აფხაზეთის ავტონომიური რესპუბლიკის განათლებისა და კულტურის მინისტრმა, გიორგი ძაძამიამ, ზუგდიდის სახელმწიფო უნივერსიტეტის გამოსაშვებ საღამოზე სტუდენტებს სწავლის დასრულება მიულოცა.

მინისტრმა ხაზი გაუსვა განათლებული და წარმატებული ახალგაზრდების უმნიშვნელოვანეს როლს ქვეყნის გაძლიერებისა და გამთლიანების პროცესში, ბაკალავრებსა და მაგისტრებს მომავალ საქმიანობაში წარმატება უსურვა.

უნივერსიტეტის კურსდამთავრებულებს სიტყვით აფხაზეთის ავტონომიური რესპუბლიკის მთავრობის თავმჯდომარემ, გიორგი ჯინჭარაძემ, საქართველოს განათლების მეცნიერებისა და ახალგაზრდობის მინისტრმა, გივი მიქანაძემ და შოთა მესხიას ზუგდიდის სახელმწიფო უნივერსიტეტის რექტორმა, თეონა ხუფენიამ მიმართეს.

ღონისძიების ფარგლებში, სტუდენტები მოწვეული სტუმრების წინაშე საზეიმოდ, მანტიებსა და აკადემიურ ქუდებში წარდგნენ, დასასრულს კი წარჩინებული ახალგაზრდები სიგელებით დაჯილდოვდნენ.

გამოსაშვებ საღამოს ზუგდიდის მუნიციპალიტეტის მერი დათო კოდუა, ზუგდიდის მუნიციპალიტეტის საკრებულოს თავმჯდომარე მამუკა წოწერია, სენაკის მუნიციპალიტეტის მერი ვახტანგ გადელია, უნივერსიტეტის პროფესორები, სასულიერო პირები და სხვა მოწვეული სტუმრები ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია და აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე აკაკი ხორავას სახელობის პროფესიულ სახელმწიფო დრამატულ თეატრში სოხუმის დაცემიდან 33 წლისთავისადმი მიძღვნილ საღამოს დაესწრო.

სენაკის ჟიული შარტავას სახელობის №2 საჯარო სკოლის მოსწავლეებმა თეატრალური დადგმა „ჩვენი 33-ე ტკივილიანი შემოდგომა“ წარმოადგინეს. მაყურებლის წინაშე ჟიული შარტავას ცხოვრების გზა, მისი სახელმწიფოებრივი და საზოგადოებრივი მოღვაწეობა გაცოცხლდა. ღონისძიების ფარგლებში, პატივი სენაკთან დაკავშირებული ეროვნული გმირების - ჟიული შარტავას, გენო ადამიას, გურამ გაბესკირიასა და ნოდარ კანკიას ხსოვნას მიაგეს.

საღამოს აფხაზეთის უმაღლესი საბჭოს თავმჯდომარის მოადგილე ვახტანგ ყოლბაია, აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე გურამ მისაბიშვილი, აფხაზეთის მთავრობის აპარატის უფროსი გიორგი სუთიძე, სენაკის მუნიციპალიტეტის მერი ვახტანგ გადელია, საკრებულოს თავმჯდომარე ჯუმბერ ტყებუჩავა, ასევე, ადგილობრივი თვითმმართველობისა და განათლების სფეროს წარმომადგენლები ესწრებოდნენ.

თეატრალური დადგმა, რომელიც უახლესი ისტორიის ერთ-ერთ ყველაზე ტრაგიკულ მოვლენას, აფხაზეთის ომში დაღუპულთა ხსოვნასა და სამშობლოს ერთიანობისთვის თავდადებული ადამიანების ღვაწლს მიეძღვნა, სენაკის მუნიციპალიტეტის მერიისა და საკრებულოს მხარდაჭერით გაიმართა.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, საქართველოს განათლების, მეცნიერებისა და ახალგაზრდობის მინისტრ გივი მიქანაძესთან ერთად, შოთა მესხიას ზუგდიდის სახელმწიფო უნივერსიტეტში 2026 წლის კურსდამთავრებულთა გამოსაშვებ ღონისძიებას დაესწრო.

მთავრობის თავმჯდომარემ სტუდენტებს სიტყვით მიმართა, მათ სწავლის დასრულება მიულოცა და მომავალ საქმიანობაში წარმატებები უსურვა.

„ჩვენთვის, აფხაზეთის მთავრობისთვის აღნიშნულ უნივერსიტეტს განსაკუთრებული როლი აქვს. ეს უნივერსიტეტი არის ხიდი ჩვენს ოკუპირებულ ტერიტორიაზე მცხოვრები ადამიანებისთვისაც, სამშვიდობო მიმართულებისთვისაც, პოლიტიკისთვისაც. მთელი გულით ვულოცავ სტუდენტებს, ვუსურვებ წარმატებებს და ჩვენი ქვეყნის სასიკეთოდ დიდი წვლილი შეეტანოთ“, - განაცხადა გიორგი ჯინჭარაძემ.

კურსდამთავრებულთა გამოსაშვებ ცერემონიაზე საზოგადოებას სიტყვით მიმართეს საქართველოს განათლების, მეცნიერებისა და ახალგაზრდობის მინისტრმა გივი მიქანაძემ და შოთა მესხიას ზუგდიდის სახელმწიფო უნივერსიტეტის რექტორმა თეონა ხუფენიამ.

ღონისძიებას ზუგდიდის მუნიციპალიტეტის მერი დათო კოდუა, ზუგდიდის მუნიციპალიტეტის საკრებულოს თავმჯდომარე მამუკა წოწერია, სენაკის მუნიციპალიტეტის მერი ვახტანგ გადელია და სხვა მოწვეული სტუმრები ესწრებოდნენ.

ღონისძიების დასასრულს უნივერსიტეტის წარჩინებულ კურსდამთავრებულებს სიგელები გადაეცათ.

აღსანიშნავია, რომ შოთა მესხიას ზუგდიდის სახელმწიფო უნივერსიტეტის სტუდენტების 40%-ზე მეტი აფხაზეთიდანაა.

საგანმანათლებლო მიმართულებით არსებული და დაგეგმილი პროგრამების გაცნობის მიზნით, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე და აფხაზეთის განათლებისა და კულტურის მინისტრი გიორგი ძაძამია კავკასიის საერთაშორისო უნივერსიტეტში სტუდენტებს შეხვდნენ.

აფხაზეთიდან დევნილმა სტუდენტებმა სამინისტროს მიერ ბაკალავრიატისა და მაგისტრატურის საფეხურისთვის დაწესებული სტიპენდიების, ახალგაზრდების წახალისებისა და მხარდაჭერის პროგრამებისა და მომავალში დაგეგმილი პროექტების შესახებ ამომწურავი ინფორმაცია მოისმინეს.

მთავრობის თავმჯდომარემ და მინისტრმა სტუდენტებისთვის საინტერესო კითხვებს უპასუხეს და პროგრამების ეფექტიანი განხორციელების შესახებ მათი მოსაზრებები გაიზიარეს.

აფხაზეთის განათლებისა და კულტურის სამინისტროს მიერ სხვადასხვა საფეხურის სტუდენტებისთვის განკუთვნილი პროგრამების შესახებ ინფორმაცია ხელმისაწვდომია სამინისტროს ვებგვერდზე  

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ფინანსთა და ეკონომიკის მინისტრ თენგიზ ნასარიძესთან ერთად, ქუთაისში, აფხაზეთიდან დევნილი მოსახლეობისთვის გამართულ საინფორმაციო შეხვედრას დაესწრო.

შეხვედრაზე დევნილ ბენეფიციარებს სოფლის მეურნეობის მიმართულებით დაგეგმილი სიახლეები და ახალი პროგრამა წარუდგინეს.

მთავრობის თავმჯდომარემ მოსახლეობასთან დევნილი მოსახლეობის მხარდაჭერის გაძლიერების მნიშვნელობასა და ახალ ინიციატივებზე ისაუბრა.

შეხვედრის მონაწილეებმა დეტალური ინფორმაცია მიიღეს აფხაზეთის ავტონომიური რესპუბლიკის ფინანსთა და ეკონომიკის სამინისტროს მოქმედი პროგრამებისა და იმ შესაძლებლობების შესახებ, რაც მათ სოფლის მეურნეობის სექტორში საქმიანობის განვითარებაში დაეხმარებათ.

შეხვედრას აფხაზეთის ავტონომიური რესპუბლიკის ფინანსთა და ეკონომიკის მინისტრის მოადგილე მიხეილ ანჩაბაძე ესწრებოდა.

მსგავსი ტიპის საინფორმაციო შეხვედრები რეგიონებში მცხოვრებ დევნილ მოსახლეობასთან მომავალშიც აქტიურად გაგრძელდება.

სოხუმის გიორგი რატიანის სახელობის მოზარდ მაყურებელთა თეატრმა, ციფრული ფესტივალის ,,ციფრული სოხუმი" ფარგლებში, სპექტაკლი ,,ხანძარი" წარადგინა. რეჟისორ ლაშა შეროზიას ნამუშევარი როგორც ციფრული პლატფორმებისთვის, ასევე ცოცხალი აუდიტორიის წინაშე დაიდგა.

ვალერი ოთხოზორიას პიესის მიხედვით, გურჯაანის კულტურის ცენტრში დადგმულ წარმოდგენას აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია დაესწრო.

სპექტაკლი სოხუმის დაცემის შემდეგ დევნილობაში მყოფი ოჯახის ისტორიას გვიყვება. ეს არის ამბავი ქალზე, რომელსაც ზურგით მოაქვს უახლესი ისტორიის მძიმე ტვირთი, თუმცა ინარჩუნებს რწმენას, რომ საკუთარ სახლში აუცილებლად დაბრუნდება.

საღამოს გურჯაანის მუნიციპალიტეტის მერი გიორგი მაჭავარიანი, გურჯაანის მუნიციპალიტეტის საკრებულოს თავმჯდომარე ვანო ბერიძიშვილი, გურჯაანის კულტურის ცენტრის დირექტორი ბექა სონღულაშვილი, ადგილობრივი ხელისუფლების წარმომადგენლები და სხვა მოწვეული სტუმრები ესწრებოდნენ.

თეატრალური ფესტივალი „ციფრული სოხუმი“ 5 პარტნიორ თეატრს, 5 ახალგაზრდა რეჟისორსა და 5 პიესას აერთიანებს. თითოეული ნამუშევარი აფხაზეთთან დაკავშირებულ თემატიკას განსხვავებული პერსპექტივითა და შემოქმედებითი ხედვით წარმოადგენს.

პროექტი საქართველოს კულტურის სამინისტროსა და „ამბასადორი კაჭრეთის“ ფინანსური მხარდაჭერით ხორციელდება. ფესტივალს გურჯაანის კულტურის ცენტრი და „ამბასადორი კაჭრეთი“ მასპინძლობენ.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის განათლებისა და კულტურის მინისტრ გიორგი ძაძამიასთან ერთად, კავკასიის საერთაშორისო უნივერსიტეტის სტუდენტებს შეხვდა.

შეხვედრის მონაწილეებმა დეტალურად განიხილეს დევნილი სტუდენტებისთვის არსებული სტიპენდიები, ფინანსური წახალისების მექანიზმები და ახალგაზრდების მხარდასაჭერად მომავალში დაგეგმილი ახალი პროექტები. ყურადღება გამახვილდა საგანმანათლებლო პროგრამების ხელმისაწვდომობასა და სტუდენტთა ჩართულობის გაზრდაზე.

შეხვედრა ღია დისკუსიის ფორმატში წარიმართა. სტუდენტებმა მთავრობის თავმჯდომარესა და მინისტრს მათთვის აქტუალურ საკითხებზე კითხვები დაუსვეს და საკუთარი მოსაზრებები გაუზიარეს.

სტუდენტებთან შეხვედრის მიზანს ახალგაზრდებთან კომუნიკაცია, მათი საჭიროებების მოსმენა და საგანმანათლებლო მიმართულებით დაგეგმილი სიახლეების გაცნობა წარმოადგენდა.

აფხაზეთის ჯანმრთელობისა და სოციალური დაცვის სამინისტროს ორგანიზებით, რუხსა და ჩხოროწყუში მცხოვრებ აფხაზეთიდან იძულებით გადაადგილებულ მოსახლეობას უფასო სამედიცინო სკრინინგი ჩაუტარდა.

სამედიცინო აქციის ფარგლებში, აფხაზეთიდან დევნილ მოქალაქეებს ადგილზე სხვადასხვა პროფილის ექიმების კონსულტაციისა და საჭირო სამედიცინო კვლევების ჩატარების შესაძლებლობა ჰქონდათ.

ჩხოროწყუში მიმდინარე სამედიცინო სკრინინგის პროცესს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ავტონომიური რესპუბლიკის ჯანდაცვის მინისტრ ბესიკ კუსიდისთან ერთად გაეცნო. მთავრობის თავმჯდომარე, ასევე, სამედიცინო პერსონალსა და დევნილ ბენეფიციარებს შეხვდა.

აფხაზეთის ჯანდაცვის სამინისტროს ინიციატივით, დევნილი მოსახლეობისთვის უფასო სამედიცინო სკრინინგის პროგრამა მთელი ქვეყნის მასშტაბით, სხვადასხვა ქალაქსა და მუნიციპალიტეტში ეტაპობრივად ხორციელდება. სკრინინგის მიზანია ჯანმრთელობის მდგომარეობის დროული შეფასება და დაავადებების ადრეულ ეტაპზე გამოვლენა.

აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებითა და აფხაზეთის ავტონომიური რესპუბლიკის მთავრობის მხარდაჭერით, სოხუმის დაცემის დღისადმი მიძღვნილი გამოფენა და თეატრალიზებული წარმოდგენა გაიმართა. 

გამოფენაზე წარმოდგენილი იყო აფხაზეთიდან დევნილი ოჯახების პირადი ალბომები და ნივთები, რომლებიც ინახავს აფხაზეთის, როგორც ერთიანი საქართველოს განუყოფელი ნაწილის შესახებ მეხსიერებას, ქართულ-აფხაზურ ურთიერთობებს, მეგობრობასა და საერთო კულტურას.

თეატრალიზებული წარმოდგენა, რომელიც 33 წლის წინ აფხაზეთში დატრიალებულ ტრაგედიას მიეძღვნა, მუსიკალურად აფხაზეთის შემოქმედებითმა კოლექტივებმა - აფხაზეთის სიმღერის სახელმწიფო ანსამბლმა ,,შავნაბადამ", გურამ ყურაშვილის სახელობის სახელმწიფო საგუნდო კაპელამ და აფხაზეთის სიმღერისა და ცეკვის სახელმწიფო აკადემიურმა ანსამბლმა ,,აფხაზეთმა" გააფორმეს; მასში სოხუმის კონსტანტინე გამსახურდიას სახელობის სახელმწიფო დრამატული თეატრის მსახიობებმა ნიკა წერედიანმა, დავით ბერაძემ და სანათა ძაძამიამ მიიღეს მონაწილეობა.

ღონისძიება აფხაზეთის ავტონომიური რესპუბლიკის მთავრობის თავმჯდომარემ, გიორგი ჯინჭარაძემ გახსნა. მთავრობის მეთაურმა 27 სექტემბრის ტრაგიკულ მნიშვნელობაზე, ოჯახების მიერ განცდილ უდიდეს ტკივილსა და დევნილთა დაბრუნების იმედზე ისაუბრა.

საღამოს შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი, საქართველოს იუსტიციის მინისტრი პაატა სალია, საქართველოს აღმასრულებელი და საკანონმდებლო ხელისუფლების წარმომადგენლები, აფხაზეთის მთავრობის წევრები და უმაღლესი საბჭოს დეპუტატები, აჭარის ავტონომიური რესპუბლიკის მთავრობისა და საქართველოში აკრედიტებული დიპლომატიური კორპუსის წარმომადგენლები, სასულიერო პირები, ეროვნული გმირების ოჯახის წევრები და დევნილი საზოგადოების წარმომადგენლები ესწრებოდნენ.

ღონისძიებას თბილისის ივანე ჯავახიშვილის სახელობის სახელმწიფო უნივერსიტეტმა უმასპინძლა. 

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის მთავრობის წევრებთან ერთად, საბურთალოს ძმათა სასაფლაოზე, საქართველოს ეროვნული გმირის გენო ადამიას საფლავი ყვავილებით შეამკო და მის ხსოვნას პატივი მიაგო.

გენერალ-მაიორი გენო ადამია 1993 წლის 28 სექტემბერს, სოხუმის დაცემიდან მეორე დღეს, მდინარე კელასურის ხიდთან დაიღუპა, როდესაც ის თანამებრძოლებთან ერთად ამ მიმართულებით პოზიციის გასამაგრებლად გაემართა.

2020 წლის 22 სექტემბერს გენო ადამიას საქართველოს ეროვნული გმირის წოდება მიენიჭა.

დაჯილდოებულია ვახტანგ გორგასლის I და III ხარისხის ორდენებით.

თბილისის სახელმწიფო უნივერსიტეტში სოხუმის დაცემის დღისადმი მიძღვნილი ღონისძიება გაიმართა.

ღონისძიება ფოტოგამოფენითა და ისტორიული ნივთების ექსპოზიციით გაიხსნა.

ფოტოგამოფენაზე წარმოდგენილი იყო სოხუმში, ქალაქის დაცემამდე გადაღებული ფოტოები, რომლებიც იმდროინდელ ქალაქს, მის ყოველდღიურ ცხოვრებას წარმოაჩენდა.

საგამოფენო სივრცეში ასევე მოეწყო ისტორიული ნივთების გამოფენა, სადაც წარმოდგენილი იყო სოხუმიდან და აფხაზეთიდან წამოღებული პირადი ნივთები.

ღონისძიების ძირითადი ნაწილი მისასალმებელი სიტყვით აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ გახსნა.

მთავრობის თავმჯდომარემ 27 სექტემბრის ტრაგიკულ მნიშვნელობაზე, ოჯახების მიერ განცდილ უდიდეს ტკივილსა და დევნილთა დაბრუნების იმედზე ისაუბრა. მან ხაზი გაუსვა, რომ მომავალი უნდა აშენდეს არა დაპირისპირებითა და შურისძიებით, არამედ მშვიდობით, დიალოგითა და ნდობის აღდგენით. გიორგი ჯინჭარაძის თქმით, მთავარი მიზანია არა მხოლოდ ტერიტორიის, არამედ ქართველებისა და აფხაზების ერთმანეთთან დაბრუნება და შერიგება.

„ჩემი ოჯახიც იმ ტრაგედიის ნაწილია, რომელმაც აფხაზეთში უამრავი ქართული და აფხაზური ოჯახი დააზარალა. ამიტომ კარგად მესმის, რომ არსებობს ტკივილი, რომელსაც დრო ვერ შლის. მაგრამ არსებობს პასუხისმგებლობაც, რომელსაც დრო კიდევ უფრო გვიმძაფრებს. ეს არის პასუხისმგებლობა, რომ ჩვენს შვილებს მემკვიდრეობად არ დავუტოვოთ სიძულვილი.

ომი დასრულდა, მაგრამ ჩვენი საერთო ისტორია არ დასრულებულა. ჩვენ დღეს ვალდებული ვართ, ტრაგიკული წარსულიდან გამოვიტანოთ მთავარი გაკვეთილი: ქართველებმა და აფხაზებმა ერთმანეთი აღარასოდეს უნდა დაკარგონ.

ჩვენი მომავალი ვერ აშენდება ახალი დაპირისპირებით, მუქარითა და შურისძიებით. იგი უნდა აშენდეს მშვიდობით, დიალოგით, ნდობის აღდგენით და ადამიანური ურთიერთობების დაბრუნებით“, - განაცხადა აფხაზეთის მთავრობის თავმჯდომარემ.

ღონისძიების ფარგლებში მოეწყო თეატრალიზებული წარმოდგენა, რომელიც 33 წლის წინ აფხაზეთში დატრიალებულ ტრაგედიას მიეძღვნა. საღამო აფხაზეთის შემოქმედებითმა კოლექტივებმა ცოცხალი მუსიკალური შესრულებით გააფორმეს.

საღამოს შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი, საქართველოს იუსტიციის მინისტრი პაატა სალია, საქართველოს აღმასრულებელი და საკანონმდებლო ხელისუფლების წარმომადგენლები, აფხაზეთის მთავრობის წევრები და უმაღლესი საბჭოს დეპუტატები, აჭარის ავტონომიური რესპუბლიკის მთავრობისა და საქართველოში აკრედიტებული დიპლომატიური კორპუსის წარმომადგენლები, სასულიერო პირები, ეროვნული გმირების ოჯახის წევრები და დევნილი საზოგადოების წარმომადგენლები ესწრებოდნენ.

ღონისძიება აფხაზეთის ავტონომიური რესპუბლიკის მთავრობისა და აფხაზეთის განათლებისა და კულტურის სამინისტროს ორგანიზებით განხორციელდა.