგიონში ვიზიტის ფარგლებში, რუსლან აბაშიძემ ფოცხოეწერში მოქმედი, ახლადაშენებული სახელოსნო მოინახულა, რომელიც აფხაზეთის ავტონომიური რესპუბლიკის მთავრობის და საქველმოქმედო ჰუმანიტარულ ცენტრ „აფხაზეთის" თანამშრომლობით ხორციელდება. სახელოსნოში აფხაზეთიდან დევნილი ახალგაზრდები „ხის მხატვრული დამუშავების“ პროფესიულ პროგრამას ეუფლებიან.

კოლეჯი „ლაკადა“ სწავლების თანამედროვე მეთოდების დანერგვით უზრუნველყოფს სტუდენტთა პროფესიული განათლების მაღალი დონის მიღწევას რეგიონისა და ოკუპირებული აფხაზეთის ტერიტორიაზე მცხოვრებთათვის, ორიენტირებულია კონკურენტუნარიანი სპეციალისტების მომზადებასა და დასაქმებაზე.

ღონისძიებაზე რუსლან აბაშიძემ აღნიშნა, რომ ხარისხიანი პროფესიული განათლება ქვეყნისთვის პრიორიტეტულია. მთავრობის თავმჯდომარემ კოლეჯის ხელმძღვანელობას მადლობა გადაუხადა ოკუპირებულ ტერიტორიაზე მცხოვრები ახალგაზრდების დახმარებისთვის და კოლეჯის სამომავლო განვითარების საქმეში მხარდაჭერას დაჰპირდა.

შეხვედრებში კოლეჯის დირექტორის მოვალეობის შემსრულებელი თეანა ქუხილავა, აფხაზეთის მთავრობის თავმჯდომარის მრჩეველი მანანა ქვაჩახია, საქველმოქმედო-ჰუმანიტარულ ფონდ „აფხაზეთის“ წარმომადგენელი დაჩი ახვლედიანი და კოლეჯის ადმინისტრაციის თანამშრომლები მონაწილეობდნენ.

კონსტანტინე გამსახურდიას სახელობის სოხუმის სახელმწიფო დრამატულ თეატრში ცნობილი რეჟისორის, მხატვრის, სცენოგრაფისა და პედაგოგის, დიმიტრი კრიმოვის შემოქმედებითი საღამო გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მეუღლესთან ერთად დაესწრო.

საღამოზე ნაჩვენები იყო ეპიზოდები რეჟისორის ბოლოდროინდელი გახმაურებული თეატრალური დადგმებიდან.

შეხვედრის ფარგლებში, დიმიტრი კრიმოვმა მაყურებელთან მის ამერიკულ გამოცდილებაზე ისაუბრა და დამსწრე საზოგადოების კითხვებს უპასუხა.

ღონისძიება საქართველოს კულტურის, სპორტისა და ახალგაზრდობის სამინისტროს მხარდაჭერით გაიმართა და მას მინისტრის პირველი მოადგილე კახა სიხარულიძე ესწრებოდა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია საქართველოს ტექნიკური უნივერსიტეტის სტუდენტებს შეხვდნენ.

შეხვედრის მონაწილეებმა ახალგაზრდებს გააცნეს საგანმანათლებლო პროგრამები, რომელთა მიზანია განათლების უფლების რეალიზაციის კუთხით საზოგადოებაში სამართლებრივი ცნობიერების ამაღლება და აფხაზეთიდან იძულებით გადაადგილებულ და აფხაზეთის ოკუპირებულ ტერიტორიაზე ლეგიტიმურად მცხოვრებ პირთა მიმართ პრო ბონო სამედიაციო პროცესებით უზრუნველყოფის ხელშეწყობა. სამომავლო ურთიერთთანამშრომლობის ფარგლებში, სპეციალურად ამ სამიზნე ჯგუფებისთვის, დაიგეგმება ტრენინგები და განხორციელდება სხვადასხვა სახის პროექტები.

შეხვედრა საქართველოს ტექნიკურ უნივერსიტეტში გაიმართა და მონაწილეობდნენ იურიდიული დახმარების სამსახურის დირექტორი დავით სიმონია და საქართველოს მედიატორთა ასოციაციის თავმჯდომარე ირაკლი ყანდაშვილი.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის მთავრობის წევრებთან და უმაღლესი საბჭოს დეპუტატებთან ერთად, „ვეტერანთა კულტურისა და დასვენების პარკში“ მეორე მსოფლიო ომში დაღუპულთა ხსოვნას პატივი მიაგო.

„აფხაზეთის ავტონომიური რესპუბლიკის მთავრობის სახელით დღევანდელი დღე მინდა მივულოცო მთელ საზოგადოებას და მეორე მსოფლიო ომის ვეტერანებს, რომლებმაც თავიანთი სიცოცხლის რისკის ფასად მომავალი თაობებისთვის უზრუნველყვეს უსაფრთხო სამყაროში ცხოვრება. ჩვენ ყოველთვის ვიამაყებთ იმით, რომ საქართველომ უდიდესი წვლილი შეიტანა ფაშიზმის დამარცხებაში.

სიმბოლურია, რომ დღევანდელ დღეს ასევე ევროკავშირთან მჭიდრო თანამშრომლობას ვზეიმობთ. ქართველი ხალხის ისტორიული არჩევანია ძლიერი ევროპული ოჯახის წევრობა, რადგან სწორედ ევროპა არის ჩვენი ქვეყნის ეროვნული იდენტობის შენარჩუნების, გრძელვადიანი მშვიდობის უზრუნველყოფის და კეთილდღეობის გარანტია.

დღეს, საქართველო, ისე როგორც არასდროს ყველაზე ახლოს არის ევროპულ ოჯახში ღირსეული ადგილის დამკვიდრებასთან. ჩვენი ქვეყანა დაჩქარებული ტემპებით მიიწევს წინ მნიშვნელოვან გამარჯვებამდე და ძალიან მალე საქართველო გახდება ევროკავშირის სრულფასოვანი წევრი.

კიდევ ერთხელ  გილოცავთ ყველას! საქართველოს და მსოფლიოს ვუსურვებ მშვიდობას და სტაბილურ განვითარებას.“, - განაცხადა რუსლან აბაშიძემ.

ამ დღესთან დაკავშირებით, აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის ფინანსთა და ეკონომიკის მინისტრ ლევან თევზაიასთან ერთად, აფხაზეთიდან დევნილ მეორე მსოფლიო ომის ვეტერანებს ესტუმრა, ფაშიზმზე გამარჯვების დღე მიულოცა, გმირული თავდადებისთვის მადლობა გადაუხადა და საჩუქრები გადასცა.

9 მაისს საქართველოში ფაშიზმზე გამარჯვების დღე აღინიშნება. 1945 წლის 8 მაისს გერმანიამ კაპიტულაცია გამოაცხადა და მეორე მსოფლიო ომი დასრულდა, 9 მაისი ფაშიზმზე გამარჯვების დღედ გამოცხადდა.

აღსანიშნავია, რომ საქართველოს მთავრობის განკარგულებით, ფაშიზმზე გამარჯვების 78-ე წლისთავთან დაკავშირებით, მეორე მსოფლიო ომის მონაწილეები ერთჯერადად 1000 ლარს, ხოლო მეორე მსოფლიო ომში დაღუპულთა ოჯახის წევრები - 500 ლარს მიიღებენ.

ნიდერლანდების სამეფოში, კუნძულ ტექსელზე, 1945 წელს, ტექსელის ქართველთა აჯანყების დროს დაღუპული ჯარისკაცების ხსოვნისადმი მიძღვნილი მემორიალური დაფის გახსნის ცერემონია გაიმართა.

ღონისძიებაზე დამსწრე საზოგადოებას სიტყვით მიმართეს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, საქართველოს საგარეო საქმეთა მინისტრის მოადგილე ვლადიმერ კონსტანტინიდიმ, აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარიამ, აფხაზეთის ავტონომიური რესპუბლიკის იძულებით გადაადგილებულ პირთა მინისტრმა დავით ფაცაციამ, კუნძულ ტექსელის მერმა მიხილ აუთდენჰაგმა, საქართველოს საგანგებო და სრულუფლებიანმა ელჩმა ნიდერლანდების სამეფოში დავით სოლომონიამ, ბელგიისა და ჰოლანდიის ეპისკოპოსმა მეუფე დოსითეოსმა, ნიდერლანდების სამეფოს ქართული კულტურის ცენტრის დამფუძნებელმა თიკა სვანიძე-ვენკომ.

„დღეს პატივს მივაგებთ ქართველი ჯარისკაცების ხსოვნას, მათ ვინც ტირანიის წინააღმდეგ ტექსელის კუნძულის მაცხოვრებლებთან ერთად იბრძოდა.

მინდა აღვნიშნო ის ფაქტი, რომ ადგილობრივმა ნიდერლანდელმა მოსახლეობამ საკუთარი სიცოცხლის რისკის მიუხედავად მხარდაჭერა გამოუცხადა ქართველ ჯარისკაცებს. ეს მოვლენა ყოველთვის დარჩება ჩვენი ორი ქვეყნის მეგობრობის საუკეთესო მაგალითად. ქართველებისა და ნიდერლანდელების მონაწილეობამ ამ ტრაგიკულ მოვლენებში შექმნა საერთო ისტორია, რომელიც დავიწყებას არ უნდა მიეცეს და გადაეცეს ჩვენს მომავალ თაობებს,“ - განაცხადა რუსლან აბაშიძემ.

მემორიალური დაფის დიზაინის ავტორია საზღვარგარეთ მოღვაწე ქართველი მოქანდაკე-რესტავრატორი, დავით (დევი) ხმალაძე, ხოლო ინიციატივა და ფინანსური მხარდაჭერა ეკუთვის ნიდერლანდების სამეფოს ქართული კულტურის ცენტრის დამფუძნებელს, თინათინ სვანიძე-ვენკოს. მემორიალური დაფის გახსნა საგარეო საქმეთა სამინისტროს და ნიდერლანდების სამეფოში საქართველოს საელჩოს მხარდაჭერით განხორციელდა. ღონისძიებას საქართველოს მთავრობის და ქართული დიასპორის წარმომადგენლები ესწრებოდნენ. დელეგაციის წევრებმა დაღუპული ჯარისკაცების ხსოვნას პატივი მიაგეს და მემორიალური მონუმენტი გვირგვინით შეამკეს. ღონისძიებას ასევე ქართველ ებრაელთა მსოფლიო რაბინი, იაკობ გაგულაშვილი ესწრებოდა.

ტექსელის კუნძულზე ვიზიტის ფარგლებში, შეხვედრა გაიმართა ტექსელის მერთან, მიხილ აუთდენჰაგთან. შეხვედრაზე საგარეო საქმეთა მინისტრის მოადგილემ მადლობა გადაუხადა ტექსელის მერს ტექსელის ქართველთა სასაფლაოზე მემორიალური დაფის დადგმის პროექტის განხორცილების მხარდაჭერისათვის.

შეხვედრა გაიმართა ასევე ნიდერლანდების სამეფოში მცხოვრებ ქართული დიასპორის წარმომადგენლებთან. მინისტრის მოადგილემ დიასპორის წარმომადგენლებს გააცნო ის მიმდინარე და დაგეგმილი პროექტები, რომელსაც სამინისტრო უცხოეთში მცხოვრები თანამემამულეებისა და დიასპორული ორგანიზაციების მხარდაჭერის მიზნით ახორციელებს. მან ყურადღება გაამახვილა ქართული დიასპორის მნიშვნელოვან როლზე საზღვარგარეთ ეროვნული და კულტურული თვითმყოფადობის შენარჩუნების, საქართველოს პოპულარიზაციისა და ქვეყნის პოზიტიური იმიჯის წარმოჩენის საქმეში. ვლადიმერ კონსტანტინიდიმ აღნიშნა, რომ დიასპორასთან ურთიერთობა საქართველოს მთავრობის და საგარეო საქმეთა სამინისტროს ერთ-ერთი მთავარი მიმართულებაა.

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანმა და იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ დევნილი ახალგაზრდებისთვის ზუგდიდის მუნიციპალიტეტში პროექტი „ინოვაციური ხიდი“ გახსნეს.

პროექტი ითვალისწინებს ორთვიან სასწავლო კურსს, სადაც  საოკუპაციო ხაზის გასწვრივ მდებარე სოფლებში მცხოვრები 30 დევნილი მოზარდი     დეზინფორმაციასთან ბრძოლის, მედია პროდუქტის მომზადების (გადაღება-მონტაჟი) და გრაფიკული არქიტექტურის მიმართულებებით გადამზადდება.

„ინოვაციური ხიდი“ მინისტრის აპარატის პროგრამის „მშვიდობის ლაბორატორია“ ფარგლებში ხორციელდება. პრეზენტაციას აფხაზეთის ფინანსთა და ეკონომიკის მინისტრი ლევან თევზაია, იუსტიციისა და სამოქალაქო ინტეგრაციის საკითხებში აფხაზეთის მინისტრის პირველი მოადგილე გიორგი გაბედავა, ქალაქ ზუგდიდის ვიცე-მერი კონსტანტინე კაკავა და ადგილობრივი ხელისუფლების წარმომადგენლები ესწრებოდნენ.

პროექტი მიზნად ისახავს კონსტრუქციული დიალოგის, დეზინფორმაციასთან ბრძოლისა და ახალგაზრდების ცნობიერების ამაღლების გზით ქართულ-აფხაზური ურთიერთობების მხარდაჭერას.

აფხაზეთის ავტონომიური რესპუბლიკის ფინანსთა და ეკონომიკის სამინისტროს ორგანიზებით ოკუპირებულ ტერიტორიაზე, გალის რაიონში მცხოვრებ მოსახლეობას აზიური ფაროსანას საწინააღმდეგო პრეპარატი გადაეცემა.

,,ეკონომიკური პროგრამების სააგენტომ“ 10 ტონა შესაწამლი პრეპარატი „ბიფეტრინი“ პროექტის კოორდინატორებს გადასცა. ღონისძიება აზიური ფაროსანას წინააღმდეგ ბრძოლასთან დაკავშირებული პროგრამის ფარგლებში ხორციელდება და აღნიშნულ პრეპარატს ოკუპირებულ გალის რაიონში მცხოვრები მოსახლეობა მიიღებს.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის ფინანსთა და ეკონომიკის მინისტრი ლევან თევზაია, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი ზუგდიდში საქართველოს ეროვნული გმირის, მამია ალასანიას ბიუსტის გახსნას დაესწრო. ბიუსტი ე.წ. „ფრანგულ პარკში“ დაიდგა, სადაც განთავსებულია ეროვნული გმირების მერაბ კოსტავას და გენო ადამიას ბიუსტები, ასევე 1924 წლის აჯანყებულთა მემორიალი.

ბიუსტის გახსნის ცერემონიალს  ზუგდიდის მუნიციპალიტეტის მერი მამუკა წოწერია, ვეტერანთა საქმეების სახელმწიფო სამსახურის დირექტორი კობა კობალაძე, ალასანიას ოჯახის წევრები ვეტერანების საქმეთა სახელმწიფო სამსახურის, აფხაზეთის მეომართა კავშირის, ადგილობრივი ხელისუფლების და საზოგადოების წარმომადგენლები ესწრებოდნენ.

ბიუსტი მამია ალასანიას 80 წლის იუბილესთან დაკავშირებით, ვეტერანების საქმეთა სახელმწიფო სამსახურის ინიციატივით და ზუგდიდის მუნიციპალიტეტის მერიის მხარდაჭერით  შეიქმნა.

მამია ალასანია 1943 წლის 6 მაისს, სოფელ ანაკლიაში, გიორგობის დღეს დაიბადა. იმავე წელს ალასანიების ოჯახი ზუგდიდში გადასახლდა. მამია ალასანიამ 1961 წელს ზუგდიდის №1 საშუალო სკოლა დაამთავრა. მამია ალასანია 1974 წლიდან სამუშაოდ თბილისში უშიშროების კომიტეტის ცენტრალურ აპარატში გადავიდა და სხვადასხვა ხელმძღვანელ თანამდებობებზე მუშაობდა, მოგვიანებით კი სამხრეთ ოსეთის ავტონომიური ოლქის უშიშროების კომიტეტის უფროსი გახდა.

1993 წლის 27 სექტემბერს, მამია ალასანია ქალაქ სოხუმში მოკლეს, ის აფხაზეთის ომში იბრძოდა. 2017 წლის ოქტომბერში მამია ალასანიას ნეშტი იდენტიფიცირებულ იქნა და სამხედრო პატივით დაიკრძალა თბილისში.